ହାଟଡିହୀ/ଆନନ୍ଦପୁର/ବଞ୍ଚୋ, ୧୦।୬ (ଶୁଭକାନ୍ତ ନାୟକ/ସୁଶାନ୍ତ କୁମାର ସାହୁ/ ପ୍ରଦୋଷ ବିଶ୍ୱାଳ):‘ଅପରେଶନ ବୈତରଣୀ’ର ଧାରାବାହିକତା ଏବଂ କେନ୍ଦୁଝର ଜିଲା ପୋଲିସ ଅଧୀକ୍ଷକଙ୍କ ନିର୍ଦ୍ଦେଶକ୍ରମେ ଆନନ୍ଦପୁର ଉପଖଣ୍ଡ ପୋଲିସ ପକ୍ଷରୁ ବେଆଇନ ବାଲି ଖନନ ଓ ଅନୁମତିବିହୀନ ବାଲି ପରିବହନ ବିରୋଧରେ ସ୍ୱତନ୍ତ୍ର ଅଭିଯାନକୁ ଆହୁରି କଡ଼ାକଡ଼ି କରାଯାଇଛି। ଏହି ଅଭିଯାନ ଅନ୍ତର୍ଗତ ଗତ ୨୦ ମେ ୨୦୨୬ ଠାରୁ ୧୦ ଜୁନ ୨୦୨୬ ପର୍ଯ୍ୟନ୍ତ ଆନନ୍ଦପୁର ଉପଖଣ୍ଡ ଅଞ୍ଚଳର ବିଭିନ୍ନ ସମ୍ବେଦନଶୀଳ ସ୍ଥାନରେ ପୋଲିସ ବ୍ୟାପକ ଚଢ଼ାଉ ଓ କାର୍ଯ୍ୟାନୁଷ୍ଠାନ କରିଛି।
ଏହି ସମୟ ମଧ୍ୟରେ ବେଆଇନ ବାଲି ଉତ୍ତୋଳନ ଏବଂ ପରିବହନରେ ସମ୍ପୃକ୍ତ ୧୦ ଜଣଙ୍କୁ ଗିରଫ କରାଯାଇଥିବା ବେଳେ ଉପଖଣ୍ଡ ଅଧୀନ ବିଭିନ୍ନ ଥାନାରେ ୩୮ଟି ଅପରାଧିକ ମାମଲା ରୁଜୁ କରାଯାଇଛି ବୋଲି ଆନନ୍ଦପୁର ଏସଡିପିଓ କମଳ କୁମାର ପଣ୍ଡା ସୂଚନା ଦେଇଛନ୍ତି।
ଏସଡିପିଓ ପଣ୍ଡାଙ୍କ କହିବା ଅନୁଯାୟୀ, ଅଭିଯାନ ସମୟରେ ପୋଲିସ ବେଆଇନ ବାଲି ଖନନ ଓ ପରିବହନ କାର୍ଯ୍ୟରେ ବ୍ୟବହୃତ ୪ଟି ହାଇୱା, ୧ଟି ଜେସିବି, ୧ଟି ଖନନ ଯନ୍ତ୍ର ଏବଂ ୩୩ଟି ଟ୍ରାକ୍ଟର ଜବତ କରିଛି। ଜବତ ଯାନବାହନ ଓ ଯନ୍ତ୍ରପାତି ସମ୍ପର୍କରେ ଆଇନ ଅନୁଯାୟୀ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ସେ ଆହୁରି କହିଛନ୍ତି ଯେ, ପ୍ରାକୃତିକ ସମ୍ପଦର ସୁରକ୍ଷା, ବେଆଇନ ଖନନ କାର୍ଯ୍ୟକଳାପକୁ ରୋକିବା ଏବଂ ଖନନ ଓ ପରିବେଶ ସମ୍ପର୍କିତ ନିୟମାବଳୀର କଠୋର ପାଳନ ସୁନିଶ୍ଚିତ କରିବା ପାଇଁ ଏହି ସ୍ୱତନ୍ତ୍ର ଅଭିଯାନ ଆଗାମୀ ଦିନରେ ଅଧିକ ତୀବ୍ରତାର ସହ ଜାରି ରହିବ।
ଆନନ୍ଦପୁର ଉପଖଣ୍ଡ ପୋଲିସ ପକ୍ଷରୁ ସ୍ପଷ୍ଟ କରାଯାଇଛି ଯେ, ବେଆଇନ ଖନନ ଓ ପରିବହନ ଭଳି ଅବୈଧ କାର୍ଯ୍ୟରେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ ଭବିଷ୍ୟତରେ ମଧ୍ୟ କଠୋର ଆଇନଗତ ପଦକ୍ଷେପ ଗ୍ରହଣ କରାଯିବ।
