ଦୁବାଇ,୧୬।୧୦: ଆଇପିଏଲ୍ ୨୦୨୧ ଫାଇନାଲ ମୁକାବିଲାରେ ଚେନ୍ନାଇ ସୁପରକିଙ୍ଗ୍ସଠାରୁ ୨୭ ରନ୍ରେ ପରାସ୍ତ ହୋଇଛି କୋଲକାତା ନାଇଟ୍ ରାଇଡର୍ସ। ଜିତିବା ପାଇଁ ଚେନ୍ନାଇ କୋଲକାତାକୁ ୧୯୩ ରନ୍ର ବିଜୟଲକ୍ଷ୍ୟ ଦେଇଥିଲା। ହେଲେ କୋଲକାତାର ଖେଳାଳିମାନେ ୨୦ ଓଭରରେ ୧୬୫/୯ ସ୍କୋର କରିପାରିଥିଲେ। ଦଳର ଓପନର ଶୁଭମନ ଗିଲ(୫୧) ଏବଂ ଭେଙ୍କଟେଶ ଆୟାର(୫୦) ରନ୍ କରିଥିଲେ। ସେମାନଙ୍କୁ ଛାଡ଼ି ଅନ୍ୟ ଖେଳାଳିଙ୍କ ବ୍ୟାଟ୍ ଚାଲି ନ ଥିଲା। ଯୁବ ବ୍ୟାଟ୍ସମ୍ୟାନ୍ ନୀତିଶ ରାଣାଙ୍କଠାରୁ ବହୁତ କିଛି ଆଶା କରାଯାଇଥିଲା। ହେଲେ ସେ କୌଣସି ରନ୍ ନ କରି (ଗୋଲ୍ଡେନ୍ ଡକ୍) ଆଉଟ୍ ହୋଇଯାଇଥିଲେ। ଏହାକୁ ନେଇ ସେ ଏକ ଲଜ୍ଜାଜନକ ରେକର୍ଡ ନିଜ ନାମରେ କରିଛନ୍ତି। ଆଇପିଏଲ୍ରେ ସବୁଠାରୁ ଅଧିକ ଥର ଶୂନ ରନ୍ କରି ପ୍ରଥମ ବଲ୍ରେ ଆଉଟ୍ ହେବା(ଗୋଲ୍ଡେନ୍ ଡକ୍) ଖେଳାଳି ସେ ପାଲଟିଛନ୍ତି। ଗତ ସିଜନ୍ରୁ ଆଇପିଏଲ୍ ୧୪ ପର୍ଯ୍ୟନ୍ତ ସେ ୫ ଥର ଏପରି କରିଛନ୍ତି। ଗତ ୫ ମ୍ୟାଚ୍ରେ ବି ନୀତିଶ ସେତେଟା ଭଲ ପ୍ରଦର୍ଶନ କରିପାରିନାହାନ୍ତି। ଏହି ଅଙ୍କ ଦେଖିଲେ ଆଇପିଏଲ୍ ୨୦୨୨ର ମେଗା ଅକ୍ସନରେ ନୀତିଶଙ୍କୁ କିଣିବା ଲାଗି ଦଳମାନେ ଅରାଜି ହୋଇପାରନ୍ତି ବୋଲି କୁହାଯାଉଛି।
