ନୂଆଦିଲ୍ଲୀ,୩୧।୩: ଦେଶର ଉତ୍ତରପୂର୍ବ ରାଜ୍ୟମାନଙ୍କ ପାଇଁ ବଡ଼ ଘୋଷଣା କରିଛନ୍ତି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା। ନାଗାଲାଣ୍ଡ, ଆସାମ ଏବଂ ମଣିପୁର ଆଦି ଉତ୍ତରପୂର୍ବ ରାଜ୍ୟ ଉପରେ ଲଗାଯାଇଥିବା ବିବାଦୀୟ ସଶସ୍ତ୍ର ବଳ (ସ୍ବତନ୍ତ୍ର ଅଧିକାର) ଆଇନକୁ ହଟାଇ ଦିଆଯିବ।
ଏହି ପଦକ୍ଷେପ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶ୍ରେୟ ଦେଇ ଶାହା କହିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କ କ୍ରମାଗତ ଉଦ୍ୟମ ଏବଂ ବିଭିନ୍ନ ଚୁକ୍ତି ଜରିଆରେ ଉତ୍ତରପୂର୍ବ ରାଜ୍ୟରେ ଉଗ୍ରବାଦର ଅନ୍ତ ଘଟିଛି ଏବଂ ଶାନ୍ତି ଫେରିବାକୁ ଯାଉଛି। ଉନ୍ନତ ସୁରକ୍ଷା ପରିସ୍ଥିତି ଏବଂ ବିକାଶର ଦ୍ରୁତ ଗତି ଯୋଗୁ ଏହା ସମ୍ଭବ ହୋଇପାରିଛି।
ଉଲ୍ଲେଖଯୋଗ୍ୟ, ସଶସ୍ତ୍ର ବଳ ସ୍ବତନ୍ତ୍ର ଅଧିକାର ଆଇନ (ଆଫସା) ସୁରକ୍ଷା ବଳକୁ ଯେକୌଣସି ସ୍ଥାନରେ ଅପରେଶନ କରିବାକୁ ଅନୁମତି ଦେଉଥିଲା। ଏହା ବଳରେ ବିନା କୌଣସି ଓ୍ବାରେଣ୍ଟରେ ଯେକୌଣସି ବ୍ୟକ୍ତି ଗିରଫ ମଧ୍ୟ କରାଯାଏ। ଉତ୍ତରପୂର୍ବ ଅଞ୍ଚଳରେ ଉଗ୍ରବାଦକୁ କାଉଣ୍ଟର କରିବା ପାଇଁ ସେନାକୁ ଏହି ଆଇନ ଦ୍ୱାରା ସ୍ବତନ୍ତ୍ର ଅଧିକାର ଦିଆଯାଇଥିଲା।
