ଭୁବନେଶ୍ୱର, ୧୧ା୩(ବ୍ୟୁରୋ):ରାଜ୍ୟ ସରକାରଙ୍କ ନୂଆପଡ଼ା କାର୍ଯ୍ୟକ୍ରମକୁ ନେଇ ଟାର୍ଗେଟ କରିଛି ଭାଜପା। ଦଳର କୃଷକ ମୋର୍ଚ୍ଚା ରାଜ୍ୟ ସଭାପତି ପ୍ରଦୀପ ପୁରୋହିତ କହିଛନ୍ତି, ଅତୀତରେ କୌଣସି ମୁଖ୍ୟମନ୍ତ୍ରୀ ଏଭଳି ଆଡମ୍ବରପୂର୍ଣ୍ଣ ଜିଲା ଗସ୍ତ କରୁ ନ ଥିଲେ। ମୁଖ୍ୟମନ୍ତ୍ରୀଙ୍କ ଆଜିର ଗସ୍ତ ପୂର୍ବରୁ ସରକାରୀ କଳକୁ ଅପବ୍ୟବହାର କରି ଶାସକ ବିଜେଡିର ମନ୍ତ୍ରୀ, ଏମ୍ପି, ବିଧାୟକଙ୍କଠାରୁ ଆରମ୍ଭକରି ଛାମୁଆ ନେତା ନୂଆପଡ଼ାରେ ଡେରା ପକାଇଛନ୍ତି। ଏପରିକି ସମ୍ପୂର୍ଣ୍ଣ ଶାସନ ବ୍ୟବସ୍ଥା ନୂଆପଡ଼ାକୁ ସ୍ଥାନାନ୍ତର ହୋଇଯାଇଛି। ପଞ୍ଚାୟତ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ବିଭିନ୍ନ ଜିଲା ଗସ୍ତ କରି ନିଜ ଭାବମୂର୍ତ୍ତିକୁ ସଜାଡିବାର କେବଳ ପ୍ରହସନ କରୁଛନ୍ତି। କେନ୍ଦ୍ରୀୟ ଅନୁଦାନ ଅର୍ଥରେ ରାଜ୍ୟରେ ପ୍ରତିଷ୍ଠିତ ହେଉଥିବା ବିଭିନ୍ନ ପ୍ରକଳ୍ପର ନାଲିଫିତା କାଟିବାରେ ମୁଖ୍ୟମନ୍ତ୍ରୀ ବ୍ୟସ୍ତ ବୋଲି ପ୍ରଦୀପ ତାତ୍ସଲ୍ୟ କରି କହିଛନ୍ତି। ସେ ଆହୁରି କହିଛନ୍ତି, ୨୦ ବର୍ଷ ତଳରୁ ଶୁଭାରମ୍ଭ ଦିଆଯାଇଥିବା ଏବଂ ଆଜିର ଉଦ୍ଘାଟନ ହୋଇଥିବା ଲୋୟର ଇନ୍ଦ୍ର ଜଳ ପ୍ରକଳ୍ପ ଅଧୀନରେ ଥିବା କେନାଲଗୁଡିକର ମରାମତି କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିବା ଯୋଗୁ ପାଣି ଯାଇପାରିବ ନାହିଁ। ଏହି ଉଦ୍ଘାଟନର ଉଦ୍ଦେଶ୍ୟ କ’ଣ ବୋଲି ପୁରୋହିତ ପ୍ରଶ୍ନ କରିଛନ୍ତି। କେନ୍ଦ୍ର ସରକାରଙ୍କ ଅର୍ଥରେ ନିର୍ମିତ ଏହି ପ୍ରକଳ୍ପକୁ ଦଳୀୟ ଭିତ୍ତିରେ ଉଦ୍ଘାଟନ କରି ମୁଖ୍ୟମନ୍ତ୍ରୀ ସଂଘୀୟ ବ୍ୟବସ୍ଥାକୁ ଅବମାନନା କରିଥିବା ସେ କହିଛନ୍ତି।
