ରଘୁନାଥପୁର,୯ା୬(ଡି.ଏନ.ଏ.): ରଘୁନାଥପୁର ତହସିଲ ଅନ୍ତର୍ଗତ ତଅଁରା ଓ ରେଢୁଆ ମଧ୍ୟ ଭାଗରେ ବହିଯାଇଥିବା ମୃତା କାଠଯୋଡି ଶଯ୍ୟାର ମୁଣ୍ଡାଳଠାରେ ସ୍ଥାୟୀ ପକ୍କା ଘର ଜଣେ ବ୍ୟକ୍ତି ନିର୍ମାଣ କରୁଛନ୍ତି। ତହସିଲଦାରଙ୍କୁ ଅଭିଯୋଗ ସତ୍ତ୍ୱେ କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ଏ ନେଇ ଅସନ୍ତୋଷ ପ୍ରକାଶ ପାଇଛି। ନଦୀ ଶଯ୍ୟାରେ ଗୃହ ନିର୍ମାଣ ଦ୍ୱାରା ବର୍ଷାଦିନେ ଜଳ ନିଷ୍କାସନରେ ସମସ୍ୟା ଉପୁଜି ଶତାଧିକ ହେକ୍ଟର ଚାଷଜମି ଜଳମଗ୍ନ ହେବ। ସ୍ଥାନୀୟ ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ଆଶଙ୍କାରେ ଜଗତ୍ସିଂହପୁର ଜିଲା କୃଷକ ସଙ୍ଗଠନ ପକ୍ଷରୁ ଏ ସମ୍ପର୍କରେ ମେ ୨୧ ତାରିଖରେ ତହସିଲଦାର ରୁପାଲିକା ଦାଶଙ୍କୁ ଅଭିଯୋଗ କରାଯାଇଥିଲା। ତହସିଲଦାର ଦାଶ ଅଭିଯୋଗ ସମ୍ପର୍କରେ ତଦନ୍ତ କରି ଉକ୍ତ ସ୍ଥିତିବାନ ଜମିର କିସମ ଘରବାରି ନ ଥିବା ଏବଂ ମୃତା ନଦୀ ଶଯ୍ୟାରେ ସ୍ଥାୟୀ ପକ୍କା ଗୃହ ନିର୍ମାଣ ହେଉଥିବା ସତ୍ୟ ବୋଲି ପ୍ରକାଶ କରିଥିଲେ। ସଙ୍ଗଠନର ସଭାପତି ଗୋବିନ୍ଦ ଚନ୍ଦ୍ର ଜେନା ଓ ସମ୍ପାଦକ ବାବାଜୀ ଚରଣ ଜେନା ତୁରନ୍ତ ଏଥିପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ତହସିଲଦାରଙ୍କୁ ଅନୁରୋଧ କରିଥିଲେ। ତଦନ୍ତ ହେବା ପରଠାରୁ କିଛିଦିନ ପର୍ଯ୍ୟନ୍ତ ଗୃହ ନିର୍ମାଣ କାର୍ଯ୍ୟ ବନ୍ଦ ରହିବା ପରେ ଏବେ ଯୁଦ୍ଧକାଳୀନ ଭିତ୍ତିରେ ଚାଲିଛି।
ସୂଚନାଯୋଗ୍ୟ, ଉକ୍ତ ନଦୀଟି ତରିକୁନ୍ଦ ପଞ୍ଚାୟତ ନୂଆଦାଠାରୁ ବାହାରି ୧୪ କିମି ଅତିକ୍ରମ କରି ନାଲିବାରଠାରେ ହଂସୁଆ ସଫେଇରେ ମିଶିଛି। କାଳକ୍ରମେ ଉକ୍ତ ନଦୀଟିରେ ବର୍ଷା ୪ ମାସକୁ ଛାଡି ବର୍ଷ ସାରା ଜଳ ପ୍ରବାହ ନ ହେବାରୁ ଏହାର ଉଭୟ ପାର୍ଶ୍ୱରେ ଥିବା ଲୋକ ନଦୀ ଶଯ୍ୟାରେ ଚାଷ କାର୍ଯ୍ୟ କଲେ। ଦଖଲ ମୁତାବକ ସରକାରଙ୍କ ପକ୍ଷରୁ ଏମାନଙ୍କୁ ଚାଷ କରିବାକୁ ପଟ୍ଟା ପ୍ରଦାନ କରାଯାଇଥିଲା। ଡ୍ରେନେଜ ବିଭାଗ ପକ୍ଷରୁ ବର୍ଷାଦିନେ ଜଳ ନିଷ୍କାସନ ପାଇଁ ମୃତା କାଠଯୋଡିରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଥିବାବେଳେ, ଏହାର ଶଯ୍ୟାରେ ଘର ନିର୍ମାଣ ପାଇଁ କିପରି ଅନୁମତି ପ୍ରଦାନ କରାଗଲା, ଏହା ତଦନ୍ତ ହେବା ଜରୁରୀ ହୋଇପଡିଛି। ଉକ୍ତ ଘର ନିର୍ମାଣ ପଛରେ ପ୍ରଶାସନିକ ଅଧିକାରୀ ଓ ନେତାଙ୍କ ସହଯୋଗ ରହିଥିବା ଚର୍ଚ୍ଚା ହେଉଛି। ଧୀରେ ଧୀରେ ଜନଅସନ୍ତୋଷ ତେଜିବାରେ ଲାଗିଛି। ସ୍ଥାନୀୟ ଅଞ୍ଚଳର କେତେଜଣ ମୁଷ୍ଟିମେୟ ବ୍ୟକ୍ତି ଏହି କାର୍ଯ୍ୟରେ ତାଙ୍କୁ ସହଯୋଗ କରୁଥିବା ମଧ୍ୟ ଲୋକେ ଅଭିଯୋଗ କରିଛନ୍ତି। ଏଥିପ୍ରତି ଜିଲାପାଳ ଦୃଷ୍ଟି ଦେବାକୁ ଦାବି ହେଉଛି। ଏହାଛଡା ସ୍ଥାନୀୟ ଜନସାଧାରଣ ଏ ସମ୍ପର୍କରେ ରାଜସ୍ବ ସଚିବଙ୍କୁ ଅଭିଯୋଗ କରିବାକୁ ପ୍ରସ୍ତୁତ ହେଉଥିବା ସୂଚନା ମିଳିଛି।
