ନୂଆଦିଲ୍ଳୀ,୩।୨(ପି.ଟି.): ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ର ଅନ୍ୟତମ ଦଳ ଓଡ଼ିଶା ଏଫ୍ସି ମଙ୍ଗଳବାର ହେଡ୍ କୋଚ୍ ଷ୍ଟୁଆର୍ଟ ବକ୍ସଟରଙ୍କୁ ଦାୟିତ୍ୱରୁ ହଟାଇଛି। ସୋମବାର ଗୋଆର ବାମ୍ବୋଲିମ୍ରେ ଅନୁଷ୍ଠିତ ଜାମଶେଦ୍ପୁର ଏଫ୍ସି ବିପକ୍ଷ କଡ଼ା ସଂଘର୍ଷପୂର୍ଣ୍ଣ ମ୍ୟାଚ୍ରେ ଓଡ଼ିଶା ୦-୧ ଗୋଲରେ ପରାସ୍ତ ହୋଇଥିଲା। ମ୍ୟାଚ୍ ପର ଖବରଦାତା ସମ୍ମିଳନୀରେ ବକ୍ସଟର ରେଫରିଙ୍କ ନିଷ୍ପତ୍ତିରେ ଅସନ୍ତୋଷ ପ୍ରକାଶ କରି ଏକ ବିବାଦୀୟ ମନ୍ତ୍ରବ୍ୟ ଦେବା ପରେ ଓଡ଼ିଶା ତରଫରୁ ଏଭଳି କଠୋର ନିଷ୍ପତ୍ତି ନିଆଯାଇଛି। ମ୍ୟାଚ୍ରେ ଓଡ଼ିଶା ଷ୍ଟ୍ରାଇକର ତଥା ବ୍ରାଜିଲ୍ ଫୁଟବଲର ଡିଏଗୋ ମୌରିସିଓଙ୍କୁ ପେନାଲ୍ଟି ଏରିଆରେ ପ୍ରତିପକ୍ଷ ଗୋଲକିପର ଟି.ପି. ରେହେନେସ ବିବାଦୀୟ ଢଙ୍ଗରେ ତଳେ ପକାଇଥିଲେ। ଫଳରେ ଓଡ଼ିଶା ପେନାଲ୍ଟି ପାଇଁ ଦାବି କରିଥିଲା। କିନ୍ତୁ ଏହାକୁ ରେଫରି ପ୍ରତ୍ୟାଖ୍ୟାନ କରିଥିଲେ। ଏଥିରେ ବକ୍ସଟର ପ୍ରବଳ ଅସନ୍ତୋଷ ଜାହିର କରିଥିଲେ।
ଆମ ସପକ୍ଷରେ ନିଷ୍ପତ୍ତି ଯାଉ ବୋଲି ଚାହୁଁଛୁ। ଆମେ କେବେ ପେନାଲ୍ଟି ପାଇବୁ ତାହା ମଧ୍ୟ ଆମେ ଜାଣି ନାହୁଁ। ଯଦି ଆମ ଖେଳାଳି ଅନ୍ୟ କାହାକୁ ବଳାତ୍କାର କରିନ୍ତି କିମ୍ବା ନିଜେ ବଳାତ୍କାରର ଶିକାର ହୁଅନ୍ତି ତା’ହେଲେ ସମ୍ଭବତଃ ଆମକୁ ପେନାଲ୍ଟି ମିଳିବ ବୋଲି ବକ୍ସଟର ଖବରଦାତା ସମ୍ମିଳନୀରେ ମନ୍ତବ୍ୟ ଦେଇଥିଲେ।
ଏହା ବିବାଦ ସୃଷ୍ଟି କରିବା ପରେ ଓଡ଼ିଶା ଏଫ୍ସି ତରଫରୁ କ୍ଷମା ମଗାଯାଇଥିଲା। ୬୭ ବର୍ଷୀୟ ଇଂଲଣ୍ଡର ପୂର୍ବତନ କ୍ଲବ୍ ଖେଳାଳି ତଥା ମ୍ୟାନେଜର ବକ୍ସଟରଙ୍କ ମନ୍ତବ୍ୟ ଅବାଞ୍ଚିତ ଓ ଏହା ଆଦୌ ଗ୍ରହଣୀୟ ନୁହେଁ। ଏହା କ୍ଲବର ମର୍ଯ୍ୟାଦା ତଥା ଆଭିମୁଖ୍ୟକୁ ନକାରାତ୍ମକ ଭାବେ ପ୍ରଭାବିତ କରୁଛି ବୋଲି ଓଡ଼ିଶା ତରଫରୁ କୁହାଯାଇଥିଲା। କିନ୍ତୁ କଥା ଏତିକିରେ ସରି ନ ଥିଲା। ଓଡ଼ିଶା ଯଥାଶୀଘ୍ର ବକ୍ସଟରଙ୍କୁ ହଟାଇବାକୁ ନିଷ୍ପତ୍ତି ନେଇଛି। ବାକିଥିବା ମ୍ୟାଚ୍ଗୁଡିକ ପାଇଁ ଖୁବ୍ଶୀଘ୍ର ମଧ୍ୟବର୍ତ୍ତିକାଳୀନ କୋଚ୍ଙ୍କ ନାମ ଘୋଷଣା କରାଯିବ ବୋଲି ଦଳ ତରଫରୁ କୁହାଯାଇଛି।
ଉଲ୍ଲେଖଥାଉ କି ବକ୍ସଟରଙ୍କ ତତ୍ତ୍ୱାବଧାନରେ ଚଳିତ ସେସ୍ନରେ ଓଡ଼ିଶା ଏଫ୍ସିର ପ୍ରଦର୍ଶନ ଆଦୌ ଆଶାନୁରୂପ ହୋଇପାରି ନାହିଁ। ଓଡ଼ିଶା ଏ ପର୍ଯ୍ୟନ୍ତ ୧୪ଟି ମ୍ୟାଚ୍ ଖେଳି ଗୋଟିଏ ବିଜୟ, ୫ ଡ୍ର ଓ ୮ ପରାଜୟ ସହ ମାତ୍ର ୮ ପଏଣ୍ଟ ହାସଲ କରି ତାଲିକାର ସର୍ବନିମ୍ନ ସ୍ଥାନ ୧୧ତମ ସ୍ଥାନରେ ରହିଛି।
