ଭୁବନେଶ୍ୱର,୨୯।୪(ଅନୁରାଧା ମହାରଣା): ପିଆଜ ରପ୍ତାନି ଉପରେ କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ରପ୍ତାନି ଉପରେ ନିଷେଧାଦେଶ ସତ୍ତ୍ୱେ ୬ ଦେଶକୁ ୯୯,୧୫୦ ମେଟ୍ରିକ୍ ଟନ୍ ପିଆଜ ରପ୍ତାନି ପାଇଁ ସରକାର ଅନୁମୋଦନ ଦେଇଛନ୍ତି। ଏହି ୬ ଦେଶ ମଧ୍ୟରେ ବାଂଲାଦେଶ, ୟୁଏଇ, ଭୁଟାନ, ବାହାରିନ୍, ମରିସସ୍ ଏବଂ ଶ୍ରୀଲଙ୍କା ରହିଥିବା ଖାଉଟି କଲ୍ୟାଣ, ଖାଦ୍ୟ ଏବଂ ଯୋଗାଣ ମନ୍ତ୍ରଣାଳୟ ପକ୍ଷରୁ ଏକ ସରକାରୀ ବିବୃତି ପ୍ରକାଶ ପାଇଛି। ପଶ୍ଚିମ ଏସିଆ ଏବଂ କେତେକ ୟୁରୋପୀୟ ଦେଶର ରପ୍ତାନି ବଜାର ପାଇଁ ୨,୦୦୦ ଟନ୍ ସ୍ବତନ୍ତ୍ର ଭାବେ ଧଳା ପିଆଜ ରପ୍ତାନିକୁ ମଧ୍ୟ କେନ୍ଦ୍ର ଅନୁମୋଦନ କରିଛି। ସୂଚନା ଥାଉ କି, କେନ୍ଦ୍ର ସରକାର ୨୦୨୩ ଡିସେମ୍ବର ୮ରେ ପିଆଜ ରପ୍ତାନି ଉପରେ କଟକଣା ଲଗାଇଥିଲେ। ଗତ ବର୍ଷ ତୁଳନାରେ ୨୦୨୩-୨୪ରେ କମ୍ ଖରିଫ ଏବଂ ରବି ଉତ୍ପାଦନର ପୂର୍ବାନୁମାନକରି ପର୍ଯ୍ୟାପ୍ତ ଘରୋଇ ଉପଲବ୍ଧତା ନିଶ୍ଚିତ କରିବାକୁ ରପ୍ତାନି ଉପରେ କଟକଣା ଲଗାଯାଇଛି। ତେବେ ଏହି ୬ ଦେଶକୁ ପିଆଜ ରପ୍ତାନି କରୁଥିବା ସଂସ୍ଥା ନ୍ୟାଶନାଲ କୋ-ଅପରେଟିଭ ଏକ୍ସପୋର୍ଟ ଲିମିଟେଡ୍ (ଏନ୍ସିଇଏଲ୍), ଇ-ପ୍ଲାଟ୍ଫର୍ମ ମାଧ୍ୟମରେ ରପ୍ତାନି ପାଇଁ ଘରୋଇ ପିଆଜ କ୍ରୟ କରିଛି। ଦେଶର ବୃହତ୍ତମ ପିଆଜ ଉତ୍ପାଦକ ଭାବରେ ମହାରାଷ୍ଟ୍ର ରପ୍ତାନି ପାଇଁ ଏନ୍ସିଏଲ୍ ଦ୍ୱାରା କିଣାଯାଇଥିବା ପିଆଜର ପ୍ରମୁଖ ଯୋଗାଣକାରୀ ପାଲଟିଛି। ବିଭାଗ ପିଏସ୍ଏଫ୍ ଅଧୀନରେ ରବି-୨୦୨୪ରୁ ଚଳିତ ବର୍ଷ ୫ ଲକ୍ଷ ଟନ୍ ପିଆଜ କ୍ରୟ ଲକ୍ଷ୍ୟଧାର୍ଯ୍ୟ କରାଯାଇଛି। କେନ୍ଦ୍ରୀୟ ଏଜେନ୍ସି ଏନ୍ସିସିଏଫ୍ ଏବଂ ନାଫେଡ୍ ପିଆଜ କ୍ରୟ କରିବା ପାଇଁ କୃଷକମାନଙ୍କର କ୍ରୟ, ସଂରକ୍ଷଣ ଏବଂ ପଞ୍ଜୀକରଣକୁ ସମର୍ଥନ କରିବା ପାଇଁ ଏଫ୍ପିଓ, ଏଫ୍ପିସି, ପିଏସି ଭଳି ସ୍ଥାନୀୟ ଏଜେନ୍ସି ସହ ଯୋଡ଼ିହୋଇଛି। ଡିଓସିଏ, ଏନ୍ସିସିଏଫ୍ ଏବଂ ନାଫେଡ୍ର ଏକ ଉଚ୍ଚସ୍ତରୀୟ ଦଳ ଏପ୍ରିଲ ୧୧-୧୩ ମଧ୍ୟରେ ମହାରାଷ୍ଟ୍ରର ନାସିକ ଏବଂ ଅହମ୍ମଦନଗର ପରିଦର୍ଶନକରି ପିଏସ୍ଏଫ୍ ପାଇଁ ୫ ଏଲ୍ଏମ୍ଟି ପିଆଜ କ୍ରୟ ସମ୍ପର୍କରେ ସୂଚିତ କରିଥିଲେ। ପିଆଜର ସଂରକ୍ଷଣ କ୍ଷେତ୍ରରେ କ୍ଷତି ହ୍ରାସ ପାଇଁ ବୈଷୟିକ ସହାୟତା ସହ ବିଭାଗ ଗତ ବର୍ଷ ୧୨୦୦ ଏମ୍ଟିରୁ ବିକିରଣ ଏବଂ ଶୀତଳ ଭଣ୍ଡାର ଷ୍ଟକ୍କୁ ଚଳିତ ବର୍ଷ ୫୦୦୦ ଏମ୍ଟିକୁ ବୃଦ୍ଧି ପାଇଁ ଲକ୍ଷ୍ୟ ରଖିଛି। ଗତ ବର୍ଷ ଆରମ୍ଭ ହୋଇଥିବା ପିଆଜର ବିକିରଣ ଏବଂ ଶୀତଳ ଭଣ୍ଡାରର ପରୀକ୍ଷାମୂଳକ ପ୍ରକଳ୍ପର ଫଳାଫଳ ଅନୁଯାୟୀ, ସଂରକ୍ଷଣ ସମୟରେ କ୍ଷତି ୧୦ ପ୍ରତିଶତରୁ ମଧ୍ୟ କମ୍ ହୋଇଯାଇଛି।
