ମୁମ୍ବାଇ,୨୦।୧୨: ଭାରତର ସର୍ବଶ୍ରେଷ୍ଠ ୱିକେଟକିପର କିଏ? ଏହି ପ୍ରଶ୍ନ ଆସିଲେ ସାଧାରଣତଃ ମହେନ୍ଦ୍ର ସିଂ ଧୋନି କିମ୍ବା ଋଷଭ ପନ୍ତଙ୍କ ନାମ ପ୍ରଥମେ ଆସିଥାଏ। ମାତ୍ର ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ରୋହିତ ଶର୍ମା ଏକ ଭିନ୍ନ ମତ ଦେଇଛନ୍ତି। ରୋହିତଙ୍କ ଅନୁଯାୟୀ, ବେଙ୍ଗଲର ଅଭିଜ୍ଞ ୱିକେଟକିପର ଋଦ୍ଧିମାନ ସାହା ହେଉଛନ୍ତି ଭାରତର ସର୍ବକାଳୀନ ସର୍ବଶ୍ରେଷ୍ଠ ୱିକେଟକିପର।
ସୋସିଆଲ ମିଡିଆରେ ଭାଇରାଲ ହେଉଥିବା ଏକ ଭିଡିଓରେ ରୋହିତ ଶର୍ମା ସାହାଙ୍କ କୌଶଳର ଖୁବ୍ ପ୍ରଶଂସା କରିଛନ୍ତି। ସେ କହିଛନ୍ତି, “ମୁଁ ସାହାଙ୍କ ସହ ଅନେକ ଟେଷ୍ଟ ମ୍ୟାଚ୍ ଖେଳିଛି ଏବଂ ସ୍ଲିପରେ ଛିଡ଼ା ହୋଇ ତାଙ୍କର କିପିଂ ଦେଖିଛି। ସାହାଙ୍କ ଭଳି ୱିକେଟକିପର ମୁଁ କେବେ ଦେଖିନାହିଁ। ସେ ନିଃସନ୍ଦେହରେ ଭାରତର ସର୍ବଶ୍ରେଷ୍ଠ ୱିକେଟକିପର।”
ରୋହିତଙ୍କ ଅନୁଯାୟୀ, ଭାରତୀୟ ପିଚ୍ରେ ବଲ୍ ଅଧିକ ଟର୍ଣ୍ଣ ହେଉଥିବା ବେଳେ ଏବଂ ତଲୁଆ ରହୁଥିବା ସମୟରେ ୱିକେଟ ପଛରେ ସଜାଗ ରହିବା ଅତ୍ୟନ୍ତ କଷ୍ଟକର। ବିଶେଷକରି ରବିଚନ୍ଦ୍ରନ ଅଶ୍ୱିନ ଏବଂ ରବୀନ୍ଦ୍ର ଜାଡେଜାଙ୍କ ଭଳି ସ୍ପିନରଙ୍କ ବିଭିନ୍ନ ପ୍ରକାର ବଲକୁ ଯେଉଁଭଳି ଭାବେ ସାହା ଆୟତ୍ତ କରନ୍ତି, ତାହା ପ୍ରଶଂସନୀୟ।
ଋଦ୍ଧିମାନ ୪୦ଟି ମ୍ୟାଚ୍ରେ ସାହା ୯୨ଟି କ୍ୟାଚ୍ ଏବଂ ୧୨ଟି ଷ୍ଟମ୍ପିଂ କରିଛନ୍ତି ଏବଂ ୯ଟି ମ୍ୟାଚ୍ରେ ୧୭ଟି କ୍ୟାଚ୍ ଏବଂ ୧ଟି ଷ୍ଟମ୍ପିଂ କରିଛନ୍ତି।
ସାହାଙ୍କ କ୍ୟାରିଅର୍ ସମୟରେ ଧୋନିଙ୍କ ଉପସ୍ଥିତି ଏବଂ ପରବର୍ତ୍ତୀ ସମୟରେ ପନ୍ତଙ୍କ ଆକ୍ରମଣାତ୍ମକ ବ୍ୟାଟିଂ କାରଣରୁ ସେ ହୁଏତ ଅନେକ ସମୟରେ ଚୟନରୁ ବାଦ ପଡ଼ିଥିଲେ, ମାତ୍ର ‘ପିଓର ୱିକେଟକିପିଂ’ କ୍ଷେତ୍ରରେ ରୋହିତ ଶର୍ମା ତାଙ୍କୁ ସର୍ବଶ୍ରେଷ୍ଠ ବୋଲି ମାନ୍ୟତା ଦେଇଛନ୍ତି।
