ରାଜ୍ୟର କୌଣସି ଶିକ୍ଷକ ଶିକ୍ଷାନୁଷ୍ଠାନ ନାକ୍‌ ମାନ୍ୟତା ପାଇନାହିଁ
8:58 amJuly 10, 2022July 10, 2022 / 09

ଭୁବନେଶ୍ୱର, ୧୦।୭(ବ୍ୟୁରୋ): ରାଜ୍ୟରେ ପ୍ରାୟ ୭୦ରୁ ଊର୍ଦ୍ଧ୍ୱ ଶିକ୍ଷକ ଶିକ୍ଷାନୁଷ୍ଠାନ ରହିଛି। କିନ୍ତୁ ଏ ପର୍ଯ୍ୟନ୍ତ ଗୋଟିଏ ବି ଶିକ୍ଷକ ଶିକ୍ଷାନୁଷ୍ଠାନ ନାକ୍‌ ମାନ୍ୟତା ହାସଲ କରିପାରି ନାହିଁ। ବିଶ୍ୱବିଦ୍ୟାଳୟ ଅନୁଦାନ ଆୟୋଗ(ୟୁଜିସି) ଭାରତ ସରକାରଙ୍କ ୨୦୧୩ ଜାନୁୟାରୀ ୧୯ ଗେଜେଟ ଅନୁସାରେ, ସମସ୍ତ ଉଚ୍ଚ ଶିକ୍ଷାନୁଷ୍ଠାନ ନାକ୍‌ ମାନ୍ୟତା ହାସଲ କରିବା ବାଧ୍ୟତାମୂଳକ କରାଯାଇଛି। କିନ୍ତୁ ଜାତୀୟ ଶିକ୍ଷକ ଶିକ୍ଷା ପରିଷଦ(ଏନ୍‌ସିଟିଇ) ଏନେଇ କୌଣସି ନିର୍ଦ୍ଦେଶନାମା ଜାରି କରିନାହାନ୍ତି। ତେଣୁ ଏ ପର୍ଯ୍ୟନ୍ତ ଓଡ଼ିଶାର କୌଣସି ଶିକ୍ଷକ ଶିକ୍ଷାନୁଷ୍ଠାନ ନାକ୍‌ ମାନ୍ୟତା ହାସଲ କରିନାହାନ୍ତି ବୋଲି ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ ବିଧାନସଭାରେ କହିଛନ୍ତି। ନାକ୍‌ ମାନ୍ୟତା ପ୍ରଦାନ ସମ୍ପର୍କରେ ବିଧାୟକ ମୋହନ ଚରଣ ମାଝୀଙ୍କ ପ୍ରଶ୍ନର ଉତ୍ତର ରଖି ମନ୍ତ୍ରୀ କହିଲେ, ନାକ୍‌ ମାନ୍ୟତା ହାସଲ କରିବା ପାଇଁ ଶିକ୍ଷାନୁଷ୍ଠାନଗୁଡ଼ିକ ଅତି କମ୍‌ରେ ୨ଟି ବ୍ୟାଚ୍‌ ଛାତ୍ରୀଛାତ୍ର ପାସ୍‌ କରିଥିବା ଆବଶ୍ୟକ କିମ୍ବା ଶିକ୍ଷାନୁଷ୍ଠାନଗୁଡ଼ିକ ୬ବର୍ଷ ପୂରଣ କରିଥିବା ଆବଶ୍ୟକ। ଏସବୁ ସର୍ତ୍ତାବଳୀକୁ ପୂରଣ କରିବାରେ ବର୍ତ୍ତମାନ ରାଜ୍ୟର ୧୬ଟି ଶିକ୍ଷାନୁଷ୍ଠାନର ଯୋଗ୍ୟତା ଅଛି। ସେଗୁଡ଼ିକ ହେଲା ବ୍ରହ୍ମପୁରସ୍ଥିତ ଦିବାକର ପଟ୍ଟନାୟକ ଇନ୍‌ଷ୍ଟିଚ୍ୟୁଟ୍‌ ଅଫ୍‌ ଆଡ୍‌ଭାନ୍ସଡ ଷ୍ଟଡିଜ୍‌ ଇନ୍‌ ଏଜୁକେଶନ, କଟକର ରାଧାନାଥ ଇନ୍‌ଷ୍ଟିଚ୍ୟୁଟ୍‌ ଅଫ୍‌ ଆଡ୍‌ଭାନ୍ସଡ ଷ୍ଟଡିଜ୍‌ ଇନ୍‌ ଏଜୁକେଶନ, ଭୁବନେଶ୍ୱରର ନଳିନୀ ଦେବୀ ଓମେନ୍‌ସ କଲେଜ ଅଫ୍‌ ଟିଚର ଏଜୁକେଶନ, ଫକୀରପୁରର ଏଏ ଟ୍ରେନିଂ କଲେଜ, ଅନୁଗୋଳର ନବକୃଷ୍ଣ ଚୌଧୁରୀ କଲେଜ ଅଫ୍‌ ଟିଚର ଏଜୁକେଶନ, କୋରାପୁଟର ଡିଏଭି କଲେଜ ଅଫ୍‌ ଟିଚର ଏଜୁକେଶନ, କଟକର ହିନ୍ଦୀ ଟିଚର ଟ୍ରେନିଂ ଇନ୍‌ଷ୍ଟିଚ୍ୟୁଟ୍‌, ଭଞ୍ଜନଗରର କେଏସ୍‌ୟୁବି କଲେଜ ଅଫ୍‌ ଟିଚର ଏଜୁକେଶନ, ରାଉରକେଲାର କଲେଜ ଅଫ୍‌ ଟିଚର ଏଜୁକେଶନ, ବାରିପଦାର ୟୁଜି କଲେଜ ଅଫ୍‌ ଟିଚର ଏଜୁକେଶନ, ସମ୍ବଲପୁରର ଡ. ପିଏମ୍‌ ଆଇଏଏସ୍‌ଇ, ବାଲେଶ୍ୱରର କଲେଜ ଅଫ୍‌ ଟିଚର ଏଜୁକେଶନ, ବଲାଙ୍ଗୀର କଲେଜ ଅଫ୍‌ ଟିଚର ଏଜୁକେଶନ, ଫୁଲବାଣୀ ସରକାରୀ ଟିଚର ଟ୍ରେନିଂ କଲେଜ, କନ୍ଧମାଳର ସରକାରୀ ବିଏଡ୍‌ ଟ୍ରେନିଂ କଲେଜ ଏବଂ ଭବାନୀପାଟଣା କଲେଜ ଅଫ୍‌ ଟିଚର ଏଜୁକେଶନ। ଖୁବ୍‌ଶୀଘ୍ର ସମସ୍ତ ଶିକ୍ଷାନୁଷ୍ଠାନ ନାକ୍‌ ମାନ୍ୟତା ହାସଲ କରିବା ପାଇଁ ବିହିତ ପଦକ୍ଷେପ ନିଆଯାଉଥିବା ମନ୍ତ୍ରୀ ପୂଜାରୀ ସୂଚନା ଦେଇଛନ୍ତି।