ଛତ୍ରପୁର,୧୦ା୬(ଡି.ଏନ୍.ଏ.): ଗଞ୍ଜାମ ଜିଲାରେ ଅନେକ ବେଆଇନ ଚିକିତ୍ସାଳୟ ଥିବା ଜିଲା ପ୍ରଶାସନର ନଜରକୁ ଆସିଛି। କେତେକ ଚିକିତ୍ସାଳୟରେ ଭ୍ରୁଣ ନିରୂପଣ କରି ଗର୍ଭପାତ ଭଳି ଜଘନ୍ୟ କାର୍ଯ୍ୟ କରାଯାଉଥିବା ମଧ୍ୟ ଜଣାପଡ଼ିଛି। ଅନେକ ଗୁଡିଏ ଚିକିତ୍ସାଳୟ ଗୋଟିଏ ପ୍ରକାର ସେବା ନିମନ୍ତେ ଲାଇସେନ୍ସ ଗ୍ରହଣ କରି ବେଆଇନ କାର୍ଯ୍ୟରେ ଲିପ୍ତ ରହୁଛନ୍ତି। ରୋଗ ନିରୂପଣ କେନ୍ଦ୍ରଗୁଡ଼ିକରେ ଧାର୍ଯ୍ୟ ମୂଲ୍ୟ ଠାରୁ ଜୋର ଜବରଦସ୍ତ ଅଧିକ ଅର୍ଥ ଆଦାୟ କରାଯାଉଛି। ଅନେକ କ୍ଷେତ୍ରରେ ଦେଖାଯାଉଛି, ନୂତନ ମେଶିନ୍ ବଦଳରେ ବହୁ ପୁରୁଣା ମେଶିନର ବ୍ୟବହାର ହେଉଛି। ଏଭଳି ସମସ୍ତ କ୍ଷେତ୍ରକୁ ଆଧାର କରି ଚଢାଉ ଏବଂ ଯାଞ୍ଚ କାର୍ଯ୍ୟକୁ ଜୋରଦାର୍ କରାଯିବ। ଜିଲାପାଳ ବିଜୟ ଅମୃତା କୁଲାଙ୍ଗେ ନିର୍ଦ୍ଦେଶ ଦେଇଛନ୍ତି। ଗର୍ଭଧାରଣ ପୂର୍ବ ଓ ପରବର୍ତ୍ତୀ ଲିଙ୍ଗ ନିରୂପଣ ଆଇନ୍ର ଜିଲା ଉପଦେଷ୍ଟା କମିଟି ବୈଠକରେ ଜିଲାପାଲ ଏହି ନିର୍ଦ୍ଦେଶ ଦେଇଛନ୍ତି।
ଏପରି କି ଯେ କେହି ବି କନ୍ୟା ଭ୍ରୁଣ ହତ୍ୟା ଖବର ପାଉଛନ୍ତି ଶୁଳ୍କବିହୀନ ନମ୍ବର ୨୬୩୮୦୦କୁ ଫୋନ୍ କରି ଜଣାଇବାକୁ କୁହାଯାଇଛି। ଫୋନ୍ କରି ଜଣାଉଥିବା ବ୍ୟକ୍ତିଙ୍କ ନାମ ଗୋପନ ରଖାଯିବ। ତେଣୁ ନିର୍ଭୟରେ ଫୋନ୍ କରି ଜିଲା ପ୍ରଶାସନକୁ ଅବଗତ କରାଇବା ପାଇଁ ଜିଲାପାଳଙ୍କ ପକ୍ଷରୁ ଅନୁରୋଧ କରାଯାଇଛି।
