ଭୁବନେଶ୍ବର,୧୪।୧୨: ଏବେ ରାଜ୍ୟର ଘରେ ଘରେ ଆଉ ଗଳି କନ୍ଦିରେ ଚର୍ଚ୍ଚା ବିଧାୟକଙ୍କ ଦରମା ବୃଦ୍ଧି। ଓଡିଶା ଭଳି ଗରିବ ରାଜ୍ୟର ବିଧାୟକ ମାନେ ଭାରତରେ ସର୍ବାଧିକ ଦରମା ଭତ୍ତାକୁ ବୃଦ୍ଧି କରି ₹୩,୪୫,୦୦୦ ଟଙ୍କା ନେଉଥିବା ସାଧାରଣ ଲୋକମାନେ ହଜମ କରିପାରି ନାହାନ୍ତି। ଚା ଖଟି ହେଉ କିମ୍ବା ସୋସିଆଲ ମିଡିଆ ସବୁଠି ଏହାକୁ ନେଇ ବିରୋଧାଭାସ ଦେଖିବାକୁ ମିଳୁଛି। ଏଭଳି ସ୍ଥିତିରେ ସରକାରୀ ଏବଂ ବିରୋଧୀ ବିଧାୟକଙ୍କ ମଧ୍ୟରେ ଆରୋପ ପ୍ରତ୍ୟାରୋପ ସହିତ ରାଜନୈତିକ ବୟାନବାଜି ଦେଖିବାକୁ ମିଳୁଛି।
ବିଧାନସଭାରେ ଏହି ବିଲ ପାରିତ ହେଉଥିବା ବେଳେ କମ୍ୟୁନିଷ୍ଟ ପାର୍ଟିର ଏକମାତ୍ର ବିଧାୟକ ଲକ୍ଷ୍ମଣ ମୁଣ୍ଡା ଏହାକୁ ବିରୋଧ କରିଥିଲେ। ବର୍ତ୍ତମାନ ଦରମା ବୃଦ୍ଧିକୁ ନେଇ ସରକାରୀ ଏବଂ ବିରୋଧୀ ବିଧାୟକ ଦ୍ବନ୍ଦରେ ପଡିଥିବା ବେଳେ ଅନେକ ଏହି ବର୍ଦ୍ଧିତ ଦରମାକୁ ନ ନେବାକୁ ଏବଂ କିଛି ଏହାକୁ ଗରିବ ଲୋକଙ୍କୁ ଦାନ କରିବାକୁ କହିଛନ୍ତି। ଏହାରି ମଧ୍ୟରେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ପ୍ରତ୍ୟାଖ୍ୟାନ କରିବା ପରେ ରାଜ୍ୟ ରାଜନୀତିରେ ଝଡ଼ ସୃଷ୍ଟି ହୋଇଛି। ବର୍ଦ୍ଧିତ ଦରମା ଗ୍ରହଣ ନକରିବାକୁ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ଭାଜପା ଓ କଂଗ୍ରେସ ଉଭୟ ତାଙ୍କ ଉପରେ ଜୋରଦାର ଆକ୍ରମଣ କରିଛନ୍ତି। ଉଭୟ ଦଳ ଅଭିଯୋଗ କରିଛନ୍ତି ଯେ ନବୀନ ପଟ୍ଟନାୟକ ଉପଯୁକ୍ତ ଫୋରମରେ ଆପତ୍ତି ଉଠାଇବା ପରିବର୍ତ୍ତେ ‘ରାଜନୈତିକ ଡ୍ରାମା’ କରୁଛନ୍ତି।
ବରିଷ୍ଠ BJP ନେତା ଜୟନାରାୟଣ ମିଶ୍ର କହିଛନ୍ତି ଯେ ୨୪ ବର୍ଷ ଧରି କ୍ଷମତାରେ ଥିବା ଜଣେ ସମ୍ପତ୍ତିଶାଳୀ ନେତା ଭାବେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ସମୟରେ ଏପରି ନିଷ୍ପତ୍ତି ନେଇ ପାରିଥାନ୍ତେ। ସେ ବିଜୁ ପଟ୍ଟନାୟକଙ୍କ ଏକ ଟଙ୍କା ଦରମା ପ୍ରଥାକୁ ମନେ ପକାଇ ପ୍ରଶ୍ନ କରିଛନ୍ତି, “ଏହା କେବଳ ଏକ ଡ୍ରାମା – ରାଜନୈତିକ ନାଟକ।” ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ ମଧ୍ୟ ପ୍ରଶ୍ନ କରିଛନ୍ତି ଯେ ଆଲୋଚନା ସମୟରେ ପୂର୍ବତନ ମୁଖ୍ୟମନ୍ତ୍ରୀ କାହିଁକି ବିଧାନସଭା ବିତର୍କରେ ଭାଗ ନେଲେ ନାହିଁ କିମ୍ବା ଆପତ୍ତି ଉଠାଇଲେ ନାହିଁ।
କଂଗ୍ରେସ ମଧ୍ୟ ସମାନ ଦୃଶ୍ୟ ପ୍ରକାଶ କରିଛି। କଂଗ୍ରେସ ବିଧାୟକ ପବିତ୍ର ସାଉଁଟା କହିଛନ୍ତି, “ଦରମା ବୃଦ୍ଧି ବିଲ୍ ଗୃହରେ ଉପସ୍ଥାପିତ ହେବା ବେଳେ ବିଜେଡିର ମୁଖ୍ୟ ସଚେତକଙ୍କ ସମେତ ସଦସ୍ୟମାନେ ଉପସ୍ଥିତ ଥିଲେ ଏବଂ ଏହାକୁ ସମ୍ପୂର୍ଣ୍ଣ ସମର୍ଥନ କରିଥିଲେ। ବର୍ତ୍ତମାନ ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଏକ ରାଜନୈତିକ ଷ୍ଟଣ୍ଟ କରିବାକୁ ଚାହୁଁଛନ୍ତି।” କଂଗ୍ରେସ ନବୀନଙ୍କୁ ଏହି ‘ନାଟକ’ ବନ୍ଦ କରି ସରକାରଙ୍କ ନିଷ୍ପତ୍ତିକୁ ଗ୍ରହଣ କରିବାକୁ ଆହ୍ୱାନ ଦେଇଛି।
ଏହା ମଧ୍ୟରେ କେନ୍ଦ୍ରାପଡ଼ା ବିଜେଡି ବିଧାୟକ ଗଣେଶ୍ୱର ବେହେରା ଦରମା ବୃଦ୍ଧିକୁ ସମର୍ଥନ କରିଛନ୍ତି। ସେ କହିଛନ୍ତି, “ପୂର୍ବତନ ମୁଖ୍ୟମନ୍ତ୍ରୀ ଦଳୀୟ ବିଧାୟକମାନଙ୍କୁ ସେମାନଙ୍କ ଦରମା ଛାଡ଼ କରିବାକୁ କହିନାହାଁନ୍ତି। ଦ୍ୱିତୀୟରେ, ଦଳ ଦରମା ବୃଦ୍ଧି ଦାବି କରିଥିଲା ଏବଂ ଗୃହରେ ବିଲ୍କୁ ସମର୍ଥନ କରିଥିଲା। ତେଣୁ, ଏପରି ନିଷ୍ପତ୍ତିକୁ ବିରୋଧ କରିବାର ପ୍ରଶ୍ନ ଉଠୁନାହିଁ।”
ତେବେ ରିପୋର୍ଟ ଅନୁଯାୟୀ ବର୍ତ୍ତମାନ ସୁଦ୍ଧା ଦେଶରେ ସର୍ବାଧିକ ମାସିକ ଦରମା ପାଉଥିବା ବିଧାୟକ ହୋଇଛନ୍ତି ଓଡ଼ିଶାର ବିଧାୟକ। ଓଡ଼ିଶାର ଜଣେ ବିଧାୟକଙ୍କ ମୋଟ ମାସିକ ପ୍ରାପ୍ୟ (ଦରମା ଓ ଭତ୍ତା ମିଶାଇ) ବୃଦ୍ଧି ପାଇ ₹୩,୪୫,୦୦୦ (ତିନି ଲକ୍ଷ ପଇଁଚାଳିଶ ହଜାର ଟଙ୍କା)ରେ ପହଞ୍ଚିଛି।
ଏହି ପ୍ୟାକେଜରେ ମୂଳ ଦରମା ₹୯୦,୦୦୦, ନିର୍ବାଚନମଣ୍ଡଳୀ ଓ ସଚିବାଳୟ ଖର୍ଚ୍ଚ ପାଇଁ ₹୭୫,୦୦୦, ଯାନବାହନ ଭତ୍ତା ₹୫୦,୦୦୦ ଏବଂ ସ୍ଥାୟୀ ଯାତ୍ରା ଭତ୍ତା ₹୫୦,୦୦୦ ସହ ଡାକ୍ତରୀ, ବିଜୁଳି ଓ ଟେଲିଫୋନ୍ ଖର୍ଚ୍ଚ ଆଦି ଅନ୍ତର୍ଭୁକ୍ତ ରହିଛି।
ନୂଆ ଦରମା ବୃଦ୍ଧି ପରେ ଓଡ଼ିଶା, ପୂର୍ବରୁ ଅଧିକ ଦରମା ଦେଉଥିବା ରାଜ୍ୟମାନଙ୍କୁ ପଛରେ ପକାଇ ଦେଇଛି। ମହାରାଷ୍ଟ୍ର ଏବଂ ତେଲେଙ୍ଗାନାର ବିଧାୟକମାନେ ପ୍ରାୟ ₹୨.୫୦ ଲକ୍ଷରୁ ₹୨.୫୨ ଲକ୍ଷ ପର୍ଯ୍ୟନ୍ତ ମାସିକ ପ୍ୟାକେଜ୍ ପାଉଛନ୍ତି। ହରିଆଣାରେ ଏହି ପରିମାଣ ପ୍ରାୟ ₹୨.୨୦ ଲକ୍ଷ ଏବଂ ଉତ୍ତର ପ୍ରଦେଶରେ ₹୧.୮୭ ଲକ୍ଷ ରହିଛି। କର୍ଣ୍ଣାଟକରେ ପ୍ରାୟ ₹୧.୬୦ ଲକ୍ଷ ଏବଂ ରାଜସ୍ଥାନ ଓ ଝାଡ଼ଖଣ୍ଡରେ ₹୧.୫୦ ଲକ୍ଷରୁ ଅଧିକ ମାସିକ ଦରମା ଦିଆଯାଉଛି। ଦିଲ୍ଲୀ (କେନ୍ଦ୍ର ଶାସିତ ଅଞ୍ଚଳ)ରେ ବିଧାୟକଙ୍କ ମାସିକ ଦରମା ପ୍ରାୟ ₹୯୦,୦୦୦ ରହୁଥିବା ବେଳେ କେରଳ ବିଧାୟକଙ୍କୁ ମାସିକ ପ୍ରାୟ ₹୭୦,୦୦୦ ମିଳିଥାଏ, ଯାହା ଦେଶରେ ସର୍ବନିମ୍ନ ମଧ୍ୟରେ ଅନ୍ୟତମ।
