ପାଟନା,୨୮ ।୮: ବିହାରରେ ଜେଡିୟୁ ଭାରତୀୟ ଜନତା ପାର୍ଟି(ଭାଜପା) ଠାରୁ ଅଲଗା ହୋଇ ସରକାର ଗଠନ କରିବା ପରେ ଏବେ ରାଜ୍ୟ ସଭା ଏମପି ସୁଶୀଲ ମୋଦି ଓ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ପରସ୍ପର ବିରୋଧରେ ବୟାନ ଦେବା ଆରମ୍ଭ କରିଛନ୍ତି । ନୀତୀଶ କୁମର ଭାଜପା ନେତା ସୁଶୀଲ ମୋଦିଙ୍କ ସେହି କଥାର ଜବାବ ଦେଇଛନ୍ତି ଯେଉଁଥିରେ ନୀତୀଶଙ୍କ ଉପରେ ସରକାର ଭାଙ୍ଗିବାରେ ଭବିଷ୍ୟବାଣୀ କରାଯାଇଥିଲା । ନୀତୀଶ କହିଛନ୍ତି ଏବେ ବିଚରା ସୁଶୀଲ ମୋଦି ଯଦି କିଛି କହୁଛନ୍ତି ତେବେ ତାଙ୍କୁ ପ୍ରତିଦିନ କିଛି ନା କିଛି କହିବା ଦରକାର । କାରଣ କେନ୍ଦ୍ର ସରକାରଙ୍କୁ ଖୁସି ରଖିବା ବି ଦରକାର । ଯେତେବେଳେ ଜେଡିୟୁ ଭାଜପା ସହ ମିଶି ସରକାର ଗଠନ କରିଥିଲା ସେତେବେଳେ ତାଙ୍କୁ କୌଣସି ପଦ ଦିଆଯାଇ ନ ଥିଲା ଯାହା ତାଙ୍କୁ କଷ୍ଟ ଦେଉଥିଲା ।
ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି , ସୁଶୀଲ ମୋଦି ଯଦି କିଛି କହୁଛନ୍ତି ତେବେ ତାଙ୍କୁ କୁହନ୍ତୁ ସରକାର ଭାଙ୍ଗି ଦିଅନ୍ତୁ, ତାହେଲେ ତାଙ୍କୁ କୌଣସି ସ୍ଥାନ ମିଳିଯାଇପାରେ । ତାଙ୍କୁ କୁହନ୍ତୁ ସେ ସବୁଦିନ କୁହନ୍ତୁ, ତା’ହେଲେ କେନ୍ଦ୍ର ସରକାର ଖୁସି ହୋଇଯିବେ । ସୂଚନାଯୋଗ୍ୟ, ନିକଟରେ ବିହାରର ପୂର୍ବତନ ଉପ ମୁଖ୍ୟମନ୍ତ୍ରୀ ସୁଶୀଲ ମୋଦି କହିଥିଲେ, ଅବଧ ଚୌଧୁରୀ ବିହାର ବିଧାନସଭାର ସ୍ପିକର ହେବା ପରେ ଜେଡିୟୁର ଓଲଟା ଗଣତି ଆରମ୍ଭ ହୋଇଯାଇଛି । ରାଜ୍ୟ ସଭା ଏମପି ସୁଶୀଲ ମୋଦି କହିଥିଲେ, ଏବେ ଲାଲୁ ପ୍ରସାଦ ଯାଦବ ଯେତେବେଳେ ଚାହିଁବେ ଉପ ମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ମୁଖ୍ୟମନ୍ତ୍ରୀ ହୋଇଯିବେ । ଭାଜପା ନେତା ସୁଶୀଲ ମୋଦି ଶୁକ୍ରବାର ଏକ ଟୁଇଟ ବି କରିଥିଲେ । ସେଥିରେ ସେ ଲେଖିଥିଲେ ପୂର୍ବତନ କେନ୍ଦ୍ରମନ୍ତ୍ରୀ ଗୁଲାମ ନବି ଆଜାଦଙ୍କ ସହ ଜମ୍ମୁ-କଶ୍ମୀରର ଆଉ କେତେଜଣ ନେତା ପ୍ରମାଣ କରି ଦେଇଛନ୍ତି, କଂଗ୍ରେସ ଦଳ ଏକ ବୁଡି ଯାଉଥିବା ବୁଢା ଜାହାଜ । ନୀତୀଶ କୁମାର ଗୋଟିଏ ଗୋଡ ବୁଡିଯାଉଥିବା ଜାହାଜ ଉପରେ ରଖିଛନ୍ତି ଆଉ ଦ୍ୱିତୀୟ ଗୋଡଟି ଏମିତି ଜାଗାରେ ରଖିଛନ୍ତି ଯାହା ତାଙ୍କ ଛୋଟିଆ ଡଙ୍ଗାଟିକୁ ଯେ କୌଣସି ମୁହୂର୍ତ୍ତରେ ବୁଡାଇ ଦେଇପାରେ ।
