ନୂଆଦିଲ୍ଲୀ, ୧୩ା୭ (ପି.ଟି.)-କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ଜୁଲାଇ ୧୪ରେ ଦେଶର ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର କ୍ରୀଡ଼ାମନ୍ତ୍ରୀମାନଙ୍କର ଏକ ବୈଠକ ଡକାଇଛନ୍ତି। ଅନ୍ଲାଇନ୍ରେ ଦୁଇ ଦିନ ଧରି ହେବାକୁଥିବା ଏହି ବୈଠକରେ କୋଭିଡ୍-୧୯ ଲକ୍ଡାଉନ୍ ସମୟରେ କ୍ରୀଡ଼ା କାର୍ଯ୍ୟକଳାପ କିପରି ପୁନଃ ଆରମ୍ଭ ହୋଇପାରିବ ତାହା ଉପରେ ଆଲୋଚନା ହେବ। ବ୍ଲକ ଓ ଜିଲାସ୍ତରରେ ଉଦୀୟମାନ ପ୍ରତିଭାଙ୍କୁ କିପରି ଚିହ୍ନଟ କରାଯାଇ ପାରିବ ତାହାର ସୂତ୍ର ମଧ୍ୟ ବାହାର କରାଯିବ। ଦେଶରେ ବର୍ତ୍ତମାନ ଦ୍ୱିତୀୟ ପର୍ଯ୍ୟାୟ ଅନ୍ଲକ୍ ଚାଲିଛି। ଏହି ସମୟ ମଧ୍ୟରେ କ୍ରୀଡ଼ା ଓ ଯୁବ ସମ୍ପର୍କିତ କାର୍ଯ୍ୟକଳାପକୁ କିପରି ଆଗେଇ ନେବାକୁ ହେବ ସେ ନେଇ ରାଜ୍ୟଗୁଡ଼ିକ ସହ ଆଲୋଚନା ଗୁରୁତ୍ୱପୂର୍ଣ୍ଣ ବୋଲି ରିଜିଜୁ ପ୍ରକାଶ କରିଛନ୍ତି। ଆଥଲେଟିକ୍ସ ଏବଂ ଓ୍ବେଟ୍ଲିଫ୍ଟିଂର ଜାତୀୟ କ୍ୟାମ୍ପ ଇତିମଧ୍ୟରେ ଆରମ୍ଭ ହୋଇଛି। ଆଗାମୀ ଦୁଇ ସପ୍ତାହ ମଧ୍ୟରେ କଡ଼ା ସ୍ବାସ୍ଥ୍ୟ ସୁରକ୍ଷା ଗାଇଡ୍ ଲାଇନ୍ ଅନୁସାରେ ବକ୍ସରମାନଙ୍କ ତାଲିମ ଆରମ୍ଭ ହେବ। କରୋନା ମହାମାରୀ ଯୋଗୁ ସମଗ୍ର ଦେଶରେ ଲକ୍ଡାଉନ୍ ଲାଗୁ କରାଯିବାରୁ ମାର୍ଚ୍ଚ ମଧ୍ୟ ଭାଗରେ ସମସ୍ତ କ୍ୟାମ୍ପ ସସ୍ପେଣ୍ଡ କରାଯାଇଥିଲା। କରୋନାରେ ସଂକ୍ରମିତ ହୋଇ ସମଗ୍ର ଦେଶରେ ଇତିମଧ୍ୟରେ ୨୨,୦୦୦ରୁ ଊର୍ଦ୍ଧ୍ୱ ଲୋକ ମୃତ୍ୟୁ ବରଣ କରିସାରିଲେଣି। ରିଜିଜୁ ସମଗ୍ର ଦେଶରେ ୭୫ ଲକ୍ଷ ସ୍ବେଚ୍ଛାସେବୀଙ୍କର ଉଚ୍ଚ ପ୍ରଶଂସା କରିଛନ୍ତି, ଯେଉଁମାନେ କରୋନା ମହାମାରୀ ବିରୋଧରେ ଚାଲିଥିବା ଲଢେଇରେ ସ୍ଥାନୀୟ ପ୍ରଶାସନକୁ ସହାୟତା କରୁଛନ୍ତି। ଆମ ନେହେରୁ ଯୁବ କେନ୍ଦ୍ର ସଂଗଠନ (ଏନ୍ଓ୍ବାଇକେଏସ) ଓ ନ୍ୟାଶନାଲ ସର୍ଭିସ ସ୍କିମ୍ (ଏନ୍ଏସ୍ଏସ୍) ସ୍ବେଚ୍ଛାକର୍ମୀମାନେ ସୁରକ୍ଷା ଓ ସ୍ବାସ୍ଥ୍ୟ ଗାଇଡ୍ଲାଇନ୍ ନେଇ ସଚେତନତା ସୃଷ୍ଟିକରିବା ସହ ମାସ୍କ ବଣ୍ଟନ ଏବଂ ବରିଷ୍ଠ ନାଗରିକମାନଙ୍କୁ ସହାୟତା କରୁଛନ୍ତି।
