କାମାକ୍ଷାନଗର, ୨୬।୬(ଡି.ଏନ.ଏ.)
ଢେଙ୍କାନାଳ ଜିଲା କାମାକ୍ଷାନଗର ବ୍ଲକ କୁସୁମଯୋଡ଼ି ପଞ୍ଚାୟତରେ ଚାଲିଥିବା ଓଟିପିସିଏଲ କାମକୁ ବିରୋଧ କରିଛନ୍ତି ମରିଚକଣ ଏବଂ ନୂଆଙ୍ଗବିଲ ଗ୍ରାମର ବିସ୍ଥାପିତ ପ୍ରଜା। କ୍ଷତିଗ୍ରସ୍ତଙ୍କ ତାଲିକା ସଂଶୋଧନ ନ କରି ମନଇଚ୍ଛା କାମ କରାଯାଉଥିବା ଅଭିଯୋଗ କରି ଗୁରୁବାର ସେମାନେ ଆନ୍ଦୋଳନକୁ ଓହ୍ଲାଇଥିଲେ। ଆସନ୍ତା ସପ୍ତାହରେ ତ୍ରିପାକ୍ଷିକ ବୈଠକରେ ସମସ୍ୟାର ସମାଧାନ କରାଯିବ ବୋଲି ପୋଲିସ ପକ୍ଷରୁ ପ୍ରତିଶ୍ରୁତି ମିଳିବା ପରେ ପରିସ୍ଥିତି ଶାନ୍ତ ପଡ଼ିଥିଲା।
କ୍ଷତିଗ୍ରସ୍ତଙ୍କ କହିବା କଥା, ବିସ୍ଥାପିତଙ୍କ ପାଇଁ ନିର୍ମାଣ ଚାଲିଥିବା କଲୋନୀ ଚାରିପଟେ କଂକ୍ରିଟ ପାଚେରି, ବିଦ୍ୟୁତ୍ ସଂଯୋଗ ବ୍ୟବସ୍ଥା, ରାସ୍ତା ପ୍ରଶସ୍ତୀକରଣ କରିବାକୁ ଦୀର୍ଘଦିନ ହେଲା କମ୍ପାନୀ ନିକଟରେ ଦାବି କରାଯାଉଛି। ହେଲେ ବିକାଶମୂଳକ କାର୍ଯ୍ୟକୁ ଅଣଦେଖା କରି କମ୍ପାନୀ ପକ୍ଷରୁ ବଳପୂର୍ବକ କାମ କରାଯାଉଛି। ଏହାକୁ ନେଇ ଲାଗି ରହିଥିବା ଅସନ୍ତୋଷ ଗୁରୁବାର ତୀବ୍ର ରୂପ ଧାରଣ କରିଥିଲା। ପୋଲିସ ଉପସ୍ଥିତରେ କାମ ଚାଲିଥିବାବେଳେ ଶତାଧିକ ମହିଳାପୁରୁଷ ଗ୍ରାମ ବିଦ୍ୟାଳୟ ନିକଟରେ କାମ ବନ୍ଦ କରିବାକୁ ଏକାଠି ହୋଇଥିଲେ। ଅପ୍ରୀତିକର ପରିସ୍ଥିତିକୁ ଏଡ଼ାଇବାକୁ ଏସ୍ଡିପିଓ ସୁପ୍ରସନ୍ନ ମଲ୍ଲିକଙ୍କ ନେତୃତ୍ୱରେ ପୋଲିସ ଫୋର୍ସ ଜାଗା ପଞ୍ଚସଖା ରାଇସ ମିଲ୍ ନିକଟରେ ଆନ୍ଦୋଳନକାରୀଙ୍କୁ ଅଟକାଇଲା। ଏହାକୁ ନେଇ ପୋଲିସ ଏବଂ କ୍ଷତିଗ୍ରସ୍ତଙ୍କ ମଧ୍ୟରେ ମୁହଁାମୁହିଁ ପରିସ୍ଥିତି ସୃଷ୍ଟି ହୋଇଥିଲା। ରାଜସ୍ବ ଅଧିକାରୀ ମାନସ ଦଣ୍ଡପାଟ, ଥାନା ଅଧିକାରୀ ଅଭିନବ ଡାଳୁଆ, ତୁମୁସିଂହା ଥାନାଧିକାରୀ ଆନନ୍ଦ ଚରଣ ଡୁଙ୍ଗ୍ଡୁଙ୍ଗ୍, ପଣ୍ଡୁଆ ଫାଣ୍ଡି ଅଧିକାରୀ ଶ୍ୱେତପଦ୍ମା ବିଶ୍ୱାଳ ପ୍ରମୁଖ ପରିସ୍ଥିତି ଆୟତ୍ତ କରିବାକୁ ଉଦ୍ୟମ କରିଥିଲେ। ଆନ୍ଦୋଳନକାରୀମାନେ ରାସ୍ତା ଉପରେ ବସି ରହିବା ସହ କମ୍ପାନୀ ବିରୋଧରେ ନାରାବାଜି କରିଥିଲେ। ଉପଯୁକ୍ତ କ୍ଷତିପୂରଣ ଏବଂ କ୍ଷତିଗ୍ରସ୍ତଙ୍କ ତାଲିକାରେ ସଂଶୋଧନ ନ ହେବା ଯାଏ କମ୍ପାନୀ କାମକୁ ବିରୋଧ ଜାରି ରହିବ ବୋଲି ସେମାନେ ଚେତାବନୀ ଦେଇଥିଲେ। ଆସନ୍ତା ସପ୍ତାହରେ କମ୍ପାନୀ କର୍ତ୍ତୃପକ୍ଷ, କ୍ଷତିଗ୍ରସ୍ତ ପ୍ରଜା ଏବଂ ପ୍ରଶାସନ ମଧ୍ୟରେ ତ୍ରିପାକ୍ଷିକ ବୈଠକ ଅନୁଷ୍ଠିତ ହେବ ବୋଲି ଏସ୍ଡିପିଓ ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା।
