ରାଜକନିକା,୨୨ା୧୨(ସଞ୍ଜୟ କୁମାର ଦାଶ): କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ କୃଷି ବିଭାଗ ଆକଳନ ଅନୁଯାୟୀ ଚଳିତ ଖରିଫ ଋତୁରେ ପ୍ରାୟ ୧୪ହଜାର ହେକ୍ଟର ଜମିରେ ଧାନ ଚାଷ ହୋଇଥିଲା । ଚାଷୀର ଫସଲ ବଞ୍ଚିବା ପାଇଁ ଯେତେବେଳେ ବର୍ଷାର ନିତ୍ୟାନ୍ତ ପ୍ରୟୋଜନ ଥିଲା, ସେତେବେଳେ ଚାଷୀଙ୍କ ସହ ଲୁଚକାଳି ଖେଳିଥିଲା । ଫଳରେ ବର୍ଷାକୁ ଚାହିଁ ଚାଷୀର ଚାଷ ବିଳମ୍ବ ହୋଇଥିଲା । ହେଲେ ଏବେ ଅମଳ ସମୟରେ ଚାଷୀର ବର୍ଷାର ଆଦୌ ପ୍ରୟୋଜନ ନ ଥିବା ବେଳେ, ଦାଉ ସାଧିଛି ଅଦିନିଆ ବର୍ଷା ା ଧାନ ଉଜୁଡିବା ଭୟ ଚାଷୀଙ୍କୁ ଘାରିଲା । ସଙ୍କଟରେ ଧାନ ଚାଷୀ । ଶୁକ୍ରବାର ଠାରୁ ଶନିବାର ଦିନ ତମାମ କୋହଲା ପାଗ ସାଙ୍ଗକୁ ଝିପଝିପ ବର୍ଷା ଚାଷୀ ଆଖିରୁ ନିଦ ହଜାଇ ଦେଇଛି । ଆଗରୁ ଅମଳ କରିଥିବା କିଛି ଚାଷୀ ଏବେ ତା’ର ସୁନାର ଫସଲକୁ ଅମଳ କରି ଖଳା, ରାସ୍ତା କଡ ବା ନିଜ ଛାତ ଉପରେ ଘୋଡାଇ ରଖିଛି । ହେଲେ, ଲଗାଣ ଝିପି ଝିପ ବର୍ଷାରେ ସାଧାରଣ ପାଣିପାଲ କେତେଦୂର ଅମଳ ଧାନକୁ ସୁରକ୍ଷା ଦେବ ସେହି ଚିନ୍ତାରେ ଚାଷୀ ।
ପଛରେ ଚାଷ କରିଥିବା କେତେଜଣ ଚାଷୀ ଏବେ ଅମଳ କରିଥିଲେ । କଟାଯାଇଥିବା ଧାନ ଗଛଗୁଡିକ ବିଲରେ ପଡିଛି । ସେହି ଧାନଗୁଡିକ ଗଜା ହୋଇଯିବା ଆଶଙ୍କା ରହିଛି । ଚଳିତ ବର୍ଷ ଭଳି ଫସଲ ହୋଇଥିବା ଦେଖି ଚାଷୀ ଖୁସି ହେଉଥିଲା । ଭାବିଥିଲା ଚାଷ ପାଇଁ ହୋଇଥିବା ସମସ୍ତ ଋଣ ପରିଶୋଧ କରି ପରିବାର ପ୍ରତିପୋଷଣ ପାଇଁ ବର୍ଷକର ଦାନା ଗଚ୍ଛିତ ରଖିବ । ହେଲେ, ଲଘୁଚାପ ଜନିତ ଅଦିନିଆ ବର୍ଷା ଚାଷୀଙ୍କୁ ନିରାଶା କରିଛି । ଯେଉଁ ପରି ଭାବେ ଦୁଇଦିନ ଧରି ବର୍ଷା ଲାଗିରହିଛି, ତାହା ଏମିତି ଆଉ ଦିନେ କି ଦୁଇଦିନ ଲାଗିରୁହେ ତେବେ ଚାଷୀ ମୁଣ୍ଡରେ ଚଡ଼କ ପଡିବ । ଧାନ ବିକ୍ରୀ କରି ଋଣ ଶୁଝିବା ହଉ କି ବର୍ଷକ ପାଇଁ ଦାନା ସଞ୍ଚୟ କରିବା ସବୁ ସ୍ବପ୍ନ ତା’ର ସପ୍ନରେ ରହିଯିବ । ସରକାର ଧାନର ସହାୟକ ମୂଲ୍ୟ କୁଇଣ୍ଟାଲ ପ୍ରତି ୨୧୮୩ ରୁ ଇନ୍ପୁଟ ରିହାତି କୁଣ୍ଟାଲ ପ୍ରତି ୮ଶହ ଟଙ୍କା ସହ ୩୧ଶହ ଟଙ୍କାକୁ ବୃଦ୍ଧି କରିଛନ୍ତି । ଧାନ ଭଲ ହେବାକୁ ସରକାରଙ୍କ ସହଯୋଗ ଚାଷୀଙ୍କ ମନରେ ଆଶା ସଞ୍ଚାର କରିଥିବା ବେଳେ ନିରାଶ କରିଛି ଅଦିନିଆ ବର୍ଷା । ଚଳିତ ଥର ସରକାର ଏଫଏକ୍ୟୁ ମାନର ଧାନ ଦେବାପାଇଁ ବ୍ୟାପକ ସଚେତନତା ସୃଷ୍ଟି କରିଛନ୍ତି । କିନ୍ତୁ ଏପରି ପରିସ୍ଥିତିରେ ଏହି ମାନର ଧାନ ସଂଗ୍ରହରେ ବାଧା ସୃଷ୍ଟି ହେବାର ଆଶଙ୍କା ଉପୁଜି ପାରେ ବୋଲି ଚାଷୀ ଆଶଙ୍କା କରିଛି ।
