ପରଜଙ୍ଗ,୧୬।୩(ନିଗମାନନ୍ଦ ଦଳବେହେରା): ଢେଙ୍କାନାଳ ଜିଲା ପରଜଙ୍ଗ ବ୍ଲକ କଣ୍ଢେଇଖୋଲ ଗ୍ରାମର ରାଶନକାର୍ଡଧାରୀ ଖୁଜାରୀ କାଣ୍ଡି (୬୨) ୨୦୧୮ରେ ଉଜ୍ଜ୍ୱଳା ଗ୍ୟାସ ଯୋଜନାରେ ସରାଙ୍ଗସ୍ଥିତ ଅଗ୍ନି ଭାରତ ଗ୍ୟାସ ଗ୍ରାମୀଣ ବିତରକଙ୍କ ନିକଟରେ ଆବେଦନ କରିଥିଲେ। ଗ୍ୟାସ ବିତରକ ମୃତ୍ୟୁଞ୍ଜୟ ନାଥ ମହିଳାଙ୍କୁ ତୁମର ଉଜ୍ଜ୍ୱଳା ଗ୍ୟାସ ହୋଇନାହିଁ, ପରବର୍ତ୍ତୀ ସମୟରେ ହେବ ବୋଲି କହିଥିଲେ। ତେବେ ମହିଳା ଜଣଙ୍କ ଦୀର୍ଘ ୮ ବର୍ଷ ହେଲା ବାରମ୍ବାର ଉକ୍ତ ଗ୍ୟାସ ବିତରକଙ୍କ ପାଖକୁ ଯାଇ ସମସ୍ତ କାଗଜପତ୍ର ଦେଉଥିଲେ ମଧ୍ୟ ତାଙ୍କର ଗ୍ୟାସ୍ ହୋଇନାହିଁ ବୋଲି ବିତରକ କହୁଥିଲେ।
ମହିଳାଙ୍କ ପୁଅ ଚଗଲା ଏହାର ସତ୍ୟାସତ୍ୟ ଜାଣିବାକୁ ତାଙ୍କ ମା’ଙ୍କ ରାଶନକାର୍ଡ ଏବଂ ଆଧାରକାର୍ଡ ଧରି ଜନସେବା କେନ୍ଦ୍ରକୁ ଯାଇ ଯାଞ୍ଚ କରିବା ବେଳେ ୨୦୧୮ରୁ ଉଜ୍ଜଳା ଗ୍ୟାସରେ ତାଙ୍କ ମା’ଙ୍କ ନାମ ଅନ୍ତର୍ଭୁକ୍ତ ହୋଇଥିବା ଜାଣିବାକୁ ପାଇଥିଲେ, ଯାହାକି ସରାଙ୍ଗସ୍ଥିତ ଅଗ୍ନି ଭାରତ ଗ୍ୟାସ ଗ୍ରାମୀଣ ବିତରକଙ୍କ କୋଡ ନଂ ୧୯୦୪୫୦ ଅଟେ। ଖଜୁରୀ କାଣ୍ଡିଙ୍କ କଞ୍ଜ୍ୟୁମର ନଂ. ୯୬୦୩୯୮୬୨ ହୋଇଥିବା ବେଳେ ଆଇଡି ନଂ. ୧୦୦୦୦୦୦୦୦୯୬୦୩୯୮୬୨ ବୋଲି ଜାଣିବାକୁ ପାଇଥିଲେ । ଏ ନେଇ ଉଜ୍ଜ୍ୱଳା ପୋର୍ଟାଲ ମାଧ୍ୟମରେ ଗ୍ୟାସ ବିତରକ ସଂସ୍ଥା ନାମରେ ଅଭିଯୋଗ କରିଥିଲେ। ପରେ ଗ୍ୟାସ ବିତରକ ସଂସ୍ଥା ମହିଳାଙ୍କୁ ଡକାଇ ତୁମ ଗ୍ୟାସ ଆମ ଏଜେଣ୍ଟ ନେଇଯାଇଛନ୍ତି, ତାଙ୍କୁ କହିଛି ତୁମକୁ ଦେଇଦେବେ ବୋଲି କହି ଏବେ ବି ଠକି ଚାଲିଛନ୍ତି।
ଶେଷରେ ମହିଳା ଜଣଙ୍କ ପୋଲିସର ଦ୍ୱାରସ୍ଥ ହୋଇଛନ୍ତି। ଏ ବିଷୟରେ ବିତରକ ମୃତ୍ୟୁଞ୍ଜୟ ନାଥ କହିଛନ୍ତି, ଉକ୍ତ ମହିଳାଙ୍କ ଗ୍ୟାସକୁ ଆମ ଏଜେଣ୍ଟ ନେଇଯାଇଛନ୍ତି। ତାଙ୍କୁ କହିଛି ଗ୍ୟାସ ମହିଳାଙ୍କୁ ଫେରେଇ ଦେବେ। ତେବେ ଦୀର୍ଘ ୮ ବର୍ଷ ହେବ ଉକ୍ତ ଗ୍ୟାସ ବିତରକ ସଂସ୍ଥା ମହିଳାଙ୍କ ଗ୍ୟାସ୍ ବିକ୍ରି କରିଦେଉଥିବା ଅଭିଯୋଗ ହୋଇଛି। ଏହିପରି ଆଉ କେତେ ଗ୍ୟାସ ବାଟମାରଣା ହୋଇଛି ଯୋଗାଣ ବିଭାଗ ତଦନ୍ତକଲେ ସତ୍ୟାସତ୍ୟ ଜଣାପଡିବ ବୋଲି ମହିଳାଙ୍କ ପୁଅ ଦାବି କରିଛନ୍ତି।
