ଜୁନାଗଡ଼,୨୮।୬(ଡି.ଏନ୍.ଏ.)-କଳାହାଣ୍ଡି ଜିଲା ଜୁନାଗଡ଼ ବ୍ଲକ କଳିଆକୁଣ୍ଡଲ ପଞ୍ଚାୟତ ଓ ଆଟିଗାଁ ପଞ୍ଚାୟତର ୫୦ରୁ ଊର୍ଦ୍ଧ୍ୱ ବ୍ୟକ୍ତି ଗତ ଏପ୍ରିଲ ମାସରେ ନିକଟସ୍ଥ କେଲିଆ ସଂରକ୍ଷିତ ଜଙ୍ଗଲରୁ କେନ୍ଦୁପତ୍ର ସଂଗ୍ରହ କରିଥିଲେ। ହେଲେ ସରକାରଙ୍କ ପକ୍ଷରୁ ସେମାନଙ୍କୁ ଟ୍ରାନଜିଟ ପରମିଟ ମିଳୁ ନ ଥିବାରୁ କେନ୍ଦୁପତ୍ରକୁ ବିକ୍ରି କରି ପାରୁନାହାନ୍ତି। ଫଳରେ ସଂଗ୍ରହ କରାଯାଇଥିବା କେନ୍ଦୁପତ୍ର ଆସ୍ତେ ଆସ୍ତେ ନଷ୍ଟ ହେବାକୁ ବସିଛି। ଏହାକୁ ନେଇ କେନ୍ଦୁପତ୍ର ସଂଗ୍ରହକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ମିଳିଥିବା ସୂଚନା ଅନୁଯାୟୀ, ଜୁନାଗଡ଼ ବ୍ଲକ କଳିଆକୁଣ୍ଡଲ ଓ ଆଟିଗାଁ ପଞ୍ଚାୟତ ମଧ୍ୟରେ କେଲିଆ ସଂରକ୍ଷିତ ଜଙ୍ଗଲ ରହିଛି। ଜଙ୍ଗଲ ଅଧିକାର ଆଇନ ଅନୁଯାୟୀ ଜଙ୍ଗଲ ସୀମା ମଧ୍ୟରେ ରହୁଥିବା ଜନଜାତି କିମ୍ବା ପାରମ୍ପରିକ ଜଙ୍ଗଲ ବାସିନ୍ଦାଙ୍କୁ କେନ୍ଦୁପତ୍ର ସଂଗ୍ରହ କରିବା ପାଇଁ ଅନୁମତି ଦିଆଯାଇଛି। ସେହି ଅନୁସାରେ କଳିଆକୁଣ୍ଡଲ ପଞ୍ଚାୟତ କେଲିଆ, ମୁଣ୍ଡିଗୁଡା ଓ ଆଟିଗାଁ ଗ୍ରାମବାସୀ ସ୍ଥାନୀୟ ଜଙ୍ଗଲରୁ କେନ୍ଦୁପତ୍ର ସଂଗ୍ରହ କରିବା ପାଇଁ ନିଜ ନିଜ ଗାଁରେ ଗ୍ରାମସଭା ଡାକିଥିଲେ। ଏହାପରେ କେନ୍ଦୁପତ୍ର ସଂଗ୍ରହ କରିବା ପାଇଁ ଏକ କମିଟି ଗଠନ ହୋଇଥିଲା। ଏହି କମିଟି ଅନୁଯାୟୀ ୫୦ ଜଣ ମହିଳା,ପୁରୁଷ ଗତ ଏପ୍ରିଲ ଶେଷରୁ ମେ ପ୍ରଥମ ସପ୍ତାହ ପର୍ଯ୍ୟନ୍ତ ସ୍ଥାନୀୟ ଜଙ୍ଗଲରୁ କେନ୍ଦୁପତ୍ର ସଂଗ୍ରହ କରିଥିଲେ। ପରେ କେନ୍ଦୁପତ୍ରକୁ ଶୁଖାଇ ବିଡା ବାନ୍ଧି କେଲିଆ ଗ୍ରାମର ୨ଟି ଘରେ ଗଚ୍ଛିତ ରଖିଥିଲେ। ସେହି କେନ୍ଦୁପତ୍ରକୁ ସରକାର କିଣିବେ ବୋଲି ସେମାନେ ଆଶା ରଖିଥିବାବେଳେ ତାଙ୍କ ଆଶା ଏବେ ଆଶାରେ ରହିଯାଇଛି। କାରଣ ତାଙ୍କ ପାଖରେ ଟ୍ରାନଜିଟ୍ ପରମିଟ ନ ଥିବାରୁ ଏବେ ସେମାନେ କେନ୍ଦୁପତ୍ରକୁ ବିକ୍ରି କରିପାରୁନାହାନ୍ତି। ଏ ନେଇ ସେମାନେ ଜିଲା ବନଖଣ୍ଡ ଅଧିକାରୀ (କେନ୍ଦୁପତ୍ର),କଳାହାଣ୍ଡି ଜିଲାପାଳ, ଜୁନାଗଡ଼ ବିଧାୟକ ତଥା ଶକ୍ତିମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର, ପିସିସିଏଫ୍, ବିଭାଗୀୟ ସଚିବ,ମୁଖ୍ୟମନ୍ତ୍ରୀଙ୍କୁ ଲିଖିତ ଭାବେ ଜଣାଇଛନ୍ତି। ଏହାପରେ ବି କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ସେମାନେ ଅଭିଯୋଗ କରିଛନ୍ତି। ଯଥାଶୀଘ୍ର ଏହି ସମସ୍ୟାର ସମାଧାନ କରା ନ ଗଲେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମେ ଧାରଣା ଦେବୁ। ଜଙ୍ଗଲରୁ ସଂଗ୍ରହ କରିଥିବା କେନ୍ଦୁପତ୍ରକୁ ସେଠାରେ ପୋଡିଦେବାକୁ ବାଧ୍ୟ ହେବୁ ବୋଲି ସଂଗ୍ରହକାରୀମାନେ ଲିଖିତ ଭାବେ ଚେତାବନୀ ଦେଇଛନ୍ତି। ଏ ନେଇ ଜିଲା ବନ ଖଣ୍ଡ ଅଧିକାରୀ(କେନ୍ଦୁପତ୍ର) ମଳୟ ଦାଶଙ୍କୁ ପଚାରିବାରୁ ଟ୍ରାନଜିଟ ପରମିଟ ଦେବାକୁ ମୋ ପାଖରେ କ୍ଷମତା ନାହିଁ କହି ଏହି ପ୍ରସଙ୍ଗକୁ ଏଡାଇ ଯାଇଥିଲେ। ତେବେ ଟ୍ରାନଜିଟ୍ ପରମିଟ୍ କିଏ ପ୍ରଦାନ କରିବ ସେ ସମ୍ପର୍କରେ ସ୍ପଷ୍ଟ ହୋଇନାହିଁ। ଯାହାକୁ ନେଇ କେନ୍ଦୁପତ୍ର ସଂଗ୍ରହକାରୀଙ୍କ ଚିନ୍ତା ବଢ଼ିଛି।