ବରଗଡ଼,୧୭।୭(ପ୍ରେମାନନ୍ଦ ଖମାରୀ)- ବରଗଡ଼ ଜିଲାରେ ଗତ ଜୁନ୍ ମାସ ୩୦ ତାରିଖରୁ ରବିଧାନ ସଂଗ୍ରହ ପ୍ରକ୍ରିୟା ଶେଷ ହୋଇଯାଇଥିଲେ ମଧ୍ୟ ହଜାର ହଜାର ଚାଷୀ ଧାନ ବିକ୍ରିରୁ ବଞ୍ଚିତ ହୋଇଛନ୍ତି। ଟୋକନ ପାଇବାରୁ ବଞ୍ଚିତ ହେବା କାରଣରୁ ଜିଲ୍ଲାର ଅନେକ ଚାଷୀ ନିଜର ଅମଳ ଧାନ ବିକ୍ରି କରିପାରି ନାହାନ୍ତି, ଯାହାଫଳରେ ସେମାନଙ୍କୁ ପରିବାର ଗୁଜୁରାଣ ମେଣ୍ଟାଇବା ସହ ଆଗାମୀ ଖରିଫ୍ ଚାଷକାର୍ଯ୍ୟ ଆଗକୁ ବଢ଼ାଇବାରେ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଧାନ ବିକ୍ରି ପାଇଁ ଟୋକନ ଦାବି କରି ଚାଷୀମାନେ ସ୍ଥାନୀୟ ଜନପ୍ରତିନିଧିଙ୍କ ଠାରୁ ଆରମ୍ଭ କରି ଜିଲା ପ୍ରଶାସନ ଓ ସରକାରୀ କଳକୁ ବାରମ୍ବାର ଗୁହାରି କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଶେଷରେ ନିରାଶ ହୋଇ ଶୁକ୍ରବାର ସଂଯୁକ୍ତ କୃଷକ ସଂଗଠନ ବରଗଡ଼ ଜିଲା ଓକିଲ ସଂଘର ଦ୍ୱାରସ୍ଥ ହୋଇଛି ଏବଂ ଏହି ସମସ୍ୟାର ସମାଧାନ ପାଇଁ ଆଇନଗତ ସହାୟତା ଯୋଗାଇ ଦେବାକୁ ନିବେଦନ କରିଛି।
ସଂଗଠନ ପକ୍ଷରୁ ଜିଲା ଓକିଲ ସଂଘର ସଭାପତି ଭୀଷ୍ମଦେବ ସରାଫ ଓ ସମ୍ପାଦକ ହରିହର ପ୍ରଧାନଙ୍କୁ ଏକ ଲିଖିତ ନିବେଦନ ପତ୍ର ପ୍ରଦାନ କରାଯାଇଛି। ଚଳିତ ବର୍ଷ ରାଜ୍ୟରେ ମୋଟ ୯୭ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହୋଇଥିବା ବେଳେ (ଯାହା ଗତବର୍ଷ ତୁଳନାରେ ୫ ଲକ୍ଷ ମେଟ୍ରିକ ଟନ ଅଧିକ) ଭାତହାଣ୍ଡି କୁହାଯାଉଥିବା ବରଗଡ଼ ଜିଲ୍ଲାରେ ଓଲଟା ସ୍ଥିତି ଦେଖିବାକୁ ମିଳିଛି। ଜିଲାରେ ଚଳିତ ଖରିଫ ଋତୁରେ ୩୦ ହଜାର କୁଇଣ୍ଟାଲ କମ୍ ଧାନ କିଣାଯାଇଥିବା ବେଳେ ପ୍ରାୟ ୯ ହଜାର ଚାଷୀ ଧାନ ବିକ୍ରିରୁ ବଞ୍ଚିତ ହୋଇଛନ୍ତି। ରବି ଋତୁରେ ମଧଁ ସମାନ ସମସ୍ୟା ଉପୁଜିଛି, ଯେଉଁଠି ଆବଶ୍ୟକ କାଗଜପତ୍ର ଦେଇ ପଞ୍ଜିକୃତ ହୋଇଥିବା ୧ ଲକ୍ଷ ୫ ହଜାର ୪୯୪ ଜଣ ଚାଷୀଙ୍କ ମଧ୍ୟରୁ ୫,୦୮୯ ଜଣ ଚାଷୀଙ୍କ ପାଖକୁ ଆଦୌ ଟୋକନ ଆସିନାହିଁ ଏବଂ ପ୍ରାୟ ୨୫ ହଜାର ଚାଷୀଙ୍କୁ ଜମି ତୁଳନାରେ ବହୁତ କମ୍ ପରିମାଣର ଟୋକନ ମିଳିଛି।
ଏହି ସମସ୍ୟାକୁ ନେଇ ଅସନ୍ତୁଷ୍ଟ ଚାଷୀମାନେ ପୂର୍ବରୁ ଝାରବନ୍ଧ ବ୍ଲକ ଡଭାରେ ୧୩ ଦିନ ଧରି ଆମରଣ ଅନଶନ କରିବା ସହ ଧାନ ବିକ୍ରି ଆଶାରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ୭୨ ଦିନ କାଳ ଧାରଣା ଦେଇଥିଲେ। ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଚାଷୀମାନେ ପୁଣିଥରେ ବ୍ୟକ୍ତିଗତ ଭାବେ ଆବେଦନ କରିଥିଲେ ମଧ୍ୟ ସ୍ଥିତିରେ କୌଣସି ସୁଧାର ଆସିନଥିଲା କିମ୍ବା ଟୋକନ ସଂଶୋଧନ ହୋଇପାରି ନ ଥିଲା।
ପରିସଂଖ୍ୟାନ ଅନୁଯାୟୀ, ଗତ ରବି ଋତୁରେ ଜିଲାରୁ ପ୍ରାୟ ୬୨ ଲକ୍ଷ ୬୩ ହଜାର ୯୯୪ କୁଇଣ୍ଟାଲ ଧାନ କିଣାଯାଇଥିବା ବେଳେ ଚଳିତ ବର୍ଷ ମାତ୍ର ୫୮ ଲକ୍ଷ ୨୭ ହଜାର ୩୬୨ କୁଇଣ୍ଟାଲ ଧାନ କିଣାଯାଇଛି, ଅର୍ଥାତ୍ ପୂର୍ବ ବର୍ଷ ତୁଳନାରେ ୪ ଲକ୍ଷ ୩୬ ହଜାର ୩୬୨ କୁଇଣ୍ଟାଲ ଧାନ କମ୍ କିଣାଯାଇଛି। ଏହାକୁ ନେଇ କୃଷକ ସଂଗଠନଗୁଡ଼ିକ ସିଧାସଳଖ ସରକାରଙ୍କୁ ଟାର୍ଗେଟ କରିଛନ୍ତି ଏବଂ ଧାନ କୁଇଣ୍ଟାଲ ପ୍ରତି ୩୧୦୦ ଟଙ୍କା ଦେବାର ନିର୍ବାଚନୀ ପ୍ରତିଶ୍ରୁତିକୁ ଏକ ପ୍ରତାରଣା ବୋଲି ଆଖ୍ୟା ଦେଇଛନ୍ତି। ଆଇନଗତ ଲଢ଼େଇ ପାଇଁ ଦିଆଯାଇଥିବା ଏହି ସ୍ମାରକପତ୍ର ପ୍ରଦାନ ସମୟରେ ସଂଗଠନର ଉପଦେଷ୍ଟା ରମେଶ ମହାପାତ୍ର ଓ ସୁରେଶ ନିକାଣ୍ଟିଙ୍କ ସମେତ ଅନେକ ଚାଷୀ ପ୍ରତିନିଧି ଉପସ୍ଥିତ ଥିଲେ।
