ଭଦ୍ରକ ଅଫିସ,୨୪।୧୦:ଦୀପାବଳି ଆସିଲେ ମନେପଡ଼େ ଭଦ୍ରକ ଜିଲା ସଦର ବ୍ଲକର କୁମ୍ଭକାରଙ୍କ ଗଁା ଓଗାଳପୁର। ଗଁାରେ ବସବାସ କରୁଥିବା ସମସ୍ତେ କୁମ୍ଭକାର ପରିବାର। ମାଟିରେ ହାଣ୍ଡି, କଳସୀ ଦୀପ ସମେତ ବିଭିନ୍ନ କୁମ୍ଭ ପାତ୍ର ତିଆରି କରିବାରେ ଲାଗି ପଡ଼ିଥାନ୍ତି ପିଲାଛୁଆଙ୍କ ସହିତ ମହିଳା ଓ ପୁରୁଷମାନେ। ଛୋଟ ପିଲାମାନେ ମାଟି ତିଆରି ଜିନିଷକୁ ଖରାରେ ଶୁଖାଇବା ସହ ମା’ ବାପାଙ୍କୁ କାମରେ ସହଯୋଗ କରିଥାନ୍ତି। ପୁରୁଷମାନେ ଛୋଟ ବଡ଼ ଦୀପ କୁମ୍ଭାର ଚକିରେ ତିଆରି କରିଥାନ୍ତି। କେବଳ ବର୍ଷା ଋତୁକୁ ବାଦ୍ ଦେଇ ଅନ୍ୟ ସବୁ ସମୟରେ ଚକ ଘୂରୁଥାଏ। ଭଦ୍ରକ ସହରରେ ଦୀପାବଳି ଓ କାଳୀପୂଜା ଖୁବ୍ ଧୁମ୍ଧାମ୍ରେ ପାଳିତ ହେଉଥିବାରୁ ମାଟି ଦୀପର ଚାହିଦା ମେଣ୍ଟାଇବା ପାଇଁ ଏହି ଗଁାର ୩୦ରୁ ଊର୍ଦ୍ଧ୍ୱ ପରିବାର ଦୀପ ତିଆରି କାମରେ ଲାଗିପଡ଼ିଥିଲେ। ଗତ ଦୁଇବର୍ଷ ଧରି କରୋନା କଟକଣା ପାଇଁ କୌଣସି ପୂଜା ପାର୍ବଣ ଧୁମ୍ଧାମ୍ରେ ପାଳନ ହୋଇପାରୁ ନ ଥିଲା। ଏବର୍ଷ କଟକଣା ହଟିବା ପରେ ଭଲ ବ୍ୟବସାୟ ନେଇ ସେମାନେ ଆଶା ବାନ୍ଧିଛନ୍ତି।
ଗଁାର ଭରତ ସାହୁ କହନ୍ତି, ଦିନତମାମ କାମ କଲେ ପ୍ରାୟ ୭୦୦ ଦୀପ ତିଆରି ହୋଇଥାଏ। ବଡ଼ ଦୀପଗୁଡ଼ିକୁ ଶହେକୁ ହଜାରେ ଟଙ୍କା ଓ ଛୋଟ ଦୀପ ୫ଶହ ଟଙ୍କା ପର୍ଯ୍ୟନ୍ତ ବିକ୍ରି ହୁଏ। ଏହି ବେଉସାରେ ଭଲ ରୋଜଗାର ହେଉ ନ ଥିଲେ ବି କାମ ନ ଥିବାରୁ କୌଳିକ ବୃତ୍ତିକୁ ଆପଣାଇବାକୁ ପଡୁଛି। ଦୀପାବଳିକୁ ଲକ୍ଷ୍ୟ କରି ଦୁଇମାସ ଆଗରୁ ଦୀପ ତିଆରି ଆରମ୍ଭ କରନ୍ତି। ଦୀପାବଳି ଆସିଲେ ସହରର ହୋଲ୍ସେଲରମାନେ ଏହି ଗଁାରୁ ଦୀପ କିଣିଥାନ୍ତି। ଏବେ ଛଣ ଓ କାଠ ଅଭାବରୁ ମାଟି ସାମଗ୍ରୀକୁ ପୋଡ଼ିବା ପାଇଁ ଜାଳେଣି ଅଭାବ ମୁଖ୍ୟ ସମସ୍ୟା ହେଉଛି।
ସେହିପରି ଶତ୍ରୁଘ୍ନ ସାହୁ କହନ୍ତି, ଗଁା ସାରା କୁମ୍ଭକାର ହୋଇଥିଲେ ମଧ୍ୟ ସରକାରୀ ସ୍ତରରେ କୌଣସି ପ୍ରୋତ୍ସାହନ ମିଳିନାହିଁ। ଅତ୍ୟାଧୁନିକ ଜ୍ଞାନ କୌଶଳ ସମ୍ପର୍କିତ ତାଲିମ କିମ୍ବା ଛାଡ଼ ବ୍ୟବସ୍ଥା ଥିବା ଋଣ ଯୋଜନା ଆମେ ପାଇପାରୁ ନାହୁଁ। ବର୍ତ୍ତମାନ ଆଧୁନିକତାର ପ୍ରଭାବ ଥିଲେ ମଧ୍ୟ ମାଟି ଦୀପର ଚାହିଦା ସ୍ବତନ୍ତ୍ର ରହିଛି। ଅନ୍ୟ ରାଜ୍ୟରେ ଚକଗୁଡ଼ିକ ମଟର ସାହାଯ୍ୟରେ ଚଲାଯାଉଥିବା ବେଳେ ଆମକୁ ହାତରେ ଘୂରାଇବାକୁ ପଡ଼ୁଛି। ସରକାରୀ ସ୍ତରରେ ଅତ୍ୟାଧୁନିକ ଜ୍ଞାନ କୌଶଳ ତାଲିମ ଦିଆଯାଇ ମଟର ଲଗା ଚକି ବ୍ୟବସ୍ଥା କରାଗଲେ ରୋଜଗାର ବଢ଼ିପାରନ୍ତା ବୋଲି ସେ କହିଛନ୍ତି।
