କୁଆଁରମୁଣ୍ଡା,୭।୧୦(ଡି.ଏନ.ଏ.):ସୁନ୍ଦରଗଡ଼ ଜିଲା କୁଆଁରମୁଣ୍ଡା ବ୍ଲକ ଅନ୍ତର୍ଗତ ଉଷ୍ରାଠାରେ ଶଙ୍ଖ ନଦୀରୁ ଜଳ ଉଠାଯାଇ କୁଆଁରମୁଣ୍ଡା ବ୍ଲକର ବିଭିନ୍ନ ପଞ୍ଚାୟତକୁ ଜଳଯୋଗାଇବା ଲକ୍ଷ୍ୟ ନେଇ ବୃହତ୍ତ ଜଳଯୋଗାଣ ପ୍ରକଳ୍ପ ନିର୍ମାଣ କାର୍ଯ୍ୟ ୨୦୧୯ ମସିହାରୁ ଆରମ୍ଭ ହୋଇ ଏବେ ସମ୍ପୂର୍ଣ୍ଣ ହୋଇଛି। ଏପରିକି ଗତ ୬ମାସ ହେଲା ଏହି ପ୍ରକଳ୍ପ ଜରିଆରେ କୁଆଁରମୁଣ୍ଡା ବ୍ଲକର ଅନ୍ଧାରୀ, ଜଲଙ୍ଗବିରା, କାଦୋବାହାଲ ଇତ୍ୟାଦି ପଞ୍ଚାୟତକୁ ଜଳଯୋଗାଣ କାର୍ଯ୍ୟ ଚାଲୁଛି। ହେଲେ ଦୀର୍ଘ ସାଢେ ୩ ବର୍ଷ ଅତିକ୍ରାନ୍ତ ହୋଇଯାଇଥିଲେ ମଧ୍ୟ ଉକ୍ତ ପ୍ରକଳ୍ପ ନିର୍ମାଣ ପାଇଁ ଜମି ହରାଇଥିବା ପରିବାରବର୍ଗଙ୍କୁ ଅଦ୍ୟାବଧି କ୍ଷତିପୂରଣ ଓ ଚାକିରି ନ ମିଳିବାରୁ ସେମାନେ ଗୁରୁବାର ଏହି ପ୍ରକଳ୍ପର ମୁଖ୍ୟ ଫାଟକରେ ତାଲା ପକାଇଦେଇଛନ୍ତି। ଖବରପାଇ ସ୍ଥାନୀୟ ସରପଞ୍ଚ, କୁଆଁରମୁଣ୍ଡା ଜିଲାପରିଷଦ ସଭ୍ୟଙ୍କ ସମେତ ଉଷ୍ରା ଅଞ୍ଚଳର କେତେକ ବୁଦ୍ଧିଜୀବୀ ଘଟଣାସ୍ଥଳରେ ପହଞ୍ଚତ୍ ସେମାନଙ୍କ ଅଭିଯୋଗ ଶୁଣିଥିଲେ। ସୂଚନାଅନୁଯାୟୀ ଉକ୍ତ ମେଗା ଜଳଯୋଗାଣ ପ୍ରକଳ୍ପ ନିର୍ମାଣ ସମୟରେ ସରକାରୀ ଜମି ଅଭାବ ଥିବାରୁ ସ୍ଥାନୀୟ ବାସିନ୍ଦା ମାଖା କିଷାନଙ୍କ ସହ ପ୍ରଶାସନ ଆଲୋଚନା କରି ତାଙ୍କର ୪୬ ଡିସିମିଲ ଜମି ଯୋଗାଇଦେବାକୁ ଅନୁରୋଧ କରିଥିଲେ। ପ୍ରତିବଦଳରେ ଜମିମାଲିକ ମାଖାଙ୍କୁ ଜମିର ମୂଲ୍ୟ ପ୍ରଦାନ ସହ ପରିବାରର ଜଣଙ୍କୁ ଚାକିରି ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଥିଲେ। ହେଲେ ପ୍ରକଳ୍ପର ଆରମ୍ଭରୁ ଶେଷ ହେବା ପର୍ଯ୍ୟନ୍ତ ଦୀର୍ଘ ସାଢେ ୩ବର୍ଷ ଅତିକ୍ରାନ୍ତ ହୋଇଥିବାବେଳେ ଜମିମାଲିକ ଏ ନେଇ ଜିଲା ପ୍ରଶାସନ ନିକଟରେ ଗୁହାରି କରିବା ପରେ ଶେଷରେ ନିରାଶ ହୋଇଯାଇଥିଲେ। ଦ୍ୱିତୀୟତଃ, ପ୍ରକଳ୍ପ ନିର୍ମାଣ ପୂର୍ବରୁ ସ୍ଥାନୀୟ ଉଷ୍ରା, ଉଷ୍ରା କଲୋନୀ,ତେତ୍ରାବାହାଲ, ରାଇବେର୍ଣ୍ଣା, ଖେରାପୋଷ ଭଳି ପ୍ରକଳ୍ପ ପାରିପାର୍ଶ୍ୱକ ଅଞ୍ଚଳକୁ ଜଳଯୋଗାଣ କରାଯିବ ବୋଲି ଦେଇଥିବା ପ୍ରତିଶ୍ରୁତି ଏବେ ପାଣିରେ ଗାର ସଦୃଶ ଲୋକେ ଅନୁଭବ କରୁଛନ୍ତି। ଫଳରେ ପ୍ରଶାସନିକ ପ୍ରତାରଣାର ଶିକାର ହୋଇ ବହୁ ଦିନର ପୁଞ୍ଜିଭୂତ ଅସନ୍ତୋଷ ଶେଷରେ ଉଗ୍ରରୂପ ଧାରଣ କରି ମୁଖ୍ୟ ଫାଟକରେ ତାଲା ପକାଇବା ପାଇଁ ବାଧ୍ୟ ହେଲା ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ଏ ନେଇ ମେଗା ଜଳଯୋଗାଣ ପ୍ରକଳ୍ପ ଜିଲା ଅଧୀକ୍ଷଣ ଯନ୍ତ୍ରୀ ବିଛନ୍ଦ ପାଣିଗ୍ରାହୀଙ୍କୁ ପଚରାଯିବାରେ ସେ କହିଲେ ଯେ, ଜମି ହରାଇଥିବା ପରିବାରଙ୍କ ଦାବି ବାସ୍ତବରେ ଯଥାର୍ଥ। ତାଙ୍କର କ୍ଷତିପୂରଣ ଅର୍ଥରାଶି ପ୍ରଦାନ କେବେ ମିଳିବ ତାହା ନିଶ୍ଚିତ ହୋଇପାରୁ ନାହିଁ। ମାତ୍ର ଆସନ୍ତା ୧ ମାସ ମଧ୍ୟରେ ଏହା ମିଳିବାର ଯଥେଷ୍ଟ ସମ୍ଭାବନା ଅଛି ବୋଲି ଅଧୀକ୍ଷଣ ଯନ୍ତ୍ରୀ ପାଣିଗ୍ରାହୀ ସୂଚନା ଦେଇଛନ୍ତି।
