ଭୁବନେଶ୍ବର, ୧୬ା୨(ବ୍ୟୁରୋ): ମନ୍ତ୍ରୀ ନବ ଦାସ ହତ୍ୟା ମାମଲା ନେଇ ସରକାରଙ୍କୁ ବିରୋଧୀ ପୁଣି ଟାର୍ଗେଟ କରିଛନ୍ତି। କଂଗ୍ରେସ ପ୍ରଭାରୀ ଚେଲ୍ଲାକୁମାର, ବରିଷ୍ଠ ଭାଜପା ନେତା ବିଜୟ ମହାପାତ୍ର ଏବଂ ପ୍ରଦୀପ ପୁରୋହିତ ବିଜେଡି ନେତାମାନଙ୍କୁ ନବ ଦାସଙ୍କ ହତ୍ୟା ଘଟଣା ନେଇ କଡ଼ା ଭାଷାରେ ସମାଲୋଚନା କରିବା ସହ କିଛି ପ୍ରଶ୍ନର ଉତ୍ତର ଦାବି କରିଛନ୍ତି। ଅନ୍ୟପଟେ ବିଜେଡି ୨ୟ ଓ ୩ୟ ର଼୍ୟାଙ୍କ୍ର ନେତାଙ୍କ ପାଇଁ କଂଗ୍ରେସ ପ୍ରଭାରୀ ଚେଲ୍ଲାକୁମାର ସତର୍କବାଣୀ ଶୁଣାଇଛନ୍ତି।
ଚେଲ୍ଲାକୁମାର କହିଛନ୍ତି, ନବ ଦାସଙ୍କ ଭଳି ଅବସ୍ଥା ଅନ୍ୟ ନେତାମାନଙ୍କ କ୍ଷେତ୍ରରେ ହୋଇପାରେ। ଏବେ ନବ ତ କାଲି ଆଉ କିଏ। ମୁଖ୍ୟମନ୍ତ୍ରୀ ଚୌକିରେ ବସିବାକୁ ଆଶା ରଖିଥିବା ବ୍ୟକ୍ତିଙ୍କୁ ରାସ୍ତାରୁ ହଟାଇବାକୁ ବିଜେଡିର ୨ୟ ଓ ୩ୟ ର଼୍ୟାଙ୍କ୍ ନେତାଙ୍କ ଏହା ଚାଲ୍ ମଧ୍ୟ ହୋଇପାରେ। ବିଜେଡିରେ ବେଶି ପାଟି ଫିଟାଉଥିବା ନେତାଙ୍କ ପାଇଁ ଏହା ସତର୍କ ସୂଚନା। ଯେଉଁମାନେ ଦଳରେ ରହି ସତକୁ ସାମ୍ନାକୁ ଆଣିବା ପାଇଁ ସ୍ବର ଉତ୍ତୋଳନ କରୁଛନ୍ତି, ନବୀନ ଶାସନରେ ସେମାନଙ୍କ କଣ୍ଠକୁ ଦବାଇଦିଆଯାଉଛି ବୋଲି ଚେଲ୍ଲା କୁମାର କହିଛନ୍ତି। ସେ ଆହୁରି କହିଛନ୍ତି, ନବ ଦାସଙ୍କ ହତ୍ୟା ବେଳର ଭିଡିଓ ଦେଖିଛନ୍ତି।
ନବଙ୍କୁ ଜଣେ ଏଏସ୍ଆଇ ମାରିବା ଭଳି ଲାଗୁନି। ଅନେକ ସନ୍ଦେହ ରହୁଛି। ଏହା ଏକ ସୁଚିନ୍ତିତ ଷଡ଼ଯନ୍ତ୍ର। ମୁଖ୍ୟମନ୍ତ୍ରୀଙ୍କ କର୍ତ୍ତବ୍ୟ, ଉତ୍ତର ଦେବା କଥା। ପୋଲିସ ଓ କ୍ରାଇମବ୍ରାଞ୍ଚ ତଦନ୍ତ ପ୍ରକ୍ରିୟା ଉପରେ କାହାରି ମଧ୍ୟ ଭରସା ପାଉନାହିଁ। ପରୀ ଏବଂ ମମତା ମେହେର ଘଟଣାରେ ବିଜେଡି ସରକାର କ’ଣ କରିଛି ବୋଲି ସେ ପ୍ରଶ୍ନ କହିଛନ୍ତି। ରାଜ୍ୟରେ ବିଜେଡି ଗୁଣ୍ଡାରାଜ ଚଳାଇଛି ବୋଲି ସେ କହିଛନ୍ତି।
ବରିଷ୍ଠ ଭାଜପା ନେତା ବିଜୟ ମହାପାତ୍ର କହିଛନ୍ତି, ନବ ଦାସଙ୍କୁ ହତ୍ୟା ହେଉଛି ଏକ ଆରେଞ୍ଜ ମର୍ଡର। ଏହି ଘଟଣାର ସତ୍ୟାସତ୍ୟ କିପରି ନ ଆସୁ ସେ ଦିଗରେ ବେଶି ଉଦ୍ୟମ ହେଉଛି। ସମସ୍ତଙ୍କ ଆଗରେ ଘଟିଥିବା ଏତେ ବଡ଼ ଘଟଣା ପୋଲିସ ଯେମିତି ଗୁରୁତର ସହକାରେ ନେବା କଥା ନେଉନାହିଁ। ବହୁତ ଭଲ ଭଲ ପୋଲିସ ଅଫିସର ଅଛନ୍ତି ସେମାନଙ୍କୁ ତଦନ୍ତରେ ସାମିଲ କରାଯାଉ ନାହିଁ। କାଳେ ସେମାନଙ୍କୁ ସାମିଲ କଲେ ପ୍ରକୃତ ସତ୍ୟ ପଦାକୁ ଆସିଯିବ ସେଥିଲାଗି ଷଡ଼ଯନ୍ତ୍ର କରାଯାଉଛି ବୋଲି ସେ କହିଛନ୍ତି।
ଅନ୍ୟପଟେ ନବ ଦାସ ହତ୍ୟାକାଣ୍ଡକୁ ନେଇ ଭାଜପା ନେତା ପ୍ରଦୀପ ପୁରୋହିତ ରାଜ୍ୟ ସରକାରଙ୍କ ଉପରେ ପୁଣି ବର୍ଷିବା ସହ କହିଛନ୍ତି, ହତ୍ୟା ପଛରେ ବଡ଼ ରହସ୍ୟ ରହିଛି। ସେ ଆଗରୁ ମଧ୍ୟ କହିଛନ୍ତି ନବୀନଙ୍କ ଅବର୍ତ୍ତମାନରେ ଯେଉଁମାନେ କ୍ଷମତାରେ ରହିବାକୁ ଚାହୁଁଛନ୍ତି ସେମାନେ ଏହି ହତ୍ୟା କରିଛନ୍ତି। ତଦନ୍ତ କରୁଥିବା କ୍ରାଇମବ୍ରାଞ୍ଚର ଅଧିକାରୀ ହତ୍ୟା ପଛର ଷଡ଼ଯନ୍ତ୍ରକାରୀଙ୍କୁ ସୁରକ୍ଷା ଦେଉଥିବା ଭଳି ମନେହେଉଥିବା ନେଇ ପ୍ରଦୀପ ଅଭିଯୋଗ କରିଛନ୍ତି।
