ଶିମଲା,୪।୧୦ : ସମାଲୋଚନାର ସମ୍ମୁଖୀନ ହୋଇ ହିମାଚଳ ପ୍ରଦେଶ ସରକାର ମଙ୍ଗଳବାର ଗଣମାଧ୍ୟମ ପ୍ରତିନିଧିଙ୍କଠାରୁ ଚରିତ୍ର ପ୍ରମାଣ ପତ୍ର ମାଗିବା ନିର୍ଦ୍ଦେଶ ପ୍ରତ୍ୟାହାର କରିନେଇଛନ୍ତି। ବୁଧବାର ରାଜ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରସ୍ତାବିତ ରାଲିର କଭରେଜ ପାଇଁ ଗଣମାଧ୍ୟମ ପ୍ରତିନିଧିମାନଙ୍କୁ ଚରିତ୍ର ପ୍ରମାଣପତ୍ର ପ୍ରସ୍ତୁତ କରିବାକୁ କୁହାଯାଇଥିଲା। ତାଙ୍କ ହିମାଚଳ ଗସ୍ତ ସମୟରେ ପ୍ରଧାନମନ୍ତ୍ରୀ ବିଲାସପୁରରେ ଏମ୍ସର ଲୋକାର୍ପଣ କରିବା ପରେ ଏକ ସାଧାରଣ ସଭାକୁ ସମ୍ବୋଧିତ କରିବେ ଏବଂ କୁଲୁରେ ପ୍ରସିଦ୍ଧ ଦଶହରା ଉତ୍ସବର ରଥଯାତ୍ରାରେ ମଧ୍ୟ ଅଂଶଗ୍ରହଣ କରିବେ।
ପ୍ରଧାନମନ୍ତ୍ରୀଙ୍କ ବିଲାସପୁର ଗସ୍ତକୁ ନେଇ ଗଣମାଧ୍ୟମ ପ୍ରତିନିଧିଙ୍କଠାରୁ ଚରିତ୍ର ପ୍ରମାଣପତ୍ର ପ୍ରସ୍ତୁତ କରିବା ରାଜ୍ୟ ସରକାରଙ୍କ ନିର୍ଦ୍ଦେଶକୁ କଂଗ୍ରେସ ଏବଂ ଆମ ଆଦମୀ ପାର୍ଟି ପକ୍ଷରୁ କଡ଼ା ସମାଲୋଚନା କରାଯାଇଥିଲା। ସେପ୍ଟେମ୍ବର ୨୯ ରେ ବିଲାସପୁର ପୋଲିସ ଅଧୀକ୍ଷକ ଦୀପକ ଶର୍ମା ଏହି ନିର୍ଦ୍ଦେଶ ଦେଇଥିଲେ।
ବିରୋଧୀ ଦଳ ଏହି ଆଦେଶକୁ ଭାଜପା ସରକାରଙ୍କର ଗଣତନ୍ତ୍ର ଉପରେ ଆକ୍ରମଣ ବୋଲି କହଥିଲେ। ରାଜ୍ୟ କଂଗ୍ରେସ ଉପାଧ୍ୟକ୍ଷ ନରେଶ ଚୌହାନ ଏବଂ ଏଏପିର ରାଜ୍ୟ ମୁଖପାତ୍ର ଗୌରବ ଶର୍ମା ମଙ୍ଗଳବାର ରାଜ୍ୟ ସରକାରଙ୍କୁ ଏହି ନିର୍ଦ୍ଦେଶ ପ୍ରତ୍ୟାହାର କରିବାକୁ ଅନୁରୋଧ କରିଥିଲେ। ରାଜ୍ୟ ମହାନିର୍ଦ୍ଦେଶକ ସଞ୍ଜୟ କୁଣ୍ଡୁ ପୋଲିସ ଅଧୀକ୍ଷକଙ୍କ ଆଦେଶ ପ୍ରତ୍ୟାହାର କରି ନେଇଛନ୍ତି ବୋଲି ଏକ ସରକାରୀ ବିବୃତ୍ତିରେ କୁହାଯାଇଛି। ଏଭଳି ଅସୁବିଧା ହୋଇଥିବାରୁ ସରକାର ଦୁଃଖିତ ବୋଲି ସେ କହିଛନ୍ତି। ପୋଲିସ ଅଧିକ୍ଷକ ଦିବାକର ଶର୍ମା କହିଛନ୍ତି ଯେ, ଏହି ନିର୍ଦ୍ଦେଶ ମୋ ଅଜାଣତରେ ଜାରି ହୋଇଥିଲା। ପୋଲିସ ମୁଖ୍ୟାଳୟ କିମ୍ବା ରାଜ୍ୟ ସରକାରଙ୍କ ସହ ଏହାର କୌଣସି ସମ୍ପର୍କ ନାହିଁ। ଏହି ନିର୍ଦ୍ଦେଶକୁ ପ୍ରତ୍ୟାହାର କରି ନିଆଯାଇଛି।
