ଗୁଣପୁର,୨୧ା୩(ପ୍ରଦୀପ କୁମାର ପାଢ଼ୀ): କୋରାପୁଟ ଲୋକ ସଭା ସହ ଗୁଣପୁର ବିଧାନସଭା ନିର୍ବାଚନ ମେ’ ୧୩ ତାରିଖରେ ଅନୁଷ୍ଠିତ ହେବ। ନିର୍ବାଚନ ତାରିଖ ଘୋଷଣା ପରେ ବିଭିନ୍ନ ରାଜନୈତିକ ଦଳ ପକ୍ଷରୁ ତତ୍ପରତା ପ୍ରକାଶ ପାଇଛି। ବିଭିନ୍ନ ଦଳ ପକ୍ଷରୁ ମେଣ୍ଟ ନେଇ ଚର୍ଚ୍ଚା ଆଲୋଚନା ଆରମ୍ଭ ହୋଇଛ। ଇଣ୍ଡିଆ ମେଣ୍ଟରେ ବାମଦଳ ରହିଥିବା ବେଳେ ଓଡ଼ିଶାରେ ମଧ୍ୟ ଏହି ଦଳ କଂଗ୍ରେସ ସହ ମିଶି ନିର୍ବାଚନ ଲଢ଼ିବା ପାଇଁ ମନସ୍ଥ କରିଛି। ଏହି କ୍ରମରେ ସିପିଆଇ(ଏମ୍ଏଲ୍) ଲିବରେଶନ ପକ୍ଷରୁ ରାୟଗଡ଼ା ଜିଲାର ଗୁଣପୁର ଏବଂ ପୁରୀ ବିଧାନସଭା ନିର୍ବାଚନମଣ୍ଡଳୀରେ ଇଣ୍ଡିଆ ମେଣ୍ଟ ପକ୍ଷରୁ ପ୍ରାର୍ଥୀ ଦେବାକୁ ଦାବି ରଖାଯାଇଥିବା ସିପିଆଇ(ଏମ୍ଏଲ୍) ଜିଲା ସମ୍ପାଦକ ତ୍ରିପତି ଗମାଙ୍ଗ ପ୍ରକାଶ କରିଛନ୍ତି। ଯଦି ଓଡ଼ିଶାରେ କଂଗ୍ରେସ ସହ ସିପିଆଇ(ଏମ୍ଏଲ୍)ର ମେଣ୍ଟ ହୁଏ ଏବଂ ଗୁଣପୁର ବିଧାନସଭା ନିର୍ବାଚନମଣ୍ଡଳୀ ସିପିଆଇ(ଏମ୍ଏଲ୍) ପକ୍ଷକୁ ଯାଏ ତେବେ କଂଗ୍ରେସର ଆଶାୟୀ ପ୍ରାର୍ଥୀ କ’ଣ କରିବେ ତାକୁ ନେଇ ଉଠିଛି ପ୍ରଶ୍ନ।
ଏକଦା ଏହି ଅଞ୍ଚଳ କଂଗ୍ରେସର ଗଡ଼ ଥିଲା। ୧୯୯୦ରେ ଜନତା ଦଳ କଂଗ୍ରେସ ଗଡ଼ ଭାଙ୍ଗିବାରେ ସଫଳ ହୋଇଥିଲା। ଏହାପରେ ୧୯୯୫, ୨୦୦୪ରେ କଂଗ୍ରେସ ବିଧାନସଭା ନିର୍ବାଚନରେ ବିଜୟୀ ହୋଇଥିଲା। ଅନ୍ୟ ସମସ୍ତ ନିର୍ବାଚନରେ ବିଜେଡି ବିଜୟୀ ହୋଇଛି ଏବଂ କଂଗ୍ରେସ ଦ୍ବିତୀୟ ସ୍ଥାନରେ ରହିଛି। ଏପରି ରାଜନୈତିକ ଘଟଣା କ୍ରମ ମଧ୍ୟରେ ୨୦୨୪ର ସାଧାରଣ ନିର୍ବାଚନ ହେବାକୁ ଯାଉଛି। ସିପିଆଇ(ଏମ୍ଏଲ୍) ବର୍ଷର ଅନେକ ସମୟରେ ବିଭିନ୍ନ ପ୍ରକାର କାର୍ଯ୍ୟକ୍ରମ କରି ନିଜ ସ୍ଥିତି ସୁଦୃଢ଼ ରଖିଛି। ତେଣୁ ମେଣ୍ଟ ହେଲେ ଏହି ଆସନ ପାଇଁ ସିପିଆଇ(ଏମ୍ଏଲ୍) ପ୍ରାର୍ଥୀ ଦେବାକୁ ଦାବି କରାଯାଉଥିବା ତ୍ରିପତି ଗମାଙ୍ଗ କହିଛନ୍ତି। ଯଦି ସେପରି ନ ହୁଏ ତେବେ ଏଠାରେ କଂଗ୍ରେସକୁ ବିରୋଧ କରି ବିଧାୟକ ଏବଂ ଏମ୍ପି ପ୍ରାର୍ଥୀ ଦିଆଯିବ ବୋଲି ସେ କହିଛନ୍ତି। ଅନ୍ୟପଟେ ଓଡ଼ିଶାରେ ମେଣ୍ଟ ନେଇ କୌଣସି ଆଲୋଚନା ହୋଇ ନ ଥିବା କଂଗ୍ରେସ ରାଜ୍ୟ ସାଧାରଣ ସମ୍ପାଦକ ଦୁର୍ଗା ପ୍ରସାଦ ପଣ୍ଡା ଏବଂ ଜିଲା ସଭାପତି ବିଜୟ କୁମାର ଗମାଙ୍ଗ ତାଙ୍କ ପ୍ରତିକ୍ରିୟାରେ କହିଛନ୍ତି । ଉଭୟ ଦଳର ଏପରି ମତ ପରେ ଆଗାମୀ ଦିନରେ ମେଣ୍ଟ ନେଇ କ’ଣ ଘଟୁଛି ତା’ ଉପରେ ଏବେ ସମସ୍ତଙ୍କ ନଜର।
