ନୂଆଦିଲ୍ଲୀ,୧୫।୬: ନ୍ୟାଶନାଲ ହେରାଲ୍ଡ ମନିଲଣ୍ଡରିଂ ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀ ତୃତୀୟ ଦିନ ଲାଗି ଆଜି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ରେ ହାଜର ହେବେ। ମଙ୍ଗଳବାର ୯ ଘଣ୍ଟାର ପଚରାଉଚରା ପରେ ପୁଣି ଥରେ ବୁଧବାର ପଚରାଉଚରା କରାଯିବ। ସେହିପରି ସୋମବାର ମଧ୍ୟ ରାହୁଲଙ୍କୁ ୧୦ ଘଣ୍ଟା ଜେରା କରାଯାଇଥିଲା। ଜେରା କରିବା ପରେ ମଧ୍ୟ ଉତ୍ତରରେ ସନ୍ତୁଷ୍ଟ ନ ହେବାରୁ ପୁଣି ଥରେ ଜେରା ଲାଗି ହାଜର ହେବାକୁ ସମନ କରାଯାଇଛି।
ରାହୁଲ ମଙ୍ଗଳବାର ୧୧ଟା ୫ରେ ଭଉଣୀ ତଥା ଏଆଇସିସି ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସହ ଏପିଜେ ଅବଦୁଲ କଲାମ ରୋଡ୍ ସ୍ଥିତ ଇଡି ମୁଖ୍ୟାଳୟରେ ପହଞ୍ଚିଥିଲେ। ପୂର୍ବାହ୍ନ ୧୧ଟା ୩୦ରୁ ୪ ଘଣ୍ଟା ଜେରା କରାଯାଇଥିଲା। ଜେରା ପରେ ତାଙ୍କୁ ମଧ୍ୟାହ୍ନ ଭୋଜନ ପାଇଁ ଛଡ଼ାଯାଇଥିଲା। ତା’ପରେ ପୁଣି ୪ଟା ୩୦ରୁ ଜେରା ଆରମ୍ଭ ହୋଇଥିଲା।
