ଭୁବନେଶ୍ୱର,୬।୬ (ବ୍ୟୁରୋ): ଫ୍ରିଜ୍ରେ ମଦ ପେଟି ରଖିବାକୁ ମନା କରିବାରୁ ଦୋକାନୀଙ୍କୁ ମାଡ। ଚନ୍ଦ୍ରଶେଖରପୁର ଥାନା ଅନ୍ତର୍ଗତ ନିଳାଦ୍ରି ବିହାର ଅଞ୍ଚଳରେ ଏହି ଘଟଣା ଘଟିଥିବାବେଳେ ସିସିଟିଭିରେ ଏହି ଦାଦାଗିରିର ଦୃଶ୍ୟ ରହିଛି। ଦୋକାନ ମାଲିକ ଚିନ୍ମୟ ବିଶ୍ୱାଳ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି। ଅଭିଯୋଗ ଅନୁସାରେ, ସ୍ଥାନୀୟ ଅଞ୍ଚଳରେ ଚିନ୍ମୟଙ୍କର ଏକ ଭେରାଇଟ ଷ୍ଟୋର ରହିଛି। ଗତ ୨ ତାରିଖ ସା ୭ଟା ୩୦ରେ କେତେଜଣ ଯୁବକ ତାଙ୍କ ଦୋକାନକୁ ଆସି ଫ୍ରିଜରେ ମଦ ପେଟି ରଖିବାକୁ କହିଥିଲେ। ସେ ମନା କରିବାରୁ ସମ୍ପୃକ୍ତ ଯୁବକମାନେ ଧମକ ଦେଇ ସେଠାରେ ପଳାଇଥିଲେ। ପୁଣି ସେମାନେ ରାତି ୧୦ଟାରେ ଆସି ଚିନ୍ମୟଙ୍କୁ ଗାଳିଗୁଲଜ କରିବା ସହ ଦୋକାନରୁ ଟାଣିନେଇ ରାସ୍ତାରେ ପକାଇ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଚିନ୍ମୟଙ୍କ ଚିତ୍କାର ଶୁଣି ଘଟଣାସ୍ଥଳକୁ ସ୍ଥାନୀୟ ଲୋକେ ଆସିଯିବାରୁ ଦୁର୍ବୃତ୍ତମାନେ ଫେରାର ହୋଇଯାଇଥିଲେ।
