କେସିଙ୍ଗା ତା ୧୦।୮,( ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ପାଷ୍ଟିକୁଡ଼ି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିନସ୍ଥ ଶିରୋଲ ଗ୍ରାମ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ପଛ ପଟେ, ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଆୟୁଷ୍ମାନ ଆରୋଗ୍ୟ କେନ୍ଦ୍ର(ଉପ ସ୍ବାସ୍ଥ୍ୟ କେନ୍ଦ୍ର) ନିର୍ମାଣ କାର୍ଯ୍ୟ ସରିଛି। ବିଲ୍ଡିଂର ରଙ୍ଗ ବୋଲାଠାରୁ କବାଟ,ଝରକା ସବୁ କାମ ମଧ୍ୟ ଶେଷ ହୋଇଛି। କିନ୍ତୁ ବିଦ୍ୟୁତ ସଂଯୋଗ ଏପର୍ଯ୍ୟନ୍ତ ହୋଇ ନାହିଁ। ଶିରୋଲ ଗ୍ରାମ ପଞ୍ଚାୟତରେ ପ୍ରଥମ କରି ଏହି ନୂତନ ଉପସ୍ବାସ୍ଥ୍ୟ କେନ୍ଦ୍ର ଖୋଲା ଯାଇଛି। ଏହା ଦ୍ୱାରା ଗରିବ ଓ ସାଧାରଣ ଲୋକଙ୍କ ପାଇଁ ବିନା ମୂଲ୍ୟରେ ଉପଯୁକ୍ତ ଚିକିତ୍ସା ପାଇବା ପାଇଁ ସୁବିଧା ବ୍ୟବସ୍ଥା କରାଯାଇଛି। ଏହି କେନ୍ଦ୍ରଟି ୩୯ ଲକ୍ଷ ଟଙ୍କା ବ୍ୟୟ ଅଟକଳରେ ବିନା ସୂଚନା ଫଳକରେ ନିର୍ମାଣ ହୋଇଛି। ଏହା ୧୫ ଅର୍ଥ ଦଶ କମିଶନ ଯୋଜନା ପକ୍ଷରୁ ନିର୍ମାଣ କରାଯାଇଛି। କେସିଙ୍ଗାର ଜଣେ ଠିକାଦାରଙ୍କ ଦାରା ନିର୍ମାଣ କାରାଯାଇଛି।
ନିର୍ମାଣ ହୋଇ ଆଜକୁ ପ୍ରାୟ ୫ମାସରୁ ଉଦ୍ଧର୍ବ ହେଲାଣି କାର୍ଯ୍ୟ କାରୀ କାରାଯାଉ ନାହିଁ । ଏହି କେନ୍ଦ୍ରଟି ଉଦଘାଟନ କଲେ ପ୍ରାଥମିକ ଚିକିତ୍ସା ପାଇଁ ପଞ୍ଚାୟତର ଶିରୋଲ, ପୋଢ଼ଖମ୍ବ, ମାଝୀପଡା, ସାହୁପଡା, ଡୁମେର ମୁଣ୍ଡା, ଆଦି ଗ୍ରାମର ଗରିବ ଶ୍ରେଣୀର ଲୋକମାନେ ଚିକିତ୍ସା ପାଇଁ ଉପକୃତ ହୋଇପାରନ୍ତେ। କିନ୍ତୁ ଗରିବ ଶ୍ରେଣୀର ଲୋକମାନେ କେସିଙ୍ଗା, ଭବାନୀପାଟଣାକୁ ଯାଇ ହଇରାଣ ହେବା ସହ ଅଧିକ ଖର୍ଚ୍ଚରେ ପଡୁଛନ୍ତି। ବର୍ତ୍ତମାନ ବର୍ଷା ଋତୁ ଲାଗି ରହିଛି । ଗରିବ ଶ୍ରେଣୀର ଲୋକେ ଋତୁକାଳୀନ ଜର, କାଶ, ଶର୍ଦ୍ଦିରେ ପୀଡ଼ିତ ହେଉଛନ୍ତି । ଏଣୁ ଏହି ଆୟୁଷ୍ମାନ ଆରୋଗ୍ୟ ମନ୍ଦିରକୁ ତୁରନ୍ତ ଉଦଘାଟନ କରାଗଲେ ଲୋକେ ଚିକିତ୍ସାରୁ ଲାଭ ଉଠାଇ ପାରନ୍ତେ ବୋଲି ଲୋକେ ଦାବି କରୁଛନ୍ତି। ଏ ସଂକ୍ରାନ୍ତରେ ଦାଇତ୍ୟରେ ଥିବା କନିଷ୍ଠ ଯନ୍ତ୍ରୀ ଭୁବନ ଭୋଇଙ୍କୁ ପଚାରିବାରୁ ବିଲ୍ଡିଂ କାମ ସମ୍ପୂର୍ଣ୍ଣ ହୋଇ ସ୍ବାସ୍ଥ୍ୟ ବିଭାଗକୁ ହସ୍ତାନ୍ତର କରାଯାଇଛି ବୋଲି କହିଥିଲେ। ଏ ନେଇ ପାଷ୍ଟିକୁଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଇନଚାର୍ଜ ଡାକ୍ତର ଅବିନାଶ ପ୍ରଧାନଙ୍କୁ ବୁଝିବାରୁ ଏହା ହ୍ୟାଣ୍ଡଓଭର ହୋଇନାହିଁ ବୋଲି କହିଛନ୍ତି। ଏହାସହ ବିଜୁଳି ସଂଯୋଗ ବି ବାକି ଅଛି। ଅଞ୍ଚଳରେ ଆଉ କେତୋଟି କେନ୍ଦ୍ର କାମ ଚାଲୁଛି, ସ୍ବାସ୍ଥ୍ୟ ବିଭାଗ ପକ୍ଷରୁ ଚିଠି ଆସିନି । କାମ ସବୁ ସମ୍ପୂର୍ଣ୍ଣ ହେଲେ ଭରଚୁଆଲ ମାଧ୍ୟମରେ ଏକା ସାଙ୍ଗରେ ଉଦଘାଟନ କରାଯିବ ବୋଲି ସେ କହିଥିଲେ । ସେହିପରି କେସିଙ୍ଗା ବ୍ଲକର ବୋରିଆ ଗ୍ରାମରେ ମଧ୍ୟ ଏହିଭଳି ଅବସ୍ଥା ଦେଖିବା ମିଳିଛି।