ଜଳେଶ୍ୱର, ୩୦ା୬(ଡି.ଏନ.ଏ.)-ବାଲେଶ୍ୱର ଜିଲା ଜଳେଶ୍ୱରସ୍ଥିତ ସୁବର୍ଣ୍ଣରେଖା ନଦୀର ବାଲିର ବେଆଇନ ଉତ୍ତୋଳନ ଓ କୋଟି କୋଟି ଟଙ୍କାର ରାଜସ୍ବ ଫାଙ୍କି ଆସୁଥିବାରୁ ବିଭିନ୍ନ ପର୍ଯ୍ୟାୟରେ କୋଲକାତା ଓ ଦିଲ୍ଲୀ ଏନ୍ଜିଟିରେ ମାମଲା ରୁଜୁ ହୋଇଛି । ସେହିପରି ଜଳେଶ୍ୱର ଅଞ୍ଚଳରେ ବେଆଇନ ଭାବେ ଗଢି ଉଠିଥିବା ନାଲି ଇଟାଭାଟି ସମ୍ପର୍କରେ ଜିଲାପାଳଙ୍କ ନିକଟରେ ଅଭିଯୋଗ ହୋଇଆସୁଥିଲା। ଜିଲାପାଳଙ୍କ ଚିଠି ଅନୁଯାୟୀ ତହସିଲଦାର ଶଙ୍କର ପଟ୍ଟନାୟକ ୫୩ଟି ନାଲି ଇଟା ମାଲିକଙ୍କୁ ନୋଟିସ୍ ଜାରି କରିଛନ୍ତି । ଏଥିରେ ବିଭିନ୍ନ ତଥ୍ୟ ମଗାଯାଇଛି। ଇଟାଭାଟି ମାଲିକମାନେ ରୟାଲିଟି ଫାଙ୍କି ମାଟି, ବାଲି ପାହାଡ ଆକାରରେ ଗଚ୍ଛିତ କରି ରଖୁଥିବା ଦେଖିବାକୁ ମିଳୁଛି । ପୁଣି ଓଡିଶା ଓ ଓଡିଶା ବାହାରୁ କୋଇଲା ବିନା ରୟାଲିଟି ଓ ଟ୍ୟାକ୍ସ ନ ଦେଇ ଏଠାକୁ ଆସୁଥିବା ଜଣାଯାଇଛି । ଗୋଟିଏ ଗୋଟିଏ ଇଟାଭାଟି ୪୦/୫୦ ହଜାର ଇଟା ତିଆରି କରୁଥିବା ଦର୍ଶାଉଥିବା ବେଳେ ଲକ୍ଷ ଲକ୍ଷ ଇଟା ତିଆରି କରି ମାଲାମାଲ ହେଉଛନ୍ତି। ବାହାର ରାଜ୍ୟରୁ ଶିଶୁ ଶ୍ରମିକଙ୍କ ସହିତ ଶତାଧିକ ଦାଦନ ଶ୍ରମିକ ଏଠାକୁ ଆସି ନାଲି ଇଟା ନିର୍ମାଣ କରୁଥିବା ବେଳେ ଦୟନୀୟ ପରିବେଶରେ ରହିବା ସହିତ ମାଲିକମାନେ ସରକାରଙ୍କ ନିୟମକୁ ବେଖାତିର କରିଛନ୍ତି । ଏପରି ନୋଟିସ୍ ପାଇଲା ପରେ ଇଟାଭାଟି ମାଲିକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି ।
