ଲାଠୋର, ୧୪।୧୨(ଡି.ଏନ.ଏ.) – ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଞ୍ଚଳରେ ମକାଚାଷୀ ସଙ୍କଟରେ ପଡିଛନ୍ତି। ଏଠାରେ ମଣ୍ଡିର ସୁବିଧା ନ ଥିବା ଯୋଗୁ ଶୋଷଣର ଶିକାର ହେଉଥିବା ରବୀନ୍ଦ୍ରନାଥ ବିଶ୍ବାଳ, ବିରଞ୍ଚି ମାଝି, ଅମୂଲ୍ୟ ବିଶ୍ବାଳ, ଶିବ ରଣା, ଭିକାରି ଚରଣ ବିଶ୍ବାଳ, କାର୍ତ୍ତିକ ବିଶ୍ବାଳ, ବୈଷ୍ଣବ ବିଶ୍ବାଳ ପ୍ରମୁଖ ମକାଚାଷୀ ଅଭିଯୋଗ କରିଛନ୍ତି। କିଛିବର୍ଷ ହେବ ଏଠିକାର କପାଚାଷୀ କ୍ଷତିରେ ପଡିବା ପରେ ମକା ଚାଷ ପ୍ରତି ଆକୃଷ୍ଟ ହୋଇଥିଲେ। ପ୍ରଚୁର ଉତ୍ପାଦନ ହେବା ପରେ ସେମାନେ ଅଧିକ ଉତ୍ସାହିତ ହୋଇପଡିଥିଲେ। ସରକାରୀ ମଣ୍ଡି ଖୋଲିବା ପାଇଁ ସେମାନେ ଦାବି କରିଥିଲେ। ଏପରିକି ଜିଲାପାଳଙ୍କୁ ଏଥିପାଇଁ ସାକ୍ଷାତ୍ କରିଥିଲେ ମଧ୍ୟ ଅଦ୍ୟାବଧି ମଣ୍ଡି ଖୋଲାଯାଇ ନାହିଁ। ଫଳରେ ଚଳିତ ବର୍ଷ ଚାଷୀ କ୍ଷତିଗ୍ରସ୍ତ ହେବା ଆଶାଙ୍କା ଦେଖାଦେଇଛି। ଚଳିତ ବର୍ଷ ବ୍ଲକ ଅଞ୍ଚଳରେ ସମୁଦାୟ ୩୫୦ ହେକ୍ଟର ଜମିରେ ମକା ଚାଷ ହୋଇଛି। ଚାଷୀଙ୍କ ପାଖରେ ପ୍ରାୟ ୭୫୦୦କୁଇଣ୍ଟାଲ ମକା ମହଜୁଦ ରହିଛି। ମଣ୍ଡି ନ ଥିବାରୁ ସେମାନେ ସରକାରୀ ଦର କୁଇଣ୍ଟାଲ ପିଛା ୧୮୫୦ ଟଙ୍କାଠାରୁ ଢେରକମ୍ ୧୨ଶହରୁ ୧୪ଶହ ଟଙ୍କାରେ ମଧ୍ୟସ୍ଥଙ୍କୁ ବିକ୍ରି କରିଦେଉଛନ୍ତି। ଏନେଇ ବ୍ଲକ କୃଷି ଅଧିକାରୀ ଯଶୋବନ୍ତ ସାହୁଙ୍କୁ ପଚାରିବାରୁ ସମସ୍ୟାର ସମାଧାନ ପାଇଁ ଉପରିସ୍ଥ ଅଧିକାରୀଙ୍କ ଦୃଷ୍ଟିଆକର୍ଷଣ କରିଛୁ ବୋଲି କହିଛନ୍ତି। ତେବେ ଚାଷୀଙ୍କ ସ୍ବାର୍ଥ ଦୃଷ୍ଟିରୁ ଜିଲା ପ୍ରଶାସନ ଏ ଦିଗରେ ତତ୍କାଳ ପଦକ୍ଷେପ ନେବାକୁ ଚାଷୀମାନେ ଦାବି କରିଛନ୍ତି।
