ବରଗଡ଼ ଅଫିସ୍,୮।୩: ବରଗଡ଼ ଜିଲାରେ ପୌର ନିର୍ବାଚନ ପାଇଁ ନାମାଙ୍କନ ଦାଖଲ ଶେଷ ହୋଇଛି। ଏହାପରେ ପୌର ପରିଷଦ ଦଖଲ ପାଇଁ ସବୁଦଳଙ୍କ କସରତ ଆରମ୍ଭ ହୋଇଛି। ପଞ୍ଚାୟତ ଭୋଟ୍ବେଳେ ଗ୍ରାମାଞ୍ଚଳରେ ଯେଭଳି ବିଭିନ୍ନ ରାଜନୈତିକ ଦଳର ନେତାମାନେ ଡେରା ପକାଇଥିଲେ ଏବେ ସବୁଦଳର ନେତା ସହର ମଧ୍ୟରେ ରହି ନିର୍ବାଚନ ରଣନୀତି ପାଇଁ ସଜବାଜ ହେଉଥିବା ପରିଲକ୍ଷିତ ହୋଇଛି। ଦଳୀୟ ନେତାଙ୍କ ବାସଭବନରୁ ଆରମ୍ଭ କରି ଦଳୀୟ କାର୍ଯ୍ୟାଳୟରେ ଭିଡ଼ ଜମୁଛି ।
ଜିଲାର ବରଗଡ଼ ମ୍ୟୁନିସିପାଲିଟି ସମତେ ବରପାଲି, ପଦ୍ମପୁର, ବିଜେପୁର ଏନ୍ଏସିରେ ପୌର ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି। ଏଥର ସିଧାସଳଖ ପୌରାଧ୍ୟକ୍ଷ ନିର୍ବାଚନ ହେଉଥିବାରୁ ଏହି ପଦବୀ ହାତେଇବା ପାଇଁ ସବୁଦଳ ମଧ୍ୟରେ ଅଙ୍କକଷା ଚାଲିଛି। ଏହି କ୍ରମରେ ଦଳ ପକ୍ଷରୁ ଅଧ୍ୟକ୍ଷ ପଦବୀ ପାଇଁ ପ୍ରାର୍ଥୀ ଦିଆଯାଇଛି। ମାତ୍ର କେତେକ କ୍ଷେତ୍ରରେ ଏହି ପଦବୀ ପାଇଁ ଏକାଧିକ ଆଶାୟୀ ଥିବାବେଳେ ଦଳୀୟ ଟିକେଟ୍ ନ ମିଳିବାରୁ ସେମାନଙ୍କୁ ନିରାଶ ହେବାକୁ ପଡ଼ିଛି। ସମ୍ପୃକ୍ତ ପ୍ରାର୍ଥୀମାନେ ସ୍ବାଧୀନ ଭାବେ ନାମାଙ୍କନ ଦାଖଲ କରିଛନ୍ତି । ଏହା ସମ୍ପୃକ୍ତ ଦଳ ପାଇଁ ଅଡୁଆ ସାଜିଛି ।
ବରଗଡ଼ ମ୍ୟୁନିସିପାଲିଟି ୧୯ ୱାର୍ଡ଼କୁ ନେଇ ଗଠିତ। ବିଜେଡ଼ି ନିଜ ଗଡ଼ ଭାବେ ଏହି ମ୍ୟୁନିସିପାଲିଟିକୁ ଦୀର୍ଘ ବର୍ଷ ଧରି ଦଖଲରେ ରଖି ଆସିଛି । ଏଥର ବିଜେଡି ଏଠାରୁ ପୂର୍ବତନ ପୌର ଉପାଧ୍ୟକ୍ଷା କଳ୍ପନା ମାଝୀଙ୍କୁ ଅଧ୍ୟକ୍ଷା ପ୍ରାର୍ଥୀ ଭାବେ ନିର୍ବାଚନ ମଇଦାନକୁ ଛାଡ଼ିଛି। ସେହିପରି ଭାଜପାରୁ ଅନୁରାଧା ଅଗ୍ରୱାଲ, କଂଗ୍ରେସରୁ ତପସ୍ବିନୀ ବେହେରା, ବହୁଜନ ସମାଜ ପାର୍ଟି (ବିଏସ୍ପି)ରୁ ଲଲି କୁମ୍ଭାର, ଆମ ଆଦ୍ମୀ ପାର୍ଟି(ଆପ୍)ରୁ ଦେବୀକା ଦେହେରୀ ନାମାଙ୍କନ ଦାଖଲ କରିଛନ୍ତି । ଏହାସହିତ ସୁସ୍ମିତା ଦାଶ, ପ୍ରୀତିକନା ମଜୁମଦାର, ଦେବୀକା ଶିକା, ମାମି ମିଶ୍ର, ରାଜକୁମାରୀ ଦାଶ, ଜ୍ୟୋତ୍ସ୍ନା ଚୌହାନ ପ୍ରମୁଖ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ମଇଦାନକୁ ଓହ୍ଲାଇଛନ୍ତି । ସେହିପରି ପ୍ରତି ୱାର୍ଡ଼ରେ କାଉନସିଲର ପଦବୀ ପାଇଁ ଦଳୀୟ ପ୍ରାର୍ଥୀ ରହିଥିବାବେଳେ ସ୍ବାଧୀନ ପ୍ରାର୍ଥୀ ମଧ୍ୟ ରହିଛନ୍ତି ।
ସେହିପରି ୧୧ୱାର୍ଡ଼ ବିଶିଷ୍ଟ ବରପାଲି ଏନ୍ଏସି ଏକଦା କଂଗ୍ରେସ ଦଖଲରେ ରହିଥିଲା। ତେବେ ପୂର୍ବତନ ବିଧାୟକ ସୁବଳ ସାହୁଙ୍କ ଦେହାନ୍ତ ଏବଂ ତାଙ୍କ ସ୍ତ୍ରୀ ରୀତା ବିଜେଡ଼ିରେ ସାମିଲ ହେବା ପରେ ଉକ୍ତ ଏନ୍ଏସିରେ ବିଜେଡ଼ିର ଦବ୍ଦବା ଆରମ୍ଭ ହୋଇଛି। ଦଳ ଏଠାରୁ ପୂର୍ବତନ ପୌର ଉପାଧ୍ୟକ୍ଷ ପ୍ରଦ୍ୟୁମ୍ନ ତ୍ରିପାଠୀଙ୍କୁ ପ୍ରାର୍ଥୀ କରିଛି । ସେହିପରି ଭାଜପାରୁ ଅଜିତ କୁମାର ଦାଶ ଏବଂ କଂଗ୍ରେସରୁ ପୂର୍ବତନ ମନ୍ତ୍ରୀ ରିପୁନାଥ ସେଠଙ୍କ ପୁଅ ଅଭିଷେକ ଅଧ୍ୟକ୍ଷ ପଦବୀ ପାଇଁ ନିର୍ବାଚନ ମଇଦାନକୁ ଓହ୍ଳାଇଛନ୍ତି । ପଦ୍ମପୁର ଏନ୍ଏସିରେ ବିଜେଡ଼ିରୁ ସାବିତ୍ରୀ ବାଗ, ଭାଜପାରୁ ରଞ୍ଜୁ ସେଠ ଏବଂ କଂଗ୍ରେସରୁ ନିରୁପମା ସେଠ ଅଧ୍ୟକ୍ଷା ପଦବୀ ପାଇଁ ପ୍ରାର୍ଥୀ ହୋଇଛନ୍ତି । ସେହିପରି ବିଜେପୁର ଏନ୍ଏସିରେ ବିଜେଡ଼ିରୁ ସୀତା ବାରିକ, ଭାଜପାରୁ ପଦ୍ମାବତୀ ଦେହେରୀ ଏବଂ କଂଗ୍ରେସରୁ ସବିତା ଛୁରା ନାମାଙ୍କନ ଦାଖଲ କରିଛନ୍ତି ।
