ନୂଆଦିଲ୍ଲୀ,୨୯।୧: ୧ ଦଶନ୍ଧି ମଧ୍ୟରେ ଏହା ହେଉଛି ନୀତୀଶଙ୍କ ପଞ୍ଚମ ଶିବିର ପରିବର୍ତ୍ତନ। ବାରମ୍ବାର ମେଣ୍ଟ ବଦଳାଉଥିବାରୁ ତାଙ୍କୁ ରାଜନୈତିକ ମହଲରେ ‘ପଲ୍ଟୁ ରାମ’ ଓ ‘ପଲଟୁ କୁମାର’ ଭଳି ଆଖ୍ୟା ଦିଆଯାଇଛି। ନୀତୀଶ ୨୦୦୦ ମାର୍ଚ୍ଚରେ ଭାଜପା ସମର୍ଥନରେ ପ୍ରଥମ ଥର ମୁଖ୍ୟମନ୍ତ୍ରୀ ରୂପେ ଶପଥ ନେଇଥିଲେ।
୨୦୦୫ ନଭେମ୍ବରରେ ଦ୍ୱିତୀୟ ଓ ୨୦୧୦ ନଭେମ୍ବରରେ ତୃତୀୟ ଥର ପାଇଁ ଭାଜପା ସହ ମିଶି ସରକାର ଗଢ଼ିଥିଲେ। ୨୦୧୫ ଫେବୃୟାରୀରେ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ଏବଂ କଂଗ୍ରେସ ସମର୍ଥନରେ ଚତୁର୍ଥ ଥର ପାଇଁ ବିହାର ମୁଖ୍ୟମନ୍ତ୍ରୀ ହୋଇଥିଲେ। ଏହି ମହାମେଣ୍ଟ ସମର୍ଥନରେ ନୀତୀଶ ୨୦୧୫ ନଭେମ୍ବରରେ ପଞ୍ଚମ ଥର କ୍ଷମତାସୀନ ହୋଇଥିଲେ।
କିନ୍ତୁ ୨୦୧୭ ଜୁଲାଇରେ ମହାମେଣ୍ଟରୁ ଓହରି ଭାଜପା ସମର୍ଥନରେ ଷଷ୍ଠ ଥର ମୁଖ୍ୟମନ୍ତ୍ରୀ ରୂପେ ଶପଥ ନେଇଥିଲେ। ସେହିପିର ୨୦୨୦ ନଭେମ୍ବରରେ ଭାଜପା ସମର୍ଥନରେ ସପ୍ତମ ଥର ମୁଖ୍ୟମନ୍ତ୍ରୀ ହୋଇଥିଲେ। କିନ୍ତୁ ଭାଜପା ମହାରାଷ୍ଟ୍ରରେ ଶିବସେନାର ବିଭାଜନ ଭଳି ବିହାରରେ ଜେଡିୟୁକୁ ଭାଙ୍ଗିଦେବ ବୋଲି ଆଶଙ୍କା କରି ୨୦୨୨ ଅଗଷ୍ଟରେ ସେ ଏନ୍ଡିଏ ଛାଡ଼ି ପୁଣି ମହାମେଣ୍ଟକୁ ଫେରିଥିଲେ।
ସେହି ସମୟରେ ସେ ଆର୍ଜେଡି-କଂଗ୍ରେସର ସମର୍ଥନରେ ଅଷ୍ଟମ ଥର ଶପଥ ଗ୍ରହଣ କରିଥିଲେ। ନୀତୀଶ ରବିବାର ଭାଜପା ସମର୍ଥନରେ ନବମ ଥର ବିହାର ମୁଖ୍ୟମନ୍ତ୍ରୀ ରୂପେ ଶପଥ ଗ୍ରହଣ କରି ନୂଆ ରେକର୍ଡ ସୃଷ୍ଟି କରିଛନ୍ତି।
