ଓସିଏ ଆନ୍ତଃଜିଲା ୧୯ ବର୍ଷରୁ କମ୍ କ୍ରିକେଟ : ଭୁବନେଶ୍ୱର ‘ବି’ ୧୮୧ ରନରେ ବିଜୟୀ
21 ଭୁବନେଶ୍ୱର, ୨୬।୧(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକରେ ଚାଲିଥିବା ୧୯ ବର୍ଷରୁ କମ୍ ଆନ୍ତଃଜିଲା ଏକଦିବସୀୟ କ୍ରିକେଟ ଟୁର୍ନାମେଣ୍ଟରେ ରବିବାର ଅନୁଷ୍ଠିତ ମ୍ୟାଚରେ ଯାଜପୁର, ଭଦ୍ରକ, ପୁରୀ, ବରଗଡ଼, ଭୁବନେଶ୍ୱର ଓ ବାଲେଶ୍ୱର ଦଳ ବିଜୟ ହାସଲ କରିଛନ୍ତି।
ରେଭେନ୍ଶା ଗ୍ରାଉଣ୍ଡ-୨ରେ ଅନୁଷ୍ଠିତ ମ୍ୟାଚରେ ଯାଜପୁର ୧୭୭ ରନରେ ନବରଙ୍ଗପୁରକୁ ହରାଇ ଦେଇଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଯାଜପୁର ୪୮ ଓଭରରେ ୨୮୦ ରନରେ ଅଲ୍ଆଉଟ ହୋଇଥିଲା। ଶତକ ହାସଲକାରୀ ମହମ୍ମଦ ସୋହେଲ (୧୨୪ ରନ, ୧୨୭ ବଲ, ୧୩ ଚୌକା, ୧ ଛକା) ଟପ୍ ସ୍କୋରର ହୋଇଥିବାବେଳେ ସୟଦ ୩୧ ରନ କରିଥିଲେ। ଅତିରିକ୍ତ ଭାବେ ପ୍ରତିପକ୍ଷ ବୋଲର ୩୯ ରନ ବ୍ୟୟ କରିଥିଲେ। ସେମାନଙ୍କ ମଧ୍ୟରୁ ଅମୃତ ମହାପାତ୍ର ୪ଟି ଏବଂ ଦୀନେଶ ଶ୍ରୀବାତ୍ସବ ୩ଟି ଉଇକେଟ ନେଇଥିଲେ। ୨୮୧ ରନ ବିଜୟ ଲକ୍ଷ୍ୟରେ ନବରଙ୍ଗପୁର ୨୩.୩ ଓଭରରେ ୧୦୩ ରନକରି ଅଲଆଉଟ ହୋଇଯାଇଥିଲା। ଦୀନେଶ ସର୍ବାଧିକ ୨୫ ରନ କରିଥିଲେ। ବିଜୟୀ ଦଳର ବୋଲରଙ୍କ ମଧ୍ୟରେ ସୁନୀଲ ବେହେରା ୩୭ ରନ ବିନିମୟରେ ୫ ଉଇକେଟ ସଫଳତା ପାଇଥିବାବେଳେ ବିଭୂତି ଚମତ୍କାର ବୋଲିଂ କରି ୫ ଓଭରରେ ୨ ମେଡେନ ନେଇ ମାତ୍ର ୧୨ ରନ ଦେଇ ୩ଟି ଉଇକେଟ ଅକ୍ତିଆର କରିଥିଲେ। ନିମପୁର ପଡ଼ିଆରେ ଅନୁଷ୍ଠିତ ମ୍ୟାଚରେ ଭଦ୍ରକ ୭ ଉଇକେଟରେ ଗଜପତିକୁ ହରାଇ ଦେଇଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଗଜପତି ୪୩ ଓଭରରେ ୧୩୬ ରନକରି ଅଲଆଉଟ ହୋଇଥିଲା। ଆଲୋକ ମହାପାତ୍ର ୩୫ ରନ କରିଥିବାବେଳେ ବିପକ୍ଷ ଦଳର ବୋଲରମାନେ ସର୍ବାଧିକ ୩୬ ରନ ଅତିରିକ୍ତଭାବେ ବ୍ୟୟ କରିଥିଲେ। ମୀର କାଫିରୁଦ୍ଦିନ ୩ଟି ଓ କୁମାର କେ. ସାହୁ ୨ଟି ଉଇକେଟ ନେଇଥିଲେ। ୧୩୭ ରନ ବିଜୟ ଲକ୍ଷ୍ୟକୁ ଭଦ୍ରକ ୨୩ ଓଭରରେ ମାତ୍ର ୩ ଉଇକେଟ ହରାଇ ହାସଲ କରି ନେଇଥିଲା। ଅଧିନାୟକ ସୂର୍ଯ୍ୟ ମହାପାତ୍ର ୫୬(୪୯ ବଲ, ୭ ଚୌକା, ୧ ଛକା) ରନ କରି ଆଉଟ ହୋଇଥିବାବେଳେ ଆକାଶ ମହାପାତ୍ର ୫୩ ରନରେ ଅପରାଜିତ ରହିଥିଲେ। ରେଭେନ୍ଶା-୧ ଗ୍ରାଉଣ୍ଡରେ ପୁରୀ ୭୪ ରନରେ କନ୍ଧମାଳକୁ ହରାଇଛି। ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ପୁରୀ ୪୪.୫ ଓଭରରେ ୨୦୬ ରନରେ ଅଲଆଉଟ ହୋଇଥିଲା। ଦଳ ପକ୍ଷରୁ ନିଶାନ୍ତ ନାୟକ ସର୍ବାଧିକ ୫୨(୫୨ ବଲ, ୯ ଚୌକା), ପ୍ରୀତିଶ ଜେନା ୩୫ ଓ ରାଜେଶ ବେହେରା ୩୧ ରନ କରିଥିଲେ। ବିପକ୍ଷ ବୋଲର ଅତିରିକ୍ତ ୩୯ ରନ ବ୍ୟୟ କରିଥିଲେ। ତେବେ ଯୋସେଫ ବେହେରା ୪ଟି ଏବଂ ଶୁଭାଶିଷ ପାଲୋ ୩ଟି ଉଇକେଟ ନେବାରେ ସକ୍ଷମ ହୋଇଥିଲେ। ଜବାବରେ କନ୍ଧମାଳ ୪୭.୨ ଓଭରରେ ମାତ୍ର ୧୩୨ ରନରେ ଅଲଆଉଟ ହୋଇ ଯାଇଥିଲା। ବିକାଶ ଗଣ୍ଡ ସର୍ବାଧିକ ୩୯ ରନ କରିଥିଲେ। ବିପକ୍ଷ ଦଳର ଅଭୟ ପଟ୍ଟନାୟକ ଓ ସୁମିତ ସାହୁ ୩ଟି ଲେଖାଏ ଏବଂ ନିଶାନ ଦାସ ୨ଟି ଉଇକେଟ ନେଇଥିଲେ।
ଡ୍ରିମ୍ସ ଗ୍ରାଉଣ୍ଡରେ ଆୟୋଜିତ ମ୍ୟାଚରେ ବରଗଡ଼ ୮ ଉଇକେଟରେ କଳାହାଣ୍ଡିକୁ ହରାଇଛି। କଳାହାଣ୍ଡି ଇନିଂସ ୩୩.୧ ଓଭରରେ ମାତ୍ର ୯୧ ରନରେ ସୀମିତ ରହିଥିଲା। ଦୀନେଶ କୁମାର ମାଝି ସର୍ବାଧିକ ୩୮ ରନ କରିଥିଲେ। ବିପକ୍ଷ ବୋଲରଙ୍କ ମଧ୍ୟରେ ହରଜିତ ସିଂ ୫ ଉଇକେଟ ସଫଳତା ପାଇଥିବାବେଳେ ରାକେଶ କିଶନ ଓ ଅଭିଷେକ ମହାରଣା ୨ଟି ଲେଖାଏ ଉଇକେଟ ପାଇଥିଲେ। ଜବାବରେ ବରଗଡ଼ ୧୬.୩ ଓଭରରେ ମାତ୍ର ୨ ଉଇକେଟ ହରାଇ ୯୪ ରନ ସଂଗ୍ରହ କରି ନେଇଥିଲା। ଅଧିନାୟକ ଆର୍ଯ୍ୟମନ ମିଶ୍ର ୪୯ ବଲ୍ରୁ ୯ ଚୌକା ସହାୟତାରେ ୫୮ ରନରେ ଅପରାଜିତ ରହି ଦଳକୁ ସହଜ ବିଜୟ ଦେଇଥିଲେ। ବିଓଏସ୍ଇ ପଡ଼ିଆରେ ଭୁବନେଶ୍ୱର-ବି ୧୮୧ ରନରେ କୋରାପୁଟକୁ ହରାଇଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭୁବନେଶ୍ୱର ଦଳ ୫୦ ଓଭରରେ ୮ ଉଇକେଟ ହରାଇ ୨୫୬ ରନ କରିଥିଲା। ପଙ୍କଜ ସାହୁ ସର୍ବାଧିକ ୬୦ ଓ ଅନିଶ ରାଉତ ୪୭ ରନ କରିଥିଲେ। ପ୍ରତିପକ୍ଷ ଦଳର ନିରଞ୍ଜନ ଗୌଡ଼, ଓ୍ବାଇ.ଯୁବରାଜ ଓ ଆରାସାଦା କିରନ ୨ଟି ଲେଖାଏ ଉଇକେଟ ନେଇଥିଲେ। ୨୫୭ ରନ ବିଜୟ ଲକ୍ଷ୍ୟରେ କୋରାପୁଟ ୨୫ ଓଭରରେ ୭୫ ରନ କରି ଅଲ୍ଆଉଟ ହୋଇ ଯାଇଥିଲା। ବିଜୟୀ ଦଳର ବୋଲରଙ୍କ ମଧ୍ୟରେ ସୁଶୀଲ ବାରିକ ୪ଟି, ବିକାଶ ନାୟକ ୩ଟି ଓ ଦେବାଶିଷ ନାୟକ ଗୋଟିଏ ଉଇକେଟ ନେଇଥିଲେ। ବିଡ଼ାନାସୀ ଗ୍ରାଉଣ୍ଡରେ ବାଲେଶ୍ୱର ୬ ଉଇକେଟରେ ଜଗତ୍ସିଂହପୁରକୁ ପରାସ୍ତ କରିଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଜଗତ୍ସିଂହପୁର ୨୮.୩ ଓଭରରେ ୧୩୨ ରନକରି ଅଲଆଉଟ ହୋଇଥିଲା। ଅଧିନାୟକ ଓଁକାର ମହାନ୍ତି ୨୮ ରନ କରିଥିବାବେଳେ ପ୍ରତିପକ୍ଷ ବୋଲର ସର୍ବାଧିକ ୩୦ ରନ ଅତିରିକ୍ତ ଭାବେ ବ୍ୟୟ କରିଥିଲେ। ରାଜୀବ ସାହୁ ଓ ଶୁଭ ବାରିକ ୪ଟି ଲେଖାଏ ଏବଂ ସେକ୍ ଅସଲାମ ୨ଟି ଉଇକେଟ ନେଇଥିଲେ। ବାଲେଶ୍ୱର ୧୫.୫ ଓଭରରେ ୪ ଉଇକେଟ ହରାଇ ୧୩୬ ରନ ସଂଗ୍ରହ କରି ନେଇଥିଲା। ରାଜୀବ ସାହୁ (୬୩ ରନ, ୪୩ ବଲ, ୧୦ ଚୌକା, ୧ ଛକା) ଓ ସୁମନ ଓଝା ୫୭*ରନ, ୭ ଚୌକା, ୨ ଛକା) ଅର୍ଦ୍ଧଶତକ ହାସଲ କରି ଦଳର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ।