ନ୍ୟୁୟର୍କ,୨୧ା୯: ବିଶ୍ୱରେ ଖାଦ୍ୟ ସଙ୍କଟ ଉଦ୍ବେଗଜନକ ଭାବେ ବୃଦ୍ଧି ପାଇଛି। ଖାଦ୍ୟ ଅଭାବରୁ ପ୍ରତି ୪ ସେକେଣ୍ଡରେ ଜଣଙ୍କର ମୃତ୍ୟୁ ଘଟୁଛି। ଏ ନେଇ ୨୦୦ରୁ ଊର୍ଦ୍ଧ୍ୱ ଏନ୍ଜିଓ ମଙ୍ଗଳବାର ଚେତାବନୀ ଦେବା ସହ କ୍ଷୁଧା ଦୂର କରିବା ପାଇଁ ଅନ୍ତର୍ଜାତୀୟ ସ୍ତରରେ ପଦକ୍ଷେପ ନେବାକୁ ହେବ ବୋଲି କହିଛନ୍ତି। ଏ ନେଇ ନ୍ୟୁୟର୍କରେ ଆୟୋଜିତ ଜାତିସଂଘ ସାଧାରଣ ସଭା (ୟୁଏନ୍ଜିଏ)ରେ ଏକତ୍ରିତ ହୋଇଥିବା ବିଶ୍ୱନେତାମାନଙ୍କୁ ଏକ ଖୋଲା ଚିଠି ଲେଖାଯାଇଛି। ଏଥିରେ ଅକ୍ସଫାମ୍, ସେଭ୍ ଦ ଚିଲ୍ଡ୍ରେନ୍ ଆଣ୍ଡ୍ ପ୍ଲାନ୍ ଇଣ୍ଟରନ୍ୟାଶନାଲ ସମେତ ୭୫ରୁ ଊର୍ଦ୍ଧ୍ୱ ଦେଶର ୨୩୮ ସଂସ୍ଥା କ୍ଷୁଧା ବୃଦ୍ଧି ଅତ୍ୟନ୍ତ ଚିନ୍ତାଜନକ ବୋଲି କହିଛନ୍ତି।
କୁହାଯାଇଛି, ସମ୍ପ୍ରତି ବିଶ୍ୱର ୩୪ କୋଟି ୫୦ ଲକ୍ଷରୁ ଊର୍ଦ୍ଧ୍ୱ ଲୋକ ଭୟଙ୍କର କ୍ଷୁଧାର ସାମ୍ନା କରୁଛନ୍ତି। ୨୦୧୯ ତୁଳନାରେ ଏହି ସଂଖ୍ୟା ଦ୍ୱିଗୁଣିତ ହେଉଛି। ଏକବିଂଶ ଶତାବ୍ଦୀରେ ଭୋକଜନିତ ଅକାଳ ମୃତ୍ୟୁ ରୋକିବା ପାଇଁ ବିଶ୍ୱ ନେତାମାନେ ପ୍ରତିଶ୍ରୁତି ଦେଇଥିଲେ ହେଁ ତାହା ବିଫଳ ହୋଇଛି। ସୋମାଲିଆରେ କ୍ଷୁଧାମୃତ୍ୟୁ ଅନିୟନ୍ତ୍ରିତ ହୋଇଛି। ୪୫ ଦେଶରେ ପ୍ରାୟ ୫ କୋଟି ଲୋକ ଖାଦ୍ୟାଭାବରୁ ମୃତ୍ୟୁର ଦ୍ୱାରଦେଶରେ। ପ୍ରତିଦିନ ଭୋକରେ ଅନୂ୍ୟନ ୧୯,୭୦୦ ଲୋକଙ୍କ ଜୀବନ ଯାଉଛି। ସେହି ହିସାବରେ ପ୍ରତି ୪ ସେକେଣ୍ଡରେ ଜଣଙ୍କ ମୃତ୍ୟୁ ଘଟୁଥିବା ଏନ୍ଜିଓଗୁଡ଼ିକ କହିଛନ୍ତି। କୃଷି ଏବଂ ଫସଲ ଅମଳ ପାଇଁ ଅତ୍ୟାଧୁନିକ ଜ୍ଞାନକୌଶଳ ଉପଲବ୍ଧ ହେବା ସତ୍ତ୍ୱେ ଏକବିଂଶ ଶତାବ୍ଦୀରେ ଭୋକ ଓ ଅକାଳ ମୃତ୍ୟୁ ପ୍ରସଙ୍ଗରେ ଆଲୋଚନା ହେବା ଦୁର୍ଭାଗ୍ୟଜନକ ବୋଲି ୟେମେନ୍ ଫ୍ୟାମିଲି କେୟାର ଆସୋସିଏଶନ ପକ୍ଷରୁ ଉକ୍ତ ଚିଠିରେ କୁହାଯାଇଛି। ଆଉ ଅପେକ୍ଷା ନ କରି କ୍ଷୁଧା ସମସ୍ୟାର ଦୀର୍ଘକାଳୀନ ସମାଧାନ ପାଇଁ ରାସ୍ତା ବାହାର କରିବା ସହ ପିଲାଙ୍କ ଭବିଷ୍ୟତ ରକ୍ଷା କରାଯିବା ଦିଗରେ ପଦକ୍ଷେପ ନିଆଯିବା ଅତ୍ୟନ୍ତ ଜରୁରୀ ହୋଇପଡ଼ିଛି ଉକ୍ତ ଏନ୍ଜିଓ କହିଛି।
ଜାତିସଂଘର ବିଶ୍ୱ ଖାଦ୍ୟ ପ୍ରୋଗ୍ରାମର ନିର୍ଦ୍ଦେଶକ ଡେଭିଡ୍ ବେସ୍ଲି ମଧ୍ୟ ବୈଶ୍ୱିକ ଖାଦ୍ୟ ସଙ୍କଟକୁ ନେଇ ଚେତାବନୀ ଦେଇଥିଲେ। କ୍ଷୁଧା କବଳରେ ଛଟପଟ ହେଉଥିବା ୩୪ କୋଟି ୫୦ ଲକ୍ଷ ଲୋକଙ୍କ ମଧ୍ୟରୁ ୭୦% କେବଳ ୟୁକ୍ରେନ୍ ଯୁଦ୍ଧର ଭୟାବହ ପରିଣାମ ଭୋଗୁଛନ୍ତି ବୋଲି ସେ କହିଥିଲେ। ଏଥିସହ କରୋନା ମହାମାରୀ ମଧ୍ୟ ଖାଦ୍ୟସଙ୍କଟ ବୃଦ୍ଧିର ଅନ୍ୟତମ ପ୍ରମୁଖ କାରଣ ବୋଲ ସେ ଦର୍ଶାଇଥିଲେ।
