ଭୁବନେଶ୍ୱର,୨୨। ୧୨(ବ୍ୟୁରୋ): ରାଜ୍ୟରେ ପ୍ରଚଣ୍ଡ ଶୀତ ଆରମ୍ଭ ହୋଇଛି। ସାରା ଓଡିଶା ଶୀତରେ ଥରୁଛି। ପାରଦ ୫ରୁ ୭ ଡିଗ୍ରୀ ସେଲସିୟସ ତଳକୁ ଖସି ଯାଇଛି। ବଣ ପାହାଡ ଘେରା ଜିଲାଗୁଡିକରେ ଶୀତର ପ୍ରକୋପ ଆହୁରି ଭୟଙ୍କର ହୋଇଛି। ଦେହ ହାତ କୋଲ ମାରି ନେଇ ଯାଉଛି। ସଞ୍ଜ ବୁଡିବା ମାତ୍ରେ ଶୀତ ମାଡି ଆସୁଛି। ସକାଳ ୧୦ଟା ଯାଏ ପ୍ରକୋପ କମୁ ନାହିଁ। ଉତ୍ତର ପୂର୍ବ ଦିଗରୁ ଥଣ୍ଡା ପବନ ପ୍ରବାହିତ ହେଉଛି।
ଏଥିଯୋଗୁ ଆସନ୍ତା ୨୫ ତାରିଖ ଯାଏ ରାଜ୍ୟରେ ପ୍ରଚଣ୍ଡ ଶୀତ ହେବ ବୋଲି ପାଣିପାଗ ବିଭାଗ ସତର୍କ କରିଛି। ଆସନ୍ତା ୨୪ ଘଣ୍ଟା ମଧ୍ୟରେ ମୟୂରଭଞ୍ଜ, ଅନୁଗୋଳ, ଝାରସୁଗୁଡା ଏବଂ ସୁନ୍ଦରଗଡରେ ଶୀତଲହରୀ ବହିବ। ସେହିପିର ଦେବଗଡ, ନୂଆପଡା, ଢେଙ୍କାନାଳ, କୋରାପୁଟ, କନ୍ଧମାmଳ, ସୋନପୁର, ବୌଦ୍ଧ, ବଲାଙ୍ଗୀର, ନବରଙ୍ଗପୁର, କଟକ, କଳାହାଣ୍ଡି ଏବଂ ବରଗଡ ଜିଲାର କେତେକ ସ୍ଥାନରେ ମଧ୍ୟ ଥଣ୍ଡା ପ୍ରବାହ ହେବ। ଏ ନେଇ ପାରିପାଗ ବିଭାଗ ପକ୍ଷରୁ ଅରେଞ୍ଜ ଓ୍ବାର୍ଣ୍ଣିଂ ଜାରି କରାଯାଇଛି। ରାତ୍ରିରେ ଗୃହପାଳିତ ପ୍ରାଣିଙ୍କୁ ଶୀତ ଦାଉରୁ ରକ୍ଷା କରିବାକୁ ଘରେ ରଖିବାକୁ ପରାମର୍ଶ ଦିଆଯାଇଛି। ରାତ୍ରିରେ ଦୁଇ ଚକିଆ ଯାନରେ ଯାତାୟାତ କରିବାକୁ ବାରଣ କରାଯାଇଛି। ଦାରିଙ୍ଗବାଡ଼ି ଅଞ୍ଚଳରେ ଏବର୍ଷର ପ୍ରଥମ ଥର ପାଇଁ ତୁଷାର ପଡ଼ିଥିବା ଦେଖିବାକୁ ମିଳିଛି।
ଆଞ୍ଚଳିକ ପାଣିପାଗ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ମୁତାବକ ସୋମବାର ୧୨ଟି ସହରରେ ସର୍ବନିମ୍ନ ତାପମାତ୍ରା ୧୦ ଡିଗ୍ରୀ ତଳକୁ ଖସି ଯାଇଛି। ଫୁଲବାଣୀରେ ସର୍ବନିମ୍ନ ତାପମାତ୍ରା ୪ ଡିଗ୍ରୀ ସେଲସିୟସ ରେକର୍ଡ କରାଯାଇଥିବାବେଳେ ଝାରସୁଗୁଡା ୫.୮, ଦାରିଙ୍ଗୀବାଡି ୬, ଅନୁଗୋଳ ୬.୬, କୋରାପୁଟ ୭, ବାରିପଦା ୭.୬, ଭବାନୀପାଟଣା ୭.୮, ବଲାଙ୍ଗୀର ୮.୮, ବୌଦ୍ଧ ୯, ସୋନପୁର ୯.୪, ସମ୍ବଲପୁର ୧୦.୮, ହୀରାକୁଦ ୧୦.୬, ତାଳଚେର ୧୦.୪, ବାଲେଶ୍ୱର ୧୧.୭, ଚାନ୍ଦବାଲି ୧୧.୨, କଟକ ୧୧, ମାଲକନଗିରି ୧୧ ଏବଂ ନୟାଗଡ଼ରେ ସର୍ବନିମ୍ନ ତାପମାତ୍ରା ୧୧.୨ ଡିଗ୍ରୀ ସେଲସିୟସ ରେକର୍ଡ କରାଯାଇଛି।
