ନୂଆଦିଲ୍ଲୀ: ସମ୍ପ୍ରତି ୟୁଟ୍ୟୁବ୍ ରୋଜଗାରର ଏକ ମାଧ୍ୟମ ପାଲଟିଯାଇଛି। ସେଥିପାଇଁ ଅଧିକାଂଶ ଯୁବପିଢ଼ିଙ୍କ ମଧ୍ୟରେ ୟୁଟ୍ୟୁବର ହେବା ପାଇଁ କ୍ରେଜ୍ ବୃଦ୍ଧି ପାଇବାରେ ଲାଗିଛି। କିନ୍ତୁ ବେଳେବେଳେ ଅନ୍ଲାଇନ ପ୍ଲାଟ୍ଫର୍ମଗୁଡ଼ିକ ଜରିଆରେ ପରିଶ୍ରମ ଅନୁଯାୟୀ ଫଳ ମିଳି ନ ଥାଏ। ଫଳରେ ୟୁଟ୍ୟୁବର ଭାବେ ସଫଳ ହେବାକୁ ଚାହୁଁଥିବା ବ୍ୟକ୍ତିମାନଙ୍କୁ ହତୋତ୍ସାହିତ ହେବାକୁ ପଡ଼ିଥାଏ। ନିକଟରେ ଏଭଳି ଏକ ମାମଲା ସାମ୍ନାକୁ ଆସିଛି, ଯେଉଁଥିରେ ଫୁଡ୍ ବ୍ଲଗର ନଲିନୀ ଉନାଗର ନିଜ
ୟୁଟ୍ୟୁବ ଚ୍ୟାନେଲ ‘ନଲିନିଜ୍ କିଚେନ୍’ ପାଇଁ ୮ ଲକ୍ଷ ଟଙ୍କା ଖର୍ଚ୍ଚ କରିଥିବା ସତ୍ତ୍ୱେ ମଧ୍ୟ ଅସଫଳ ହୋଇଛନ୍ତି।
ଜଣେ ସଫଳ ଫୁଡ୍ ବ୍ଲଗର ହେବା ପାଇଁ ନଲିନୀ ଗତ ୩ ବର୍ଷରେ ୮ ଲକ୍ଷ ଟଙ୍କା ଖର୍ଚ୍ଚ କରିଥିଲେ। ସେ ଏହାରି ମଧ୍ୟରେ ୨୫୦ଟି ଭିଡିଓ ଅପଲୋଡ୍ କରିଥିବା ବେଳେ ତାଙ୍କର ପ୍ରାୟ ୨୫୦୦ ସବ୍ସ୍କ୍ରାଇବର୍ସ ଥିଲେ। ଏତେ ଟଙ୍କା ଖର୍ଚ୍ଚ କରି ମଧ୍ୟ ୟୁଟ୍ୟୁବ୍ରେ ବିଶେଷ ସଫଳତା ମିଳୁ ନ ଥିବାରୁ ସେ ନିରାଶ ହୋଇଥିଲେ। ଶେଷରେ ନଲିନୀ ୟୁଟ୍ୟୁବ୍ ଛାଡ଼ିବା ପାଇଁ ନିଷ୍ପତ୍ତି ନେଇଥିଲେ। ସେ ତାଙ୍କର ସମସ୍ତ ରୋଷେଇ ଉପକରଣ ଓ ଷ୍ଟୁଡିଓ ସାମଗ୍ରୀଗୁଡ଼ିକୁ ବିକ୍ରି କରିବେ ବୋଲି ମଧ୍ୟ କହିଛନ୍ତି। ନଲିନୀ କହିଛନ୍ତି, ୟୁଟ୍ୟୁବ୍ ପରି ଅନ୍ଲାଇନ୍ ପ୍ଲାଟ୍ଫର୍ମଗୁଡ଼ିକୁ ଭାଗ୍ୟର ସହଯୋଗ ମଧ୍ୟ ଦରକାର କରିଥାଏ। ଆୟର ପ୍ରାଥମିକ ଉତ୍ସ ଭାବରେ ସୋସିଆଲ ମିଡିଆ ପ୍ଲାଟ୍ଫର୍ମଗୁଡ଼ିକ ଉପରେ ନିର୍ଭରଶୀଳ ରହିବା ଉଚିତ ନୁହେଁ। ୟୁଟ୍ୟୁବର ଭାବେ ଆଉ ଭିଡିଓ କରିବେ ନାହିଁ ବୋଲି ନଲିନୀ କରିଥିବା ପୋଷ୍ଟ ସମ୍ପ୍ରତି ଏକ୍ସ’ରେ ଭାଇରାଲ ହେବାରେ ଲାଗିଛି ଏବଂ ତାଙ୍କୁ ନେଇ ଚର୍ଚ୍ଚା ଜାରି ରହିଛି।
