ନୂଆଦିଲ୍ଲୀ,୨୪।୭: ଦିଲ୍ଲୀର ଜନ୍ତର-ମନ୍ତରରେ ଚାଲିଥିବା ଆନ୍ଦୋଳନ ମଧ୍ୟରେ ଶୀର୍ଷ ସରକାରୀ ସୂତ୍ରରୁ ସ୍ପଷ୍ଟ କରାଯାଇଛି ଯେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫାର କୌଣସି ସମ୍ଭାବନା ନାହିଁ। ସରକାରଙ୍କ ଅନୁଭବ ହେଉଛି ଯେ ଇସ୍ତଫା ଦେବା ସବୁଠାରୁ ସହଜ ନିଷ୍ପତ୍ତି। ଇସ୍ତଫା ଦେଇ ଦାୟିତ୍ୱରୁ ଖସିଯିବା ବହୁତ ସହଜ। NDTV ରିପୋର୍ଟ ଅନୁଯାୟୀ ଜନସାଧାରଣ ସରକାରଙ୍କୁ ଜନାଦେଶ ଦେଇଛନ୍ତି ଏବଂ ସରକାର ଏହାକୁ ପୂରଣ କରିବେ। ସରକାର NTA ରେ ଥିବା ସମସ୍ୟାଗୁଡ଼ିକର ତାଲିକା ପ୍ରସ୍ତୁତ କରୁଛନ୍ତି ଏବଂ ଏହି ମୁଦ୍ଦାଗୁଡ଼ିକର ଶୀଘ୍ର ସମାଧାନ କରାଯିବ।
NDTV ରିପୋର୍ଟ ଅନୁଯାୟୀ, ସରକାର ପ୍ରଶ୍ନପତ୍ର ଲିକ୍ରେ ସଂପୃକ୍ତ ଅନେକ ଗ୍ୟାଙ୍ଗର ପର୍ଦ୍ଦାଫାଶ କରିଛନ୍ତି। ଏବେ ଆହୁରି ଅଧିକ କାର୍ଯ୍ୟାନୁଷ୍ଠାନ ପାଇଁ ଯୋଜନା କରାଯାଉଛି। ସରକାରଙ୍କ ସହ ଦଳ ମଧ୍ୟ ଧର୍ମେନ୍ଦ୍ର ପ୍ରଧାନଙ୍କ ସହ ଦୃଢ଼ ଭାବେ ଛିଡ଼ା ହୋଇଛି।
ଗତକାଲି ରାତିରେ PM ମୋଦୀଙ୍କ ଭିଡିଓ ଆସିବା ପରେ ସୋନମ୍ ୱାଙ୍ଗଚୁକ୍ ନିଜର ଅନଶନ ଭାଙ୍ଗିଥିଲେ। PM ମୋଦୀ ଦେଶବାସୀଙ୍କୁ କଠୋର କାର୍ଯ୍ୟାନୁଷ୍ଠାନର ଆଶ୍ୱାସନା ଦେଇଥିଲେ। ମାତ୍ର କକରୋଚ ଜନତା ପାର୍ଟି (CJP) ଏବେ ବି ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଅଡ଼ି ବସିଛି।
ବର୍ତ୍ତମାନ ମଧ୍ୟ ଜନ୍ତର-ମନ୍ତରରେ ହଜାର ହଜାର ସଂଖ୍ୟାରେ ଆନ୍ଦୋଳନକାରୀ ଉପସ୍ଥିତ ଅଛନ୍ତି। କକରୋଚ ଜନତା ପାର୍ଟି ଶୁକ୍ରବାର ଦିନ କେନ୍ଦ୍ରମନ୍ତ୍ରୀମାନଙ୍କୁ କହିଛି ଯେ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିକୁ ନେଇ ‘‘କୌଣସି ଆପୋଷ ବୁଝାମଣା ହୋଇପାରିବ ନାହିଁ।‘‘ ଜୁଲାଇ ୨୦ ରେ ‘‘ନିଷ୍ଠୁର ଭାବେ ପିଟାଯାଇଥିବା‘‘ ଆନ୍ଦୋଳନକାରୀ ଛାତ୍ରଛାତ୍ରୀଙ୍କ ନିକଟରେ ସରକାର ସାର୍ବଜନୀନ ଭାବେ କ୍ଷମା ପ୍ରାର୍ଥନା କରନ୍ତୁ ବୋଲି CJP ଦାବି କରିଛି। CJP ପ୍ରବକ୍ତା ସୌରଭ ଦାସ କହିଛନ୍ତି ଯେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଜିତେନ୍ଦ୍ର ସିଂହଙ୍କ ସହ ଅନୁଷ୍ଠିତ ବୈଠକରେ ମେ’ ୩ ରେ ହୋଇଥିବା ‘‘NEET ପରୀକ୍ଷା ବାତିଲ ହେବା ପରେ ଆତ୍ମହତ୍ୟା କରିଥିବା‘‘ ଛାତ୍ରଛାତ୍ରୀଙ୍କ ପରିବାରକୁ ୧ କୋଟି ଟଙ୍କା ଲେଖାଏଁ କ୍ଷତିପୂରଣ ଦେବାକୁ ଦାବି କରାଯାଇଛି।
CJP ର ଦୁଇଜଣ ପ୍ରତିନିଧି ବିଠଲଭାଇ ପଟେଲ ହାଉସ୍ରେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଜିତେନ୍ଦ୍ର ସିଂହଙ୍କ ସହ ପ୍ରାୟ ଦୁଇ ଘଣ୍ଟା ଧରି ବୈଠକ କରିଥିଲେ, ଯାହାର ଲକ୍ଷ୍ୟ ଥିଲା NEET ପେପର ଲିକ୍ ଏବଂ ପରୀକ୍ଷା ବ୍ୟବସ୍ଥାରେ ଅନ୍ୟାନ୍ୟ ଅନିୟମିତତାକୁ ନେଇ ଜାରି ରହିଥିବା ପ୍ରତିବାଦର କୌଣସି ଶାନ୍ତିପୂର୍ଣ୍ଣ ସମାଧାନ ବାହାର କରିବା। ନଡ୍ଡା କହିଛନ୍ତି ଯେ ମନ୍ତ୍ରୀମାନେ CJP ପ୍ରତିନିଧିଙ୍କ ଦାବି ଶୁଣିଛନ୍ତି ଏବଂ ସରକାର ଏହି ବିଷୟରେ ପରେ ଜବାବ ଦେବେ। ସେ କହିଛନ୍ତି, “ଆମେ ରବିବାର (କିମ୍ବା ଶନିବାର) ପୁଣି ବୈଠକ କରିବୁ।”
