ଜୁନାଗଡ଼,୧୫।୨: କେନ୍ଦ୍ର ସରକାରଙ୍କ ପେଟ୍ରୋଲ, ଡିଜେଲ ଓ ଇନ୍ଧନ ଗ୍ୟାସ ଦର ବୃଦ୍ଧି ବିରୋଧରେ ସୋମବାର କଂଗ୍ରେସ ପକ୍ଷରୁ ରାଜ୍ୟରେ ୬ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ଏହାର ପ୍ରଭାବ କଳାହାଣ୍ଡି ଜିଲାର ବିଭିନ୍ନ ସ୍ଥାନରେ ପରିଲକ୍ଷିତ ହୋଇଥିଲା। ଯାନବାହାନ, ଦୋକାନ ବଜାର ବନ୍ଦ କରି କଂଗ୍ରେସ କର୍ମୀମାନେ ବନ୍ଦ ପାଳନ କରିଥିଲେ। ହେଲେ ପୂର୍ବରୁ କଂଗ୍ରେସର ଗଡ଼ କୁହାଯାଉଥିବା ଜିଲାର ଜୁନାଗଡ଼ ସହରରେ କିନ୍ତୁ ଏହାର ଚିତ୍ର ଓଲଟା ଦେଖିବାକୁ ମିଳିଥିଲା। ଏଠାରେ ସ୍ଥାନୀୟ କଂଗ୍ରେସ ପକ୍ଷରୁ କୌଣସି କର୍ମକର୍ତ୍ତା ବନ୍ଦ ପାଳନ କରି ନ ଥିଲେ। ଫଳରେ ଦୋକାନ ବଜାର, ଯାନବାହାନ ଚଳାଚଳ ସ୍ବାଭାଭିକ ରହିଥିଲା। ମଧ୍ୟାହ୍ନରେ ଜଣେ ମାତ୍ର କଂଗ୍ରେସ କର୍ମୀ ଭାବେ ଯୁବ ଆଇନଜୀବୀ ଚିତ୍ତରଞ୍ଜନ ନିଆଲ ବନ୍ଦ ପାଳନକୁ ସମର୍ଥନ ଜଣାଇ ୨୬ ନମ୍ବର ଜାତୀୟ ରାଜପଥ ହାତୀନଦୀ ବ୍ରିଜରେ ଛିଡାହୋଇ ଦଳୀୟ ପତକା ଧରି ବିକ୍ଷୋଭ ପ୍ରଦର୍ଶନ କରିଥିଲେ। ଜଣେ ମାତ୍ର କଂଗ୍ରେସ କର୍ମୀ ବନ୍ଦ ପାଳନରେ ଆସିଥିବା ସଂକ୍ରାନ୍ତରେ ଚିତ୍ତ ରଞ୍ଜନଙ୍କୁ ପଚାରିବାରୁ ଯେଉଁମାନେ କଂଗ୍ରେସକୁ ଭଳ ପାଉଛନ୍ତି ସେମାନେ ଆଜିର ବନ୍ଦ ପାଳନରେ ସାମିଲ ହୋଇଛନ୍ତି। ମୁଁ ଜଣେ ସଚ୍ଚୋଟ କଂଗ୍ରେସ ପ୍ରେମୀ ଏବଂ ଦଳ ପାଇଁ କାମ କରୁଛି ବୋଲି କହିଥିଲେ।
