ରସୁଲପୁର,୨୩ା୧୨(ଡି.ଏନ.ଏ.):ରସୁଲପୁର ବ୍ଲକ ଅଧୀନ କୁଆଖିଆ ବାଜରର ପରିବା ହାଟ ଓ ବିଜୁ ଗ୍ରାମୀଣ ବଜାରର ବିଏସ୍ ଆଗ୍ରୋ ଡିଲର ପଏଣ୍ଟ୍ ସମ୍ମୁଖରେ ଏକ ବିଦ୍ୟୁତ୍ ଟ୍ରାନ୍ସଫର୍ମର ମୁକୁଳା ହୋଇ ପଡ଼ିଛି। ଏଭଳି ଏକ ଜନଗହଳିପୂର୍ଣ୍ଣ ସ୍ଥାନରେ ଟ୍ରାନ୍ସଫର୍ମର ମୁକୁଳା ପଡ଼ିବା ଘଟଣାକୁ ଟାଟା ପାୱାର ଅଣଦେଖା କରୁଛି। କୁଆଖିଆ ବିଦ୍ୟୁତ୍ ସେକ୍ସନର ନାକତଳେ ଏଭଳି ଘଟଣା ଦେଖିବାକୁ ମିଳୁଛି। ମାତ୍ର ବିଭାଗୀୟ ଅଧିକାରୀଙ୍କ ଉଦାସୀନତା ପଣିଆ ଯୋଗୁ ଏକ ନିଶ୍ଚିତ ବିପଦକୁ ଆମନ୍ତ୍ରଣ କରାଯାଉଛି। ଟ୍ରାନ୍ସଫର୍ମର ଚାରିପଟେ ବ୍ୟାରିକେଟ ଦେବାରେ ବିଭାଗୀୟ ଅଧିକାରୀ ଟାଳଟୁଳ ନୀତି ଅବଲମ୍ବନ କରୁଥିବା ଆଚରଣକୁ ସାଧାରଣରେ ନାପସନ୍ଦ କରାଯାଉଛି। ତେଣୁ ଶୀଘ୍ର ଏହାକୁ ଆବଦ୍ଧ କରିବାକୁ ଦାବି ହୋଇଛି।
ଜନ ଗହଳିପୂର୍ଣ୍ଣ ସ୍ଥାନରେ ପିଣ୍ଡି ଉପରେ ଥୁଆ ହୋଇଥିବା ଟ୍ରାନ୍ସଫର୍ମର ଚାରିପଟେ ଲୁହା ବାଡ଼ ବୁଲାଇବା ବିଧି ରହିଛି। ମାତ୍ର କୁଆଖିଆ ବାଜରର ପରିବାହାଟ ଓ ବିଜୁ ଗ୍ରାମୀଣ ବଜାର ଭଳି ଜନସମମାଗମ ସ୍ଥଳରେ ମାଟିଠାରୁ ୩ଫୁଟ ଉଚ୍ଚତାରେ ଟ୍ରାନ୍ସଫର୍ମର ସ୍ଥାପନ କରାଯାଇଛି। ଚଳତି ମାସ ୧୬ ତାରିଖରୁ ପରିବାହାଟ ନିକଟରେ ଲକ୍ଷ୍ମୀନାରାୟଣ ପୂଜା ଅନୁଷ୍ଠିତ ହେଉଛି। ଏହି ଅବସରରେ ହଜାରହଜାର ଭକ୍ତଙ୍କ ସମାଗମ ହେଉଛି। ଟ୍ରାନ୍ସଫର୍ମର ନିକଟରେ ଦୋଳି, ମନୋହରୀ ଦୋକାନ, ଭୋଗଦୋକାନ ଆଦି ଖୋଲା ଯାଇଛି। ସନ୍ଧ୍ୟାରେ ଆବାଳବୃଦ୍ଧ ବନିତା ଏହି ସ୍ଥାନରେ ଏକଜୁଟ ହୋଇ ଠାକୁରଙ୍କୁ ଦର୍ଶନ କରିବା ସହ ମନପସନ୍ଦର ସାମଗ୍ରୀ କିଣିବାକୁ ଭିଡ ଜମାଉଛନ୍ତି। ଏଭଳି ସ୍ଥିତିରେ ମୁକୁଳା ଟ୍ରାନ୍ସଫର୍ମର ସର୍ବସାଧାରଣ ସ୍ଥାନରେ ବିପଦକୁ ଆମନ୍ତ୍ରଣ କରିବା ଅପେକ୍ଷାରେ ରହିଛି। ତେଣୁ ଉକ୍ତ ସ୍ଥାନରେ ଲୁହାବାଡ଼ ତୁରନ୍ତ ବୁଲାଇ ଜନସାଧାରଣଙ୍କ ସୁରକ୍ଷାକୁ ନିଶ୍ଚିତ କରିବା ଉପରେ ବିଭାଗ ଗୁରୁତ୍ୱ ଦେବାକୁ ବ୍ୟବସାୟୀ, ସ୍ଥାନୀୟ ଜନସାଧାରଣ ଓ ଶ୍ରଦ୍ଧାଳୁ ଦାବି କରିଛନ୍ତି। ଏ ସମ୍ପର୍କରେ କୁଆଖିଆ ସେକ୍ସନର କନିଷ୍ଠ ଯନ୍ତ୍ରୀ ସେକ୍ ଇବ୍ରାଇଲ ଅଲ୍ଲୀଙ୍କୁ ପଚାରିବାରୁ ସେ କହିଛନ୍ତି, ଯାତ୍ରା ପାଇଁ ବାଡ଼ ନିର୍ମାଣ ହୋଇ ପାରିନାହିଁ। ଯାତ୍ରାପରେ ସ୍ଥାୟୀ ସୁରକ୍ଷାବାଡ଼ ନିର୍ମାଣ କରାଯିବ। ଏବେ ଲୋକଙ୍କ ସୁରକ୍ଷା ଦୃଷ୍ଟିରୁ ଏକ ଅସ୍ଥାୟୀ ସୁରକ୍ଷା ବାଡ଼ ସ୍ଥାପନ କରାଯିବ। ତେବେ ବିଭାଗ ପକ୍ଷରୁ ଏହି ଅସୁରକ୍ଷିତ ଟ୍ରାନ୍ସଫର୍ମର ଚାରିକଡ଼େ ଅସ୍ଥାୟୀ ଓ ସ୍ଥାୟୀବାଡ଼ କେବେ ଲାଗୁଛି ତାକୁ ଦେଖିବାକୁ ଅପେକ୍ଷା ରହିଛି।
