ପାଟନା, ୨୮।୧୧: ନିର୍ବାଚନ ପ୍ରଚାର ବେଳେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ତାଙ୍କର ମୁଖ୍ୟ ପ୍ରତିଦ୍ୱନ୍ଦ୍ୱୀ ଆର୍ଜେଡି ଅଧ୍ୟକ୍ଷ ଲାଲୁ ଯାଦବଙ୍କୁ କଡ଼ା ସମାଲୋଚନା କରିଥିଲେ। ଅନେକ ସମୟରେ ଏହି ସମାଲୋଚନା ବ୍ୟକ୍ତିଗତ ସ୍ତରକୁ ଖସିଯାଇଥିଲା। ଏହି ଘଟଣାକୁ ନେଇ ଶୁକ୍ରବାର ବିଧାନସଭାରେ ଲାଲୁଙ୍କ ପୁଅ ତଥା ବିରୋଧୀ ଦଳ ନେତା ତେଜସ୍ବୀ ଯାଦବ ମୁଖ୍ୟମନ୍ତ୍ରୀଙ୍କ ଉପରେ ବର୍ଷିଥିଲେ। ପ୍ରଚାର ବେଳେ ନୀତୀଶ ଆର୍ଜେଡି ମୁଖ୍ୟଙ୍କ ବଡ଼ ପରିବାର ସମ୍ପର୍କରେ କହିବା ସହ ଲାଲୁ ପୁତ୍ରସନ୍ତାନ ପ୍ରତି ଅଧିକ ଆଗ୍ରହୀ ଥିବା ଇସାରା କରିଥିଲେ। ନୀତୀଶଙ୍କର ଗୋଟିଏ ପୁଅ। ଝିଅ ହେବା ଭୟରେ ସେ ଦ୍ୱିତୀୟ ଥର ବାପା ହେଲେ ନାହିଁ କି ବୋଲି ତେଜସ୍ବୀ ଗୃହରେ ଆକ୍ଷେପ କରିଥିଲେ। ଏଥିରେ ଉତ୍ତେଜିତ ନୀତୀଶ କହିଥିଲେ, ଲାଲୁଙ୍କୁ ଲୋକ ଦଳ ନେତା କରିବା ଓ ତେଜସ୍ବୀଙ୍କୁ ଉପମୁଖ୍ୟମନ୍ତ୍ରୀ କରିବା ପାଇଁ କିଏ ଦାୟୀ ତାହା ସମସ୍ତେ ଜାଣନ୍ତି।
ନୀତୀଶ ଅଣସଂସଦୀୟ ଭାଷା ବ୍ୟବହାର କରିବା ତାଙ୍କର ପ୍ରତିଷ୍ଠାର ପ୍ରତିଫଳନ କରୁଛି ବୋଲି ଆର୍ଜେଡି ମୁଖ୍ୟ ମୁଖପାତ୍ର ମନୋଜ ଝା କହିଛନ୍ତି। ନୀତୀଶ ଏବେ ରିମୋଟ କଣ୍ଟ୍ରୋଲ ମୁଖ୍ୟମନ୍ତ୍ରୀ। ପ୍ରକୃତ କ୍ଷମତା କାହା ହାତରେ ତାହା ବିହାର ଜନସାଧାରଣ ଜାଣନ୍ତି ବୋଲି ସେ କହିଥିଲେ।
