ଢେଙ୍କାନାଳ ଅଫିସ, ୨୬ା୧୨: ଦ୍ରୁତଗତିରେ ମାଡ଼ିଚାଲିଛି ଓମିକ୍ରନ୍। ଓଡ଼ିଶାର ଶିଶୁଙ୍କୁ ସଂକ୍ରମିତ କଲାଣି ଏହି ମାରାତ୍ମକ ଭୂତାଣୁ। ଭୋଜିଭାତ, ସମାବେଶ, ଗହଳି ବଢ଼ିଲେ ସ୍ଥିତି ଅଣାୟତ୍ତ ହେବା ଆଶଙ୍କା ରହିଛି। ତେଣୁ ଯଥାସମ୍ଭବ ଭିଡ଼ ଏଡ଼ାଇବାକୁ ସତର୍କ କରାଇ ସାରିଲେଣି ବିଶେଷଜ୍ଞ। ବିଶେଷ କରି ଡିସେମ୍ବର ୩୧ ଜୀରୋନାଇଟ୍ ସେଲିବ୍ରେଶନ ଏବଂ ନୂଆବର୍ଷରେ ପର୍ଯ୍ୟଟନସ୍ଥଳୀ, ମଠମନ୍ଦିର ସମେତ ସର୍ବସାଧାରଣ ସ୍ଥାନରେ ଗହଳି ବଢ଼ିବା ସମ୍ଭାବନା ଥିବାରୁ ଢେଙ୍କାନାଳ ଜିଲା ପ୍ରଶାସନ ପକ୍ଷରୁ ଆଗୁଆ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି। ଡିସେମ୍ବର ୨୫ରୁ ଜାନୁୟାରୀ ୨ ଯାଏ ସାଂସ୍କୃତିକ ଓ ଧର୍ମୀୟ କାର୍ଯ୍ୟକ୍ରମ, ଜନସମାଗମକୁ ବାରଣ କରାଯାଇଛି। ତେଣୁ ଗତବର୍ଷ ଭଳି ଏଥର ମଧ୍ୟ ନୂଆବଷ ସେଲିବ୍ରେଶନ ଫିକା ପଡ଼ିବା ସ୍ପଷ୍ଟ ହୋଇଛି।
ଜିଲା ଦେବୋତ୍ତର ବିଭାଗ ପକ୍ଷରୁ ପ୍ରଦତ୍ତ ରିପୋର୍ଟକୁ ଭିତ୍ତିକରି ଜିଲାପାଳ ସରୋଜ କୁମାର ସେଠୀ ନୂତନ ଗାଇଡ୍ଲାଇନ୍ ଜାରି କରିଛନ୍ତି। ତଦନୁଯାୟୀ ୨୯ ମଠମନ୍ଦିର ଏବଂ ପର୍ଯ୍ୟଟନସ୍ଥଳୀରେ ୧୪୪ ଧାରା ଜାରି କରାଯାଇଛି। ତନ୍ମଧ୍ୟରେ ପ୍ରଖ୍ୟାତ ଶୈବପୀଠ କପିଳାସ ଶ୍ରୀଚନ୍ଦ୍ରଶେଖରଜୀଉ, ଉନ୍ନକୋଟୀଶ୍ୱର, ସିଦ୍ଧଗଣେଶ, ଯୋରନ୍ଦା ମହିମାଗାଦି, ତପୋବନ, ଶ୍ରୀ ସିଦ୍ଧ ବଳରାମ, ସପ୍ତଶଯ୍ୟାସ୍ଥିତ ରାମଚନ୍ଦ୍ରଜୀଉ, ବଡ଼ନାଗେନା ନାଗନାଥେଶ୍ୱର, ଗଦାଧରପ୍ରସାଦ ପଶ୍ଚିମେଶ୍ୱର, ଆମ୍ବବାହାଳି ଦତ୍ତାତ୍ରେୟ ସାଇଆଶ୍ରମ, ନାଧରା ରାମଚଣ୍ଡୀ ଠାକୁରାଣୀ ଓ କନକେଶ୍ୱର, ଜୀବନଖୋଲ, ତେନ୍ତୁଳିସିଂହା ରାମେଶ୍ୱର, ହାଟୁଆରି କପିଳେଶ୍ୱର, ସିବୁଳାପଶି ସ୍ବପ୍ନେଶ୍ୱର, ଭୁବନ ବୁଦ୍ଧେଶ୍ୱର, ରାମିଆଳ ନଦୀ ଅବବାହିକା, ଗୁଣ୍ଡିଚାନାଳୀ ନଦୀପଠା, କୁଆଳୋ ସ୍ବପ୍ନେଶ୍ୱର ମହାଦେବ, ସରାଙ୍ଗ ଅନନ୍ତଶୟନ, ରଞ୍ଜାଗୋଳ ଶିମମନ୍ଦିର, ରକଲା କୁଣ୍ଡଳେଶ୍ୱର ଶିବମନ୍ଦିର, ମହାତଳା ମାତଳେଶ୍ୱର ମହାଦେବ, ସିଦ୍ଧେଶ୍ୱର ମହାଦେବ, ବ୍ରହ୍ମପୁରା ଅଲେଖ ମହିମା ଟୁଙ୍ଗୀ, ଚିତ୍ତଲପୁର ଉଗ୍ରେଶ୍ୱର ମହାଦେବ, ଦଣ୍ଡାଧର ଡ୍ୟାମ୍, ଦଦରାଘାଟି ଡ୍ୟାମ, ସାପୁଆ ଡ୍ୟାମ୍ ରହିଛି।
ଏସବୁ ପ୍ରମୁଖ ସ୍ଥାନଗୁଡ଼ିକ ଉପରେ କଡ଼ାନଜର ରଖିବାକୁ ସମ୍ପୃକ୍ତ ଉପଜିଲାପାଳ, ଥାନାଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଏହି କଟକଣା ମଧ୍ୟରେ ଦେବକାର୍ଯ୍ୟ ଯଥାନୀତି ଚାଲିବ। ସରକାରୀ କର୍ମଚାରୀ, ଜରୁରୀ କାର୍ଯ୍ୟରେ ନିୟୋଜିତ ଅଧିକାରୀ ଏବଂ ଦେବୋତ୍ତର କର୍ମଚାରୀ, ସେବାୟତମାନେ କଟକଣାରୁ ମୁକ୍ତ ରହିବେ ବୋଲି ପ୍ରକାଶିତ ବିଜ୍ଞପ୍ତିରେ ଉଲ୍ଲେଖ ରହିଛି।
