ମୁମ୍ବାଇ, ୧୮।୮: ଭାରତୀୟ କ୍ରିକେଟ୍ ଦଳର ସବୁଠାରୁ ସଫଳ ଅଧିନାୟକ ବିବେଚିତ ହୋଇଥିବା ମହେନ୍ଦ୍ର ସିଂ ଧୋନୀ ଅଗଷ୍ଟ ୧୫ରେ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ଗ୍ରହଣ କରିଛନ୍ତି। ୩୯ ବର୍ଷୀୟ ଧୋନୀଙ୍କ ନେତୃତ୍ୱରେ ଭାରତ ୨ଟି ବିଶ୍ୱକପ୍ ଓ ୨୦୧୩ ଆଇସିସି ଚାମ୍ପିୟନ୍ସ ଟ୍ରଫିରେ ଚାମ୍ପିୟନ ହୋଇଥିଲା। ଶ୍ରୀଲଙ୍କା ବିପକ୍ଷ ୨୦୧୧ ବିଶ୍ୱକପ୍ ଫାଇନାଲରେ ଧୋନୀ ଛକା ମାରି ଦଳକୁ ବିଶ୍ୱ ବିଜେତା କରାଇଥିଲେ। ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ମାରିଥିବା ଏହି ଛକା ଧୋନୀଙ୍କ ୧୬ ବର୍ଷର ଅନ୍ତର୍ଜାତୀୟ କ୍ୟାରିୟରରେ ସବୁଠାରୁ ପ୍ରସିଦ୍ଧ ଶଟ୍ ଥିଲା। ଲଙ୍ଗ୍ ଅନ୍ ଉପରେ ଧୋନୀ ଏହି ଛକାଟି ମାରି ଭାରତକୁ ୨ୟଥର ଲାଗି ଦିନିକିଆ ବିଶ୍ୱକପ୍ ଭେଟି ଦେଇଥିଲେ। ଏବେ ଧୋନୀ ଅନ୍ତର୍ଜାତୀୟ କ୍ରିକେଟ୍ରୁ ଅଲ୍ବିଦା ଘୋଷଣା କରିସାରିଥିବାରୁ ତାଙ୍କୁ ସମ୍ମାନଜଣାଇ ଓ୍ବାଙ୍ଖଡେ ଷ୍ଟାଡିୟମର ଗୋଟିଏ ସିଟ୍ର ତାଙ୍କରି ନାମରେ ନାମିତ କରାଯିବ ବୋଲି ଜଣାପଡ଼ିଛି। ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ମୁମ୍ବାଇ କ୍ରିକେଟ୍ ଆସୋସିଏଶନ (ଏମ୍ସିଏ)ର ଆପେକ୍ସ କାଉନସିଲ ସଦସ୍ୟ ଅଜିଙ୍କ୍ୟ ନାୟକ ଏକ ପ୍ରସ୍ତାବ ଆଣିଛନ୍ତି। ଭାରତୀୟ କ୍ରିକେଟ୍କୁ ଧୋନୀଙ୍କ ଅତୁଳନୀୟ ଅବଦାନ ଲାଗି ତାଙ୍କ ସମ୍ମାନାର୍ଥେ ଓ୍ବାଙ୍ଖଡେ ଷ୍ଟାଡିୟମର ଏକ ସିଟ୍ ସ୍ଥାୟୀରୂପେ ତାଙ୍କରି ନାମରେ ନାମିତ କରାଯାଇ ପାରିବ। ୨୦୧୧ ବିଶ୍ୱକପ୍ ଫାଇନାଲରେ ନୁଆନ୍ କୁଲଶେଖରାଙ୍କୁ ଧୋନୀ ଛକା ମାରି ଜିତାଇଥିଲେ। ସେହି ଛକାଟି ଯେଉଁ ସିଟ୍ରେ ପଡ଼ିଥିଲା ତାହା ଧୋନୀଙ୍କ ନାମରେ ନାମିତ କରାଯାଉ ବୋଲି ଅଜିଙ୍କ୍ୟ ଏମ୍ସିଏକୁ ଚିଠି ଲେଖି ପ୍ରସ୍ତାବ ଦେଇଛନ୍ତି। ଏମ୍ସିଏର ପରବର୍ତ୍ତୀ ବୈଠକରେ ଏନେଇ ନିଷ୍ପତ୍ତି ନିଆଯିବ ବୋଲି ଜଣାପଡ଼ିଛି।
