ଯାଜପୁର ଅଫିସ/ବରୀ(ଡି.ଏନ.ଏ.),୨ା୬: ଗ୍ରାମାଞ୍ଚଳ ତଥା ଦୁର୍ଗମ ଅଞ୍ଚଳର ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରି ଅଞ୍ଚଳର ବିକାଶ ପ୍ରକ୍ରିୟାରେ ସନ୍ତୁଳନ ରକ୍ଷା କରିବା ପାଇଁ ବିଭିନ୍ନ ଯୋଜନାରେ ଛୋଟବଡ ବ୍ରିଜ ନିର୍ମାଣ ହେଉଛି। ଏଥିରେ ପୂର୍ତ୍ତ, ଜଳସେଚନ, ଡ୍ରେନେଜ ଓ ଗ୍ରାମ୍ୟ ନିର୍ମାଣ ବିଭାଗ ଜରିଆରେ ବିପୁଳ ଅର୍ଥ ବିନିଯୋଗ ହେଉଛି। ହେଲେ ବିଭାଗୀୟ ଅଧିକାରୀଙ୍କ ଠିକାଦାର ପ୍ରୀତି ଓ ଆନ୍ତରିକତାର ଅଭାବ ଯୋଗୁ ବ୍ରିଜ କାର୍ଯ୍ୟର ମାନ ନୈରାଶ୍ୟଜନକ ହେବା ସହ ଦୀର୍ଘସ୍ଥାୟୀ ହୋଇ ପାରୁନାହିଁ। ଯାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଗ୍ରାମ୍ୟ ନିର୍ମାଣ ବିଭାଗ ଜାରକା ଡିଭିଜନ ଅଧୀନସ୍ଥ କେଲୁଅ ନଦୀର ଶାଖା ନାଳ ଉପରେ ପଣସୁଆପାଲ ନିକଟରେ ନିର୍ମିତ ଏକ ବ୍ରିଜ। ଗତ ୨୯ ତାରିଖ ପୂର୍ବାହ୍ନରେ ଏହି ବ୍ରିଜ ଭୁଶୁଡି ପଡିଥିବାବେଳେ ବିଭାଗୀୟ କୌଣସି ଅଧିକାରୀ ଏଯାଏ ଘଟଣାସ୍ଥଳକୁ ପରିଦର୍ଶନରେ ଯାଇ ନାହାନ୍ତି କିମ୍ବା ବିହିତ ପଦକ୍ଷେପ ଗ୍ରହଣ କରିନାହାନ୍ତି। ଏଥିଯୋଗୁ ଦୁର୍ଘଟଣା ଘଟିବା ବହୁ ସମ୍ଭାବନା ରହିଛି। ଯାହାକୁ ନେଇ ଏହି ବ୍ରିଜ ଉପରେ ନିର୍ଭରଶୀଳ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
ଜିଲାର ଗ୍ରାମାଞ୍ଚଳ ଅଧିବାସୀଙ୍କ ଯୋଗାଯୋଗର ପ୍ରମୁଖ ମାଧ୍ୟମ ହେଉଛି ସଡ଼କ ପଥ। ଏହି କ୍ରମରେ ନଦୀନାଳ ଭରା ଯାଜପୁର ଜିଲାର ଗମନାଗମନ କ୍ଷେତ୍ରକୁ ଅଧିକ ସୁଦୃଢ ଏବଂ ସହଜ କରିବା ଲକ୍ଷ୍ୟରେ ଶତାଧିକ ବ୍ରିଜ ନିର୍ମାଣ କରାଯାଇଛି। ହେଲେ ଠିକାକାମକୁ ଅଧିକ ଗୁରୁତ୍ୱ ଦିଆଯାଉଛି। ଜିଲାର ଯେ କୌଣସି ବ୍ରିଜ କାର୍ଯ୍ୟକୁ ଦେଖିଲେ ସ୍ବାଭାବିକ ଭାବେ ଏହି ଯୋଜନାର ସଫଳତା ନିରୁପିତ କରି ହେବ। ବଡ଼ଚଣା ଓ ବରୀକୁ ସଂଯୋଗୀକରଣ କରୁଥିବା ନାଳ ଉପରେ ନିର୍ମିତ ବ୍ରିଜ ଧସି ପଡିବା ଯୋଗୁ ଯାତାୟାତ ସମ୍ପୂର୍ଣ୍ଣ ଭାବେ ବନ୍ଦ ହୋଇଯାଇଛି। ଏହି ବ୍ରିଜଟି ବଡ଼ଚଣା ବ୍ଲକ ଅଧୀନରେ ହୋଇଥିବାବେଳେ ଏହା ଉପରେ ରନତ୍ଗିରି ପଞ୍ଚାୟତ ସମେତ ଡିମିରିଆପାଳ ଏବଂ ବଡଚଣା ବ୍ଳକର ପଣସୁଆପାଳ ଗ୍ରାମବାସୀ ନିର୍ଭର କରିଥାନ୍ତି। ଏହାସହ ପ୍ରସିଦ୍ଧ ପର୍ଯ୍ୟଟନସ୍ଥଳୀ ରନତ୍ଗିରିକୁ ଯିବାକୁ ଏହି ରାସ୍ତାକୁ ପର୍ଯ୍ୟଟକମାନେ ସଟ୍କଟ୍ ଭାବେ ବ୍ୟବହାର କରନ୍ତି। ବିଶେଷକରି ସଂପୃକ୍ତ ଅଞ୍ଚଳବାସୀ ସ୍ବାସ୍ଥ୍ୟ ସେବା ନିମନ୍ତେ ରନତ୍ଗିରି ପ୍ରାଥମିକ ଚିକିତ୍ସା କେନ୍ଦ୍ରକୁ ଯିବା ପାଇଁ ଏହି ରାସ୍ତା ଏକମାତ୍ର ମାଧ୍ୟମ। ହେଲେ ଏହି ବ୍ରିଜ ଭୁଶୁଡିବା ଘଟଣାକୁ ୪ ଦିନ ଅତିକ୍ରାନ୍ତ ହୋଇଥିଲେ ହେଁ ବିଭାଗୀୟ କର୍ତ୍ତୃପକ୍ଷ ଘଟଣାସ୍ଥଳ ପରିଦର୍ଶନ ନ କରିବା ଓ ମରାମତି ନିମନ୍ତେ କୌଣସି ଠୋସ ପଦକ୍ଷେପ ନ ନେବା ଯୋଗୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ରତ୍ନଗିରି ପଞ୍ଚାୟତର ସାମାଜିକ କର୍ମୀ ଆର୍ତ୍ତ ମଲ୍ଲିକ କୁହନ୍ତି, ସରକାର ଗମନାଗମନକୁ ଗୁରୁତ୍ୱତ୍ ଦେଉଥିବାବେଳେ ବ୍ରିଜଟି ଭୁଶୁଡିବା କାରଣରୁ ସେମାନେ ଜମିର ଦଳ ପୋଖରୀ ଭିତରେ ପଶି ସ୍ବାସ୍ଥ୍ୟକେନ୍ଦ୍ର ଏବଂ ମୁଖ୍ୟ ବଜାରକୁ ଯିବା ଆସିବା କରିବାକୁ ବାଧ୍ୟ ହେଉଛୁ। ଗୁରୁତର ରୋଗୀଙ୍କ ପାଇଁ ଏହା କାଳ ହେବ ବୋଲି ସେ କହିଛନ୍ତି। ଅବସର ପ୍ରାପ୍ତ ଶିକ୍ଷକ ପିତାମ୍ବର ମଲ୍ଲିକ କୁହନ୍ତି, ବାରମ୍ବାର ଅଭିଯୋଗ ପରେ ବି କୌଣସି ରାଜନେତା କିମ୍ବା ବିଭାଗୀୟ ଅଧିକାରୀ ନ ଶୁଣିବାରୁ ନିମ୍ନମାନର କାର୍ଯ୍ୟ ହେବା ଯୋଗୁ ଏହି ସେତୁ ଭୁଶୁଡି ପଡିଛି। ରାଜ୍ୟ ସରକାର କିମ୍ବା କେନ୍ଦ୍ର ସରକାର ବିକାଶର ନାରା ଦେଉଥିବାବେଳେ ଆମେ ବିକାଶଠୁ କେତେ ଦୂରରେ ରହିଛୁ ତାହା ଭାଙ୍ଗିଥିବା ସେତୁରୁ ସ୍ପଷ୍ଟ ଅନୁମେୟ। ରନତ୍ଗିରି ପଞ୍ଚାୟତର ପୂର୍ବତନ ସରପଞ୍ଚ ଅଶୋକ କୁମାର ଜେନା କୁହନ୍ତି, ଦଳୀୟ ଭିତ୍ତିରେ ଠିକାଦାରମାନେ କାମ କଲେ ବି ବିଭାଗୀୟ କର୍ତ୍ତୃପକ୍ଷ ଆଖି ବୁଝି ଦେଉଛନ୍ତି। ଯେତେ ଅଭିଯୋଗ କଲେ ବି ରାଜନତିକ ଚାପ ଯୋଗୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଏଭଳି ମନମୁଖୀ କାମ ଚାଲିଛି।
ଏ ସଂକ୍ରାନ୍ତରେ ଗ୍ରାମ୍ୟ ନିର୍ମାଣ ବିଭାଗର ନିର୍ବାହୀ ଯନ୍ତ୍ରୀ ବିଶ୍ୱନାଥ ମାରାଣ୍ଡିଙ୍କୁ ପଚାରିବାରେ ସେ କହିଛନ୍ତି, ବିଜୁ ସେତୁ ଯୋଜନାରେ ଉକ୍ତ ବ୍ରିଜ ନିର୍ମାଣ କରିବାକୁ ପ୍ରସ୍ତାବ ଦିଆଯିବ। ତେବେ ବର୍ତ୍ତମାନ ଲୋକଙ୍କ ସୁରକ୍ଷା ଦୃଷ୍ଟିରୁ ବ୍ରିଜର ଉଭୟ ପାର୍ଶ୍ୱରେ ମାଟି ପକାଇବାକୁ ନିର୍ଦ୍ଦେଶ ଦିଆଯାଇଛି।
