ଭୁବନେଶ୍ୱର,୨୬।୯: ବାଳକାଟୀସ୍ଥିତ ସାଇ ସବୁରି ହେଲ୍ଥ ସାଇନ୍ସ କଲେଜ ପରିସରରେ ବିଶ୍ୱ ଫାର୍ମାସିଷ୍ଟ ଦିବସ ପାଳିତ ହୋଇଯାଇଛି। ଅନୁଷ୍ଠାନର ଅଧ୍ୟକ୍ଷ ଡା. ସାରଦା ମିଶ୍ର ଓ ଅଧ୍ୟାପକମାନେ ଯୋଗଦେଇ ଛାତ୍ରୀଛାତ୍ରଙ୍କୁ ରୋଗୀ ସେବା କ୍ଷେତ୍ରରେ ଫାର୍ମାସିଷ୍ଟଙ୍କ ଭୂମିକା ବାବଦରେ ବିସ୍ତୃତ ଆଲୋକପାତ କରିଥିଲେ।
ଡା. ମିଶ୍ର କହିଥିଲେ, ହସ୍ପିଟାଲରେ ସବୁଠାରୁ ବଡ ଦାୟିତ୍ୱ ଫାର୍ମାସିଷ୍ଟଙ୍କୁ ତୁଲାଇବାକୁ ପଡିଥାଏ। ବିଶେଷ କରି ବହିର୍ବିଭାଗ ରୋଗୀ ପାଇଁ ଔଷଧ ଚୟନ, ଡୋଜ ପ୍ରସ୍ତୁତ କରିବା, ଷ୍ଟୋର ପରିଚାଳନା, ଔଷଧ ବ୍ୟବହାର ଲାଗି ରୁଟ ବାଛିବା, ପାର୍ଶ୍ୱ ପ୍ରତିକ୍ରିୟା ଉପରେ ସମ୍ପୂର୍ଣ୍ଣ ନଜର ରଖିବା ଆଦି ଅନେକ କାମ ଫାର୍ମାସିଷ୍ଟମାନଙ୍କୁ କରିବାକୁ ପଡିଥାଏ । ସେହିପରି ଇନ ପେସେଣ୍ଟଙ୍କ ପାଇଁ ସର୍ଜରି ଏବଂ ନିଶ୍ଚେତକ ପରିଚାଳନା ବେଳେ ଡାକ୍ତରଙ୍କୁ ପୂର୍ଣ୍ଣ ସହଯୋଗ କରିବା, ରୋଗୀଙ୍କ ଶଯ୍ୟା ନିକଟରେ ଠିକ ମେଡିସିନ ପହଞ୍ଚାଇବା, ଅମ୍ଳଜାନ ଗ୍ୟାସ ତିଆରି ଓ ମହଜୁଦ ରଖିବା ଏବଂ ଡିସଚାର୍ଜ ସମୟରେ ରୋଗୀ ଓ ସମ୍ପର୍କୀୟଙ୍କୁ ଔଷଧ ବ୍ୟବହାର ବାବଦରେ ଭଲ ଭାବେ ବୁଝାଇବା ଭଳି ଅତି ଗୁରୁତ୍ୱପୂର୍ଣ୍ଣ କାମ ଫାର୍ମାସିଷ୍ଟମାନେ କରିଥାନ୍ତି।
ସବୁଠାରୁ ଗୁରୁତ୍ୱର ବିଷୟ ହେଲା କିଡ୍ନୀ, ଯକ୍ଷ୍ମା, ଲିଭର ଆଦି ରୋଗୀଙ୍କୁ ଡାକ୍ତର ପ୍ରେସକ୍ରିପସନରେ ଅନେକ ମେଡିସିନ ଲେଖିଥାନ୍ତି । ଉକ୍ତ ରୋଗୀମାନଙ୍କୁ ଔଷଧର ଠିକ ବ୍ୟବହାର ପାଇଁ ଫାର୍ମାସିଷ୍ଟଙ୍କ ସହଯୋଗ ବିଶେଷ ମହତ୍ତ୍ୱ ରଖିଥାଏ । ଏହା ବ୍ୟତୀତ ଗୁଣ ଚିହ୍ନେ ଗୁଣିଆ ପରିକା ଜଣେ ଫାର୍ମାସିଷ୍ଟ ଲେଭଲ ଦେଖି ସହଜରେ ଅସଲି ଓ ନକଲି ଔଷଧ ଚିହ୍ନିପାରେ। ଉକ୍ତ ଉତ୍ସବରେ କଲେଜର ବିଭିନ୍ନ ବିଭାଗର ଛାତ୍ରୀଛାତ୍ର ଅଂଶଗ୍ରହଣ କରିଥିଲେ ।
