ନୟାଗଡ଼ ଅଫିସ,୨୪।୩: ନୟାଗଡ଼ ଜିଲାରେ ବାଲ୍ୟବିବାହ ଥମିବାର ନାଁ ଧରୁନି। ବାଲ୍ୟବିବାହ ଓ ଭ୍ରୂଣହତ୍ୟା ରୋକିବାକୁ ଦୁଇ ପ୍ରସଙ୍ଗରେ ଲକ୍ଷ ଲକ୍ଷ ଅନୁଦାନରେ ବେଟି ବଚାଅ ବେଟି ପଢ଼ାଅ କାର୍ଯ୍ୟକ୍ରମ ସରକାରୀ ସ୍ତରରେ ହେଉଛି। ପୁଣି ସରକାରୀ ସ୍ତରରେ ବାଲ୍ୟବିବାହ ବନ୍ଦ ପାଇଁ ସଚେତନତା କରାଯାଉଛି। ତେବେ ୨ ବର୍ଷରେ ୨୦୫ ବାଲ୍ୟବିବାହ ଚାଇଲ୍ଡ ଲାଇନ ବନ୍ଦ କରିଛି। ଏହାପରେ ସଚେତନତା ଠିକ୍ରେ ହେଉ ନ ଥିବା ଓ ଏ ନେଇ ଥିବା ଆଇନ କଡ଼ାକଡ଼ି ପାଳନ କରାଯାଉ ନ ଥିବା ସ୍ପଷ୍ଟ ହେଉଛି। ଅନ୍ୟପକ୍ଷେ ଚାଇଲ୍ଡ ଲାଇନ ପକ୍ଷରୁ ବାଲ୍ୟବିବାହ ବନ୍ଦ କରାଯାଇ ନାବାଳିକାଙ୍କୁ ସିଡବ୍ଲ୍ୟୁସିରେ ହାଜର କରାଯାଉଛି। କେତେଜଣ ନାବାଳିକାଙ୍କୁ ଉଦ୍ଧାର ଦିନ ଛାଡ଼ି ଦିଆଯାଉଥିବାରୁ ସେମାନେ ପୁଣି ସେହି ଦିନ ବିବାହ କରିଛନ୍ତି। ୨ ବର୍ଷରେ ଏପରି ୩୨ ବାଲ୍ୟବିବାହ ପୁଣି ଥରେ ହୋଇଥିବା ଜଣାପଡିଛି। ଅନ୍ୟପକ୍ଷେ ବେସରକାରୀ ଭାବେ ବାଲ୍ୟବିବାହ ସଂଖ୍ୟା ବର୍ଷକୁ ୫୦୦ରୁ ୧୫୦୦ ମଧ୍ୟରେ ବୋଲି କୁହାଯାଉଛି। କେଉଁଠି ରହିଯାଇଥିବା ତ୍ରୁଟି କାରଣରୁ ବାଲ୍ୟବିବାହକୁ ରୋକାଯାଇ ପାରୁନି ବୋଲି ଅଭିଯୋଗ ହୋଇଆସୁଛି। ଏହାର କାରଣ ଖୋଜା ଯାଉ ନ ଥିବାରୁ ଏହା କେବଳ ଭାସଣବାଜିରେ ଓ ସଭା ସମିତିରେ ଅଟକି ଯାଉଛି ବୋଲି କୁହାଯାଉଛି। ବାଲ୍ୟବିବାହ ସମସ୍ୟାର ସମାଧାନ ପାଇଁ ପନ୍ଥା ବାହାରୁ ନ ଥିବାରୁ ଏହା ଭୟଙ୍କର ବିପଦକୁ ଆମନ୍ତ୍ରଣ କରୁଛି ବୋଲି କୁହାଗଲାଣି। ୨୦୨୧ ଜାନୁୟାରୀରୁ ୨୦୨୩ ଜାନୁୟାରୀ ପର୍ଯ୍ୟନ୍ତ ନୟାଗଡ଼ ଜିଲାରେ ୨୦୫ ବାଲ୍ୟବିବାହ ବନ୍ଦ ହୋଇଛି।
ଲୋକଦେଖାଣିଆ ଶପଥପାଠ
ଜିଲାରେ ବାଲ୍ୟବିବାହ ବଢ଼ୁଥିବା ପରିସ୍ଥିତିକୁ ଦୃଷ୍ଟିରେ ରଖି ନୟାଗଡ଼ ଜିଲା ପ୍ରଶାସନ ଏବଂ ଆକ୍ସନ ଏଡ୍ ମିଳିତ ସହଯୋଗରେ ଜିଲା ସଦର ମହକୁମାରେ ୨୦୨୨ ମେ ୨୨ରେ ତତ୍କାଳୀନ ଜିଲାପାଳଙ୍କ ଅଧ୍ୟକ୍ଷତାରେ ଏକ ଶପଥପାଠ କାର୍ଯ୍ୟକ୍ରମ ହୋଇଥିଲା। ଜିଲା ପ୍ରଶାସନ ଏବଂ ଆକ୍ସନ ଏଡ୍ ପ୍ରୟାସରେ ସମଗ୍ର ଜିଲାରେ ଚାଲିଥିବା ‘ବାଲ୍ୟବିବାହକୁ ନା କହିବା ଓ ବିଦ୍ୟାଳୟକୁ ହଁ କହିବା’ କାର୍ଯ୍ୟକ୍ରମର ଶପଥପାଠ କାର୍ଯ୍ୟକ୍ରମ ଏକ ଅଂଶବିଶେଷ ବୋଲି କୁହାଯାଇଥିଲା। ଏଥିରେ ପଞ୍ଚାୟତସ୍ତରରେ ସ୍ବୟଂସହାୟକ ଗୋଷ୍ଠୀ, ଅଙ୍ଗନଓ୍ବାଡ଼ି କର୍ମୀ, କିଶୋରୀ ବାଳିକାବାଳକ, ବ୍ଲକସ୍ତରରେ ସ୍ବୟଂ ସହାୟିକା ମହାସଂଘର ସଭ୍ୟା, ସୁପରଭାଇଜର, ସିଡିପିଓ ଓ ଜିଲାସ୍ତରୀୟ ଅଧିକାରୀ ଯୋଗ ଦେଇଥିଲେ। ହେଲେ ସବୁ ବୈଠକକୁ ଗଣମାଧ୍ୟମକୁ ଡକାଯାଇନାହିଁ। ଗଣମାଧ୍ୟମକୁ ଅନ୍ଧାରରେ ରଖି ପ୍ରଶାସନ ବାହାବା ନେବାକୁ ଚେଷ୍ଟା କରି ଅପଦସ୍ଥ ହେଉଥିବା ଦେଖାଯାଉଛି।
ଢାଞ୍ଚାରେ ପରିବର୍ତ୍ତନ ଆବଶ୍ୟକ
ବାଲ୍ୟବିବାହ ବଢ଼ୁଥିବା ନେଇ ବିଭିନ୍ନ ସମୟରେ ଜିଲାପାଳ ଉଦ୍ବେଗ ପ୍ରକାଶ କରୁଛନ୍ତି। ତେବେ ଆଇନକୁ କଡ଼ାକଡ଼ି ଲାଗୁ କରିବାକୁ ନିର୍ଦ୍ଦେଶ ଦେଉଛନ୍ତି। ହେଲେ ଆଇନ କଡ଼ାକଡ଼ି ପାଳନ ହେଉନି ବୋଲି ଅଭିଯୋଗ ହେଉଛି। ଏ ନେଇ ମାଣିକାଗୋଡ଼ାର ଆଇନଜୀବୀ ଅମୀୟ ପଟ୍ଟନାୟକ କୁହନ୍ତି, ବାଲ୍ୟବିବାହ ପାଇଁ ରହିଥିବା ଆଇନଗତ ଢାଞ୍ଚା ବଦଳାଇବାକୁ ପଡ଼ିବ। ଯେଉଁମାନେ ବାଲ୍ୟବିବାହ କରୁଛନ୍ତି, ସେମାନଙ୍କ ବିରୋଧରେ ଥାନାରେ ମାମଲା ହେବା ସହ ଗିରଫ କରାଯାଉ। ପୁଣି ପ୍ରଶାସନ ପକ୍ଷରୁ ବାଲ୍ୟବିବାହ ଉପରେ ଯେଉଁ ସଚେତନତା ସଭା, ବୈଠକ କରାଯାଉଛି ସେଥିରେ ଗଣମାଧ୍ୟମକୁ ସାମିଲ କରାଯାଉ। ପ୍ରଶାସନ ତା’ର କାର୍ଯ୍ୟକ୍ରମରେ ସ୍ବଚ୍ଛତା ନ ଆଣିଲେ ବହୁଦିନର ଏକ ସମସ୍ୟା ବଦଳିବା ଆଶା କରିବା ଠିକ୍ ନୁହେଁ। ଏ ନେଇ ୱାର୍ଡମେମ୍ବର, ସରପଞ୍ଚ, ସମିତିସଭ୍ୟ, ଜିଲା ପରିଷଦ ସଭ୍ୟଙ୍କୁ ସଚେତନ କରାଇ ସେମାନଙ୍କର ସହଯୋଗ ନିଆଯାଉ। ସାଧାରଣରେ ଏ ନେଇ ସଚେତନ କରାଯାଉ।
ବିବାହ ପଞ୍ଜୀକରଣ ବାଧ୍ୟତାମୂଳକ କରାଯାଉ
ବିବାହ ପଞ୍ଜୀକରଣ ବାଧ୍ୟତାମୂଳକ କରାଯିବା ଦରକାର। ବିବାହ ପଞ୍ଜୀକରଣ ହେଲେ ନାବାଳିକା ବିବାହ ପାଇଁ ଆଉ କଷ୍ଟ କରିବାକୁ ପଡ଼ିବ ନାହିଁ ବୋଲି ସମାଜିକ କର୍ମୀ ଉଷାରାଣୀ ପଟ୍ଟନାୟକ କହିଛନ୍ତି। ଉଷାରାଣୀଙ୍କ ସୂଚନା ଅନୁସାରେ, ନାବାଳିକା ବିବାହ ସମ୍ବନ୍ଧୀୟ କାର୍ଯ୍ୟକ୍ରମରେ ସମସ୍ତଙ୍କର ସହଯୋଗ ଦରକାର। ସମସ୍ତଙ୍କୁ ନେଇ କାର୍ଯ୍ୟକ୍ରମ କରାଗଲେ ସୁଫଳ ନିଶ୍ଚିତ ମିଳିବ। ବହୁଦିନର ସାମାଜିକ ସମସ୍ୟାକୁ ବଦଳାଇବାକୁ ହେଲେ ସମୟ ଦରକାର। କାରଣ ଏହା ଏକ ବ୍ୟାଧି ହୋଇସାରିଛି। ଏ ନେଇ ସମସ୍ତେ ସଚେତନ ନୁହନ୍ତି ବୋଲି ସେ କହିଛନ୍ତି।
