ଭୁବନେଶ୍ୱର, ୨୦।୫: ଜୁନ୍ ୧୨ରେ କଟକର ବାରବାଟୀ ଷ୍ଟାଡିୟମରେ ଭାରତ- ଦକ୍ଷିଣ ଆଫ୍ରିକା ଟି୨୦ ଅନ୍ତର୍ଜାତୀୟ କ୍ରିକେଟ ମ୍ୟାଚ ଖେଳାଯିବ। ଏଥିଲାଗି ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ପକ୍ଷରୁ ପ୍ରସ୍ତୁତିକୁ ଜୋରଦାର କରାଯାଇଛି। ତେବେ ମ୍ୟାଚ୍ ଲାଗି ଜୁନ୍ ୧ରୁ ଅନ୍ଲାଇନ ଟିକେଟ ବିକ୍ରି ପାଇଁ ବ୍ୟବସ୍ଥା କରାଯାଉଛି।
ଜୁନ୍ ୧୦ ତାରିଖରେ ଦୁଇ ଦଳ ପହଞ୍ଚିବେ ଏବଂ ୧୩ ତାରିଖରେ ପ୍ରସ୍ଥାନ କରିବେ। ୧ ନମ୍ବର ଗ୍ୟାଲେରି ଟିକେଟ ମୂଲ୍ୟ ୯୦୦, ୨ ଓ ୪ ନମ୍ବର ୭୦୦, ୭ ନମ୍ବର ୬୦୦, ୬ ନମ୍ବର (ପ୍ଲେୟର୍ସ କନ୍ସେଶନ) ୩୦୦, ସ୍ପେଶାଲ ଏନ୍କ୍ଲୋଜର ୫୦୦୦, ଏସି ବକ୍ସ ୭୦୦୦, ନିୟୁ ପ୍ୟାଭିଲିୟନ ୮୦୦୦ ଓ କର୍ପୋରେଟ ବକ୍ସ ଟିକେଟର ମୂଲ୍ୟ ୧୨,୦୦୦ ଟଙ୍କା ରଖାଯାଇଛି। ଅନ୍ଲାଇନ ପାଇଁ ୫୦୦୦ ଟିକେଟ ଉପଲବ୍ଧ ହେବ। ଅନ୍ଲାଇନ ଟିକେଟ ରିଡେମ୍ପଶନ ୯, ୧୦, ୧୧ ଓ ୧୨ ତାରିଖରେ କରାଯିବା ସମ୍ଭାବନା ରହିଛି। କ୍ୟାମ୍ବ୍ରିଜ ସ୍କୁଲ ଓ ଖ୍ରୀଷ୍ଟ କଲିଜିଏଟ ସ୍କୁଲରେ ଏଥିପାଇଁ ୩ଟି ଲେଖାଏ କାଉଣ୍ଟର ଉପଲବ୍ଧ ହେବ। ୯, ୧୦ ଓ ୧୧ ତାରିଖରେ ସକାଳ ୧୦ଟାରୁ ଅପରାହ୍ନ ୪ଟା ଏବଂ ୧୨ ତାରିଖରେ ସକାଳ ୭ଟାରୁ ଅପରାହ୍ନ ୩ଟା ମଧ୍ୟରେ ଟିକେଟ ରିଡେମ୍ପଶନ ହେବ। ମ୍ୟାଚ ପାଇଁ ଦର୍ଶକଙ୍କ ଲାଗି ଅପରାହ୍ନ ୩ଟାରୁ ଗେଟ୍ ଖୋଲା ରହିବ। ଷ୍ଟାଡିୟମ ପରିସର ସମ୍ପୂର୍ଣ୍ଣ ଭାବରେ ସିସିଟିଭି କ୍ୟାମେରା ନଜରରେ ରହିବ ବୋଲି ଓସିଏ ପକ୍ଷରୁ କୁହାଯାଇଛି।
