ଭୁବନେଶ୍ୱର, ୨୪ା୩(ବ୍ୟୁରୋ): ରାଜଧାନୀରେ ମହିଳାଙ୍କୁ ଗଣବଳାତ୍କାର ଘଟଣାରେ ମଙ୍ଗଳବାର କୋର୍ଟରେ ସିଆର୍ପିସିର ୧୬୪ ଧାରା ଅନୁଯାୟୀ ପୀଡ଼ିିତାଙ୍କ ଭାଇ, ଭଉଣୀ ଓ ଭିଣୋଇଙ୍କ ବୟାନ ରେକର୍ଡ ହୋଇଛି। ସମ୍ପର୍କୀୟମାନେ କହିଛନ୍ତି ଯେ, ପୀଡ଼ିତା ସିଜୋଫ୍ରେନିଆ ରୋଗରେ ଆକ୍ରାନ୍ତ। ସେଥିପାଇଁ ସେ ମାନସିକ ରୋଗ ବିଶେଷଜ୍ଞଙ୍କ ଚିକିତ୍ସାଧୀନ ଥିଲେ। ଅଭିଯୋଗ କରିଥିବା ପୀଡ଼ିିତା ଘଟଣାଦିନ ଡାକ୍ତରଙ୍କ ନିକଟକୁ ଯାଇଥିଲେ। ଡାକ୍ତର ଇଞ୍ଜେକଶନ ଦେବା ପରେ ୧୨ ଘଣ୍ଟା ଅଚେତ ହୋଇପଡ଼ିଥିଲେ। ପୁଣି ୨୪ ଘଣ୍ଟା ଶଯ୍ୟାଶାୟୀ ଥିଲେ। ଅର୍ଥାତ ଅଭିଯୋଗ ଦିନ ପୀଡ଼ିିତା ବାପଘରେ ଥିଲେ ବୋଲି ସମ୍ପର୍କୀୟମାନେ ସେମାନଙ୍କ ବୟାନରେ କହିଛନ୍ତି। ସୋମବାର କୋର୍ଟରେ ପୀଡ଼ିିତାଙ୍କ ବୟାନ ରେକର୍ଡ ହୋଇଥିବାବେଳେ ତାଙ୍କ ଅଭିଯୋଗ ଲେଖିଥିବା ଯୁବକଙ୍କର ବୁଧବାର ଲକ୍ଷ୍ମୀସାଗର ଥାନାରେ ବୟାନ ରେକର୍ଡ କରାଯିବ ବୋଲି ସୂଚନା ମିଳିଛି।
ଅନ୍ୟପକ୍ଷରେ, ପୀଡ଼ିିତା ରହୁଥିବା ବାପଘର ଓ ଘଟଣା ଘଟିଥିବା ଅଞ୍ଚଳର ସିସିଟିଭି ଫୁଟେଜ ପାଇଛି ପୋଲିସ। ଫୁଟେଜରେ ଘଟଣା ଦିନ ପୀଡ଼ିିତାଙ୍କର ଭିଜୁଆଲ ଦେଖିବାକୁ ମିଳୁନାହିଁ। ସେହିପରି ପୀଡ଼ିିତା ଓ ତାଙ୍କ ସମ୍ପର୍କୀୟଙ୍କ ବୟାନ ମଧ୍ୟରେ ମେଳତାଳ ନାହିଁ। ଫଳରେ ପୋଲିସ ଅଡୁଆରେ ପଡ଼ିିବା ସହ ସତ୍ୟତା ଖୋଜିବାକୁ ଅଧିକ ତଦନ୍ତ ଚଳାଇଛି। ସେହିପରି ଏହି ଘଟଣାରେ ପୀଡ଼ିତାଙ୍କ କହିବା ମୁତାବକ ଲକ୍ଷ୍ମୀସାଗର ଥାନା ପୋଲିସ ବାପି ପାଣିଗ୍ରାହୀ ନାମକ ଯୁବକଙ୍କୁ ତଦନ୍ତ ପରିସରଭୁକ୍ତ କରିଛି। ସେ କୁଆଡ଼େ ପୀଡ଼ିିତାଙ୍କ ଅଭିଯୋଗପତ୍ର ପ୍ରସ୍ତୁତ କରିଥିଲେ। ସେହିପରି ବାପିଙ୍କ ପ୍ରରୋଚନାରେ ପୀଡ଼ିିତାଜଣକ ଏହି ଅଭିଯୋଗ ଆଣିଥିବା କୁହାଯାଉଛି। ତେବେ କାହିଁକି ଓ କେଉଁ ପରିସ୍ଥିତିରେ ବାପି ପୀଡ଼ିତାଙ୍କୁ ଅଭିଯୋଗ କରିବାକୁ କହିଥିଲେ, ତାହା ତଦନ୍ତ ପରେ ଜଣାପଡ଼ିବ ବୋଲି ପୋଲିସ କହିଛି। ବାପି ଜନୈକ ରାଜନୈତିକ ବ୍ୟକ୍ତିଙ୍କ ଅତି ଘନିଷ୍ଠ ବୋଲି ଶୁଣିବାକୁ ମିଳୁଛି।
ପୀଡ଼ିିତାଙ୍କ ଅଭିଯୋଗ ଅନୁସାରେ, ଗତ ଫେବୃୟାରୀ ୨୬ ତାରିଖ ସନ୍ଧ୍ୟାରେ ସେ ବାପଘର ବୁଦ୍ଧେଶ୍ୱରୀ କଲୋନୀ ଅଞ୍ଚଳରୁ ଶାଶୁଘର ହଳଦୀପଡ଼ିିଆ ବସ୍ତି ଅଞ୍ଚଳକୁ ଚାଲି ଚାଲି ଫେରୁଥିଲେ। ଏହି ସମୟରେ ବାଟରେ ୪ଜଣ ବ୍ୟକ୍ତି ତାଙ୍କୁ ଅପହରଣ କରିନେଇ ବିଭିନ୍ନ ସ୍ଥାନରେ ବଳାତ୍କାର କରିଥିଲେ। ଏନେଇ ସେ ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ କିଛି ଶୁଣି ନ ଥିଲା। ପରେ ପୁଣି ୩ଜଣ ବ୍ୟକ୍ତି ତାଙ୍କୁ ବଳାତ୍କାର କରିବାରୁ ସେ ପୁନର୍ବାର ଅଭିଯୋଗ କରିବାକୁ ଥାନାକୁ ଯାଇଥିଲେ ମଧ୍ୟ ପୋଲିସ ସମାନ ଆଚରଣ କରିଥିଲା। ଶେଷରେ ପୀଡ଼ିିତା ଜଣକ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀଙ୍କୁ ଏ ନେଇ ଅଭିଯୋଗ ଜଣାଇଥିଲେ। ପୋଲିସ କମିଶନରଙ୍କ ନିର୍ଦ୍ଦେଶକ୍ରମେ ଲକ୍ଷ୍ମୀସାଗର ଥାନା ପୋଲିସ ଏକ କେସ୍ (ନଂ. ୧୦୦/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଗତ ଶନିବାର ଥାନାରେ ପୀଡ଼ିିତାଙ୍କ ବୟାନ ରେକର୍ଡ କରିବା ସହ ଡାକ୍ତରୀ ମାଇନା କରାଇଥିଲା।
