ଭୁବନେଶ୍ୱର, ୨୪।୧୦ (ବ୍ୟୁରୋ):ଅର୍ଥ ଅଭାବରୁ ନିଜର ଚିକିତ୍ସା କରାଇ ପାରୁ ନ ଥିଲେ କିଶୋର। ମନୋବଳ ହରାଇ ଦେଇଥିଲେ। ଏହି ସମୟରେ ସହାୟତାର ହାତ ବଢାଇଲା ଓଡ଼ିଶା ମୋ ପରିବାର ଏବଂ କିଶୋରଙ୍କୁ ମିଳିଲା ବଞ୍ଚିବାର ରାହା। ଭୁବନେଶରସ୍ଥିତ ମଞ୍ଚେଶ୍ୱର ନିକଟବର୍ତ୍ତୀ ଝରଣା ବସ୍ତିରେ ନିଜ ପରିବାର ସହ ରୁହନ୍ତି କିଶୋର ବେହେରା। ୨୦୧୯ ଜୁଲାଇ ୪ରେ ସେ ଏକ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଗୋଡ଼ରେ ଗଭୀର ଆଘାତ ଲାଗିବାରୁ ସେ ଆଉ ଚାଲି ପାରିଲେ ନାହିଁ। ଦୈନନ୍ଦିନ କାମ କରିବା ପାଇଁ ନାନା ଅସୁବିଧାର ସମ୍ମୁଖୀନ ହେଲେ। ଅର୍ଥାଭାବ ସହିତ ତାଙ୍କର ଲୋକବଳ ବି ନ ଥିଲା। ସେଥିପାଇଁ କିଶୋର ହସ୍ପିଟାଲ ଯାଇ ଆବଶ୍ୟକ ଚିକିତ୍ସିତ ହୋଇପାରି ନ ଥିଲେ। ଗଣମାଧ୍ୟମରୁ ତାଙ୍କ ସଂଘର୍ଷମୟ କାହାଣୀ ସମ୍ପର୍କରେ ଓଡ଼ିଶା ମୋ ପରିବାର ଯୁଗ୍ମ ସମ୍ପାଦକ ରୁଦ୍ର ନାରାୟଣ ସାମନ୍ତରାୟ ଜାଣିବା ପରେ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ କୁମାର ରାଉତଙ୍କ ସହିତ ଆଲୋଚନା କରିଥିଲେ। ସଙ୍ଗଠନର ଟିମ୍ ତାଙ୍କ ଘରେ ପହଞ୍ଚି କିଶୋରଙ୍କୁ କ୍ୟାପିଟାଲ ହସ୍ପିଟାଲ ପଠାଇବାର ବ୍ୟବସ୍ଥା କରିଥିଲେ। ଏଥିସହ କିଶୋରଙ୍କ ଫିଜିଓଥେରାପି ଚିକିତ୍ସା ପାଇଁ ଓଡ଼ିଶା ମୋ ପରିବାର ଟିମ୍ କ୍ୟାପିଟାଲ ହସ୍ପିଟାଲ ପରିସରରେ ଥିବା ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ସହିତ ଆଲୋଚନା କରି ବ୍ୟବସ୍ଥା କରିଛନ୍ତି। ଆଗକୁ ସେ କିପରି ଯିବା ଆସିବା କରିବେ ସେଥିପାଇଁ ତାଙ୍କୁ ଯାତାୟାତ ସହାୟତା ଯୋଗାଇ ଦେବାର ଲକ୍ଷ୍ୟ ରଖାଯାଇଥିବା ସଙ୍ଗଠନ ପକ୍ଷରୁ ସୂଚନା ଦିଆଯାଇଛି।
