ପଟ୍ଟାମୁଣ୍ଡାଇ,୧୭।୭(ସ୍ବ.ପ୍ର.): ଚାଷୀଙ୍କୁ ଉନ୍ନତମାନର ବିହନ, ସାର, ଔଷଧ ଯୋଗାଇଦେବାକୁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଗଣମାଧ୍ୟମରେ ପ୍ରଚାର ପ୍ରସାର କରୁଛନ୍ତି। ପ୍ରକୃତରେ ଉନ୍ନତମାନର ବିହନ ସରକାର ଯୋଗାଇ ଦେଉନାହାନ୍ତି। ପ୍ରାଥମିକ କୃଷି ସେବା ସମବାୟ ସମିତି ଜରିଆରେ ଚାଷୀମାନଙ୍କୁ କମ୍ ଦାମ୍ରେ ବିହନ ଯୋଗାଇଦେବା କଥା। ତେବେ କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକର ୧୬ ପ୍ରାଥମିକ ସମବାୟ ସମିତି ମଧ୍ୟରୁ ୪ଟି ସମିତିରେ ଚାଷୀଙ୍କୁ ସ୍ବଳ୍ପ ବିହନ ଯୋଗାଇ ଦିଆଯାଇଛି। ଚନ୍ଦନନଗର ସମବାୟ ସମିତି ପକ୍ଷରୁ ୯ କୁଇଣ୍ଟାଲ, ବଡ଼ମୂଳବସନ୍ତରେ ୩୨.୬ କୁଇଣ୍ଟାଲ, ଡାମରପୁରରେ ୨୨.୮ କୁଇଣ୍ଟାଲ, ପେଣ୍ଠପାଳ ସମବାୟ ପକ୍ଷରୁ ୨୯.୧୦ କୁଇଣ୍ଟାଲ ବିହନ ଚାଷୀଙ୍କୁ ଯୋଗାଇ ଦିଆଯାଇଛି।
ଚଳିତ ବର୍ଷ ପଟ୍ଟାମୁଣ୍ଡାଇ ବ୍ଲକରେ ୧୧,୭୦୦ ହେକ୍ଟର ଜିମିରେ ଧାନଚାଷ ହେବାକୁ ଲକ୍ଷ୍ୟ ରଖାଯାଇଥିବାବେଳେ ପ୍ରାଥମିକ ସମବାୟ ସମିତି ପକ୍ଷରୁ ଚାଷୀଙ୍କୁ ବିହନ ମିଳିପାରିନାହଁି। ଫଳରେ ଚାଷୀମାନେ ବାଧ୍ୟହୋଇ ବଜାରରୁ ବିହନ କିଣି ତଳି ପକାଇ ଥିଲେ। ମାତ୍ର ଉକ୍ତ ବିହନ ଗଜା ହେଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ବିଭିନ୍ନ କମ୍ପାନୀର ଧାନ ବିହନ ଦୋକାନୀଙ୍କଠାରୁ କିଣି ଚାଷୀ ଠକାମିର ଶିକାର ହୋଇଛନ୍ତି। ସେଥିପାଇଁ ଚାଷୀ ମୁଣ୍ଡରେ ଚଡ଼କ ପଡିଛି। ସରକାରୀ ବିହନ ଉପରେ ବିଶ୍ୱାସ ଆଉ ଭରସା ରଖି ସୋସାଇଟିରୁ ବିହନ କିଣିବାକୁ ମନସ୍ଥ କାରିଥିବା ଚାଷୀ ଠକାମିର ଶିକାର ହୋଇଛି। ଉକ୍ତ ବିହନ ଗଜା ନ ହେବାରୁ ଚାଷୀ ଏବେ କରିବେ କ’ଣ ବୋଲି ଚିନ୍ତାର କାରଣ ପାଲଟିଛି। ଚାଷୀ ଏବେ ବିହନ ଆଣିବ କେଉଁଠୁ। ଏହାର ଉଚ୍ଚସ୍ତରୀୟ ତଦନ୍ତ ହେବା ଆବଶ୍ୟକ ବୋଲି ଚାଷୀମାନେ ଦାବି କରିଛନ୍ତି। ସରକାର ଉନ୍ନତମାନର ବିହନ ବିକିବା ପାଇଁ ସିଡ୍ସ କର୍ପୋରେଶନ ମାଧ୍ୟମରେ ବିହନ ସଂଗ୍ରହ କରି ସୋସାଇଟି ଜରିଆରେ ବିକ୍ରୟ କରାଯାଏ। ମାତ୍ର ସିଡ୍ସ କର୍ପୋରେଶନ ଯଦି ବିହନ ଯୋଗାଇ ନ ଦିଏ ତେବେ ଚାଷୀ ଭରସା କାହାକୁ କରିବେ ବୋଲି କହିଛନ୍ତି।
ଚାଷୀ ରଞ୍ଜିତ ପ୍ରଧାନ କହିଛନ୍ତି, ସରକାର ଚାଷୀମାନଙ୍କୁ ଉନ୍ନତମାନର ଧାନ ବିହନ, ସାର, ଔଷଧ ଯୋଗାଇଦେବେ ବୋଲି ପ୍ରଚାର କରୁଛନ୍ତି। ପ୍ରାଥମିକ କୃଷି ସେବା ସମିତି ଗୁଡିକରୁ ସରକାରୀ ବିହନ କିଣି ଚାଷୀ ତଳି ପକାଇଥାନ୍ତି। ମାତ୍ର ଚଳିତ ବର୍ଷ କୃଷି ସେବା ସମିତିରୁ ଚାଷୀ ଉନ୍ନତ ବିହନ ପାଇପାରୁନାହାନ୍ତି କିମ୍ବା ସାର, ଔଷଧ ମଧ୍ୟ ଠିକ୍ ସମୟରେ ମିଳୁନାହିଁ। ସରକାର ତୁରନ୍ତି ଏଥିପ୍ରତି ଦୃଷ୍ଟିଦେବା ଆବଶ୍ୟକ। ଯୁବଚାଷୀ ସୁଶାନ୍ତ ସାମଲ କହିଛନ୍ତି, ସରକାରୀ ସିଡ୍ସ କର୍ପୋରେଶନରୁ ବିହନ ନ ମିଳିବାରୁ ଚାଷୀ ବଜାରରୁ ବିହନ କିଣିଥିଲେ। ହେଲେ ଏବେ ସେମାନେ ଠକାମିର ଶିକାର ହୋଇଛନ୍ତି। ଠିକ୍ ସମୟରେ ଚାଷୀ ବିହନ ନ ପାଇଲେ ଗୋଟିଏ ବର୍ଷର ଧାନଫସଲ ଅମଳ କରିବା ସମ୍ଭବ ହେବନାହିଁ। ବଜାରରୁ କିଣୁଥିବା ଧାନ ବିହନ ଉନ୍ନତମାନର ନୁହେଁ ବୋଲି ଚାଷୀ ଜାଣିପାରୁନାହାନ୍ତି। ଉକ୍ତ ବିହନକୁ କିଣି ତଳି ପକାଇ ଗଜା ନ ହେବା ପରେ ଚାଷୀ ଜାଣିବାକୁ ପାଇଲେ ଯେ ଏହା ନିମ୍ନମାନର। ସରକାର ତୁରନ୍ତ କ୍ଷତିଗ୍ରସ୍ତ ଚାଷୀମାନଙ୍କୁ ଉନ୍ନତମାନର ଧାନ ବିହନ ଯୋଗାଇଦେବା ଦରକାର ବୋଲି ଆଲୋଚନା ହେଉଛି।
