ଓ୍ବାଶିଂଟନ,୧।୯: ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ଜୋର ଦେଇ କହିଥିଲେ ଯେ ଭେନେଜୁଏଲା ସହିତ ତାଙ୍କର ତୈଳ ଚୁକ୍ତି ଯୋଗୁ ଗ୍ୟାସ ମୂଲ୍ୟରେ ଦ୍ରୁତ ହ୍ରାସ ଘଟିବ, ଯଦିଓ ସେ ସ୍ବୀକାର କରିଛନ୍ତି ଯେ ଏଥିପାଇଁ ସମୟସୀମା ଅନିଶ୍ଚିତ ରହିଛି।
ଓଭାଲ ଅଫିସରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ରାଷ୍ଟ୍ରପତି ସ୍ବୀକାର କରିଛନ୍ତି ଯେ ଭେନେଜୁଏଲା ସହିତ ନୂତନ ତୈଳ ଚୁକ୍ତିର ପ୍ରଭାବ ଗ୍ୟାସ ମୂଲ୍ୟରେ ପ୍ରତିଫଳିତ ହେବା ପାଇଁ ‘କିଛି ସମୟ’ ଲାଗିପାରେ। ସେ ପୂର୍ବରୁ କହିଥିଲେ ଯେ ଏହି ଚୁକ୍ତି ଫଳରେ ଆମେରିକୀୟମାନଙ୍କ ପାଇଁ ମୂଲ୍ୟ ହ୍ରାସ ପାଇବ; ଇରାନ ସହିତ ସଂଘର୍ଷ ଯୋଗୁ ତୈଳ ମୂଲ୍ୟ ବୃଦ୍ଧି ପାଉଥିବାବେଳେ ଏହି ଚୁକ୍ତିନାମା ଆସିଛି।
‘ମୂଲ୍ୟ ଶେଷରେ ହ୍ରାସ ପାଇବ,’ ବୋଲି ସେ ସୋମବାର ଓଭାଲ ଅଫିସରେ ସାମ୍ବାଦିକମାନଙ୍କୁ କହିଥିଲେ। ‘ଏବେ, ନିର୍ବାଚନ ପୂର୍ବରୁ ଏହା ଘଟିବ କି ବୋଲି ପ୍ରଶ୍ନ ପଚରାଯିବାରୁ ସେ କହିଥିଲେ, ମୁଁ କହିପାରିବି ନାହିଁ।’
ବିଶ୍ଳେଷକମାନେ ପ୍ରଭାବ ଦେଖିବାକୁ ବର୍ଷ ବର୍ଷ ଲାଗିପାରେ ବୋଲି ମତ ଦିଅନ୍ତି, ଟ୍ରମ୍ପ କହିଥିଲେ ଯେ ଏହା ଶୀଘ୍ର ଘଟିବ। ‘ଯଦି ଏହା ଦୁଇ ବର୍ଷ ଲାଗିବ, ତେବେ ଆପଣ ଜାଣନ୍ତି, ଏହା ବହୁତ କମ ସମୟ,’ ଏମିତି ମନ୍ତବ୍ୟ ଦେଇଥିଲେ ଟ୍ରମ୍ପ।
ଭେନେଜୁଏଲାର ଡେଲସି ରୋଡ୍ରିଗେୱଜ ସରକାର କହିଛନ୍ତି ଯେ ଏହି ଐତିହାସିକ ଚୁକ୍ତିନାମାରେ 17 ଟି ତୈଳ କ୍ଷେତ୍ରର ବିକାଶ ସାମିଲ ଅଛି, ଯାହା 65 ବିଲିୟନ ବ୍ୟାରେଲ ତେଲର ମିଳିତ ପ୍ରମାଣିତ କ୍ଷମତା ଧାରଣ କରେ। ଏହି ଚୁକ୍ତି ଦ୍ୱାରା ଭେନେଜୁଏଲାର ତୈଳ ଶିଳ୍ପରେ ପ୍ରାୟ ୧୦୦ ବିଲିୟନ ଡଲାର ମୂଲ୍ୟର ବିପୁଳ ନିବେଶ ହେବ ବୋଲି ଆଶା କରାଯାଉଛି।
ଦେଶରେ ପେଟ୍ରୋଲ ଏବଂ ଡିଜେଲର ବୃଦ୍ଧି ପାଉଥିବା ମୂଲ୍ୟକୁ ନିୟନ୍ତ୍ରଣ କରିବା ପାଇଁ ପ୍ରବଳ ଚାପ ମଧ୍ୟରେ ଟ୍ରମ୍ପ ଏହି ଚୁକ୍ତି କରିଛନ୍ତି। ଇରାନ ସହିତ ଚାଲିଥିବା ବିବାଦ ହର୍ମୁଜ ପ୍ରଣାଳୀ ଦେଇ ଯାଉଥିବା ତୈଳ ଯୋଗାଣକୁ ଗୁରୁତର ଭାବରେ ବାଧା ଦେଇଛି, ଯାହା ପୂର୍ବରୁ ବିଶ୍ୱର ପ୍ରାୟ ୨୦ ପ୍ରତିଶତ ପେଟ୍ରୋଲିୟମକୁ ପରିଚାଳନା କରୁଥିଲା।
