ପୁରୀ ଅଫିସ,୯।୮: ବ୍ରିଟିଶ ଅମଳରେ ନ୍ୟାରୋ ଗେଜ୍ ଟ୍ରେନ୍ ଚଳାଚଳ ପାଇଁ ବ୍ୟବହୃତ ହେଉଥିବା ଲୋକୋ ମୋଟିଭ୍ ଇଞ୍ଜିନ୍କୁ ଅନୁମତି ବିନା ଉଠାଇନେବାକୁ ଉଦ୍ୟମ ଚାଲିଛି। ଏନେଇ ରବିବାର ପୁରୀ ସମୁଦ୍ରକୂଳ ଥାନାରେ ଚାଣକ୍ୟ ବିଏନ୍ଆର୍ ହୋଟେଲର ମ୍ୟାନେଜରଙ୍କ ବିରୋଧରେ ଏତଲା ଦିଆଯାଇଛି। ଚାଣକ୍ୟ ଗ୍ରୁପ୍ ହୋଟେଲ ଜାଣିଶୁଣି ବ୍ରିଟିଶ୍ ଅମଳର ଏହି ସରକାରୀ ସମ୍ପତ୍ତିକୁ ହଡ଼ପ କରିବାକୁ ଉଦ୍ୟମ କରିଥିବା ଏତଲାରେ ଉଲ୍ଲେଖ ରହିଛି। ରବିବାର ପୂର୍ବାହ୍ନ ୯ଟାରେ ହୋଟେଲ କର୍ମଚାରୀମାନେ ଏହାକୁ ଖୋଲିକରି ନେବା ପାଇଁ ଉଦ୍ୟମ କରୁଥିବା ପୁରୀ ଲୋକେ ଦେଖିଥିଲେ। ଶ୍ରୀଜଗନ୍ନାଥ ସେନା ଓ କଂଗ୍ରେସ ଉକ୍ତ ଘଟଣାରେ ହସ୍ତକ୍ଷେପ କରିବା ପରେ ହୋଟେଲ କର୍ମଚାରୀମାନେ ଏହାର ସ୍ଥାନାନ୍ତରଣରୁ ବିରତ ହୋଇଥିଲେ।
ଉଲ୍ଲେଖ ରହିଛି ଯେ, ଚାଣକ୍ୟ ଗ୍ରୁପ୍କୁ ରେଲଓ୍ବେ ପକ୍ଷରୁ ହୋଟେଲ୍ ଲିଜ୍ରେ ଦିଆଯାଇଥିବାବେଳେ କୌଣସି ସମ୍ପତ୍ତି ସ୍ଥାନାନ୍ତର ଓ କିମ୍ବା ବିନା ଅନୁମତିରେ ଭିତ୍ତିଭୂମିରେ ବଡ଼ଧରଣର ପରିବର୍ତ୍ତନ ପାଇଁ ଅନୁମତି ନାହିଁ। ଏହାସତ୍ତ୍ବେ ଚାଣକ୍ୟ ବିଏନ୍ଆର୍ ପକ୍ଷରୁ ଇଞ୍ଜିନ୍କୁ ଉଠାଇନେବାକୁ ଉଦ୍ୟମ ହେଉଛି। ଅଭିଯୋଗକାରୀ ହେକ୍ଟର ମିଶ୍ର କହିଛନ୍ତି, ଏଭଳି ଦୁର୍ଲ୍ଲଭ ମେଶିନ ଭାରତର ଖୁବ୍ କମ୍ ସ୍ଥାନରେ ରହିଛି। ଏବେ ଭାରତରେ ଏଭଳି ମାତ୍ର ୧୮ଟି ଇଞ୍ଜିନ୍ ରହିଛି। ଦାର୍ଜିଲିଂ ହିମାଲୟନ୍ ରେଲୱେ ପାଖରେ ୪ଟି, ନୀଳଗିରି ହିଲ୍ ରେଲୱେ ପାଖରେ ୫ଟି ଏଭଳି ଲୋକୋ ମୋଟିଭ୍ ଇଞ୍ଜିନ୍ ରହିଛି। ପୁରୀ ସହରରେ ଥିବା ଇଞ୍ଜିନ କେବଳ ପ୍ରଦର୍ଶନୀ ଉଦ୍ଦେଶ୍ୟରେ ରହିଥିବା ବେଳେ ଅଧିକାଂଶ ସ୍ଥାନରେ ଏଭଳି ଇଞ୍ଜିନ୍କୁ ଚଳାଚଳ କରାଯାଉଛି। ସେହିଭଳି ସିମ୍ଲାରେ ମଧ୍ୟ ଏଭଳି ୩ଟି ଇଞ୍ଜିନ୍ ରହିଛି। ୧୯୯୮ରେ ଏହାର ରକ୍ଷଣାବେକ୍ଷଣ ଦାୟିତ୍ୱ ୟୁନେସ୍କୋ ନିଜ ହାତକୁ ନେଇସାରିଛି। ଏଭଳି ଐତିହ୍ୟସମ୍ପନ୍ନ ବସ୍ତୁର ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ପୁରୀରେ ଏଭଳି ଇଞ୍ଜିନ୍ ଥିବାରୁ ଏହା ଉପରେ ପୁରୀବାସୀଙ୍କର ପ୍ରଥମ ଅଧିକାର ରହିଛି। ଏହାକୁ ଚାଣକ୍ୟ ବିଏନ୍ଆର୍ ପରିସରରୁ ଅଣାଯାଇ ସ୍ବତନ୍ତ୍ର ଭାବେ ପ୍ରଦର୍ଶନ କରାଯାଉ। ଲୋକେ ଭାରତୀୟ ରେଲଓ୍ବେର ଇତିହାସ ସମ୍ପର୍କରେ ଜାଣିବାକୁ ପାଇବା ସହ ବ୍ରିଟିଶ ଉପନିବେଶ ଓ ରେଳ ବିକାଶ ସମ୍ପର୍କରେ ମଧ୍ୟ ଗୁରୁତ୍ୱପୂର୍ଣ୍ଣ ସୂଚନା ପାଇପାରିବେ। ସେହିପରି ପୁରୀ ଭାଜପା ଯୁବମୋର୍ଚ୍ଚା ସଭାପତି ଜୟନ୍ତ କୁମାର ଦାଶ କହିଛନ୍ତି, ଏହି ମୂଲ୍ୟବାନ ଇଞ୍ଜିନର ଉପଯୁକ୍ତ ସଂରକ୍ଷଣ ହେଉ ଓ ରେଳ ମନ୍ତ୍ରାଳୟ ପ୍ରତ୍ୟକ୍ଷ ତତ୍ତ୍ବାବଧାନରେ ଏହାକୁ ପୁରୀରେ ରଖାଯାଉ। ଫଳରେ ପର୍ଯ୍ୟଟକ ଦେଖି ଖୁସିହେବେ ଓ ପୁରୀର ଗରିମା ବଢ଼ିବ। ଅନ୍ୟପକ୍ଷରେ ଏନେଇ ପୁରୀ ଜିଲା ପ୍ରଶାସନ ପାଖରେ କିଛି ସୂଚନା ନାହିଁ। ଏହା ରେଳ ବିଭାଗ ଅଧୀନ କାର୍ଯ୍ୟ ବୋଲି ଉପଜିଲାପାଳ ଭବତାରଣ ସାହୁ କହିଛନ୍ତି। ସେହିଭଳି ଚାଣକ୍ୟ ବିଏନ୍ଆର୍ ରେସିଡେନ୍ସ ମ୍ୟାନେଜର କହିଛନ୍ତି, ସମ୍ପୃକ୍ତ ଇଞ୍ଜିନ ରେଳ ବିଭାଗର ହୋଇଥିବାରୁ ସେଠାରେ ହେଉଥିବା କାର୍ଯ୍ୟ ରେଲଓ୍ବେ କରୁଥାଇପାରେ। ଚାଣକ୍ୟ ଗ୍ରୁପ୍ସ ପକ୍ଷରୁ ଏଭଳି କିଛି ନିଷ୍ପତ୍ତି ନିଆଯାଇନାହିଁ। ଅପରପକ୍ଷେ ରେଲଓ୍ବେ ପକ୍ଷରୁ ଅଲ୍ଲୀ ଆକବର ଉଖାନୀ କମ୍ପାନୀକୁ ଏହାର ମରାମତି ଦାୟିତ୍ୱ ଦିଆଯାଇଥିବାବେଳେ ସେହି କମ୍ପାନୀ ଇୟାଜ୍ ଖାନ୍ କମ୍ପାନୀ କର୍ତ୍ତୃପକ୍ଷଙ୍କୁୁ କାର୍ଯ୍ୟଭାର ଦେଇଥିଲା ବୋଲି ପୋଲିସ କହିଛି। ତେବେ ସେଠାରେ କିଏ କାର୍ଯ୍ୟ କରୁଥିଲା ତାହା ତଦନ୍ତ ପରେ ସ୍ପଷ୍ଟ ହେବ ବୋଲି ସମୁଦ୍ରକୂଳ ଥାନା ଆଇଆଇସି ଚିନ୍ମୟ ରାଉତ କହିଛନ୍ତି।
