ପାଟଣା,୧୦।୬(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ତହସିଲ ଅର୍ନ୍ତଗତ ଚେମେଣା ଓ ଯମୁନା ପଶି ର ୧୨ଟି ମୌଜା ର ଜମି କୁ ନେଇ ପ୍ରସ୍ତାବିତ ମେଗାଷ୍ଟିଲ ପ୍ଲାଣ୍ଟ ପ୍ରତିଷ୍ଠା ପାଇଁ ୧୨ଟି ଗ୍ରାମସଭା ମଧ୍ୟରୁ ବୁଧବାର ନବମ ଗ୍ରାମସଭା ଯମୁନାପଶି ପଞ୍ଚାୟତର କୋଡ଼ଖମଣ ଗାଁରେ ସମ୍ପର୍ଣ୍ଣ ହୋଇଛି। ମୌଜା ର ୧୫୦.୫୦ ଏକର ଘରୋଇ ଜମି ଅଧିଗ୍ରହଣ ନେଇ ଗ୍ରାମସଭାରେ ଲୋକଙ୍କ ଠାରୁ ମତାମତ ଗ୍ରହଣ କରାଯାଇଥିଲା । ଲୋକମାନେ ପ୍ରଶାସନ ନିକଟରେ ଏକର ପିଛା ୨୫ କୋଟି ଟଙ୍କା କ୍ଷତିପୂରଣ ଦାବି ସହ ଗ୍ରାମବାସୀ ଅନ୍ୟ ୩୭ଦଫା ଦାବି ଉପସ୍ଥାପନ କରିଥିଲେ । ୩୮ ଦଫା ଦାବି ମାଧ୍ୟମରେ ଗାଁର ରାସ୍ତାଘାଟ, ପାନୀୟ ଜଳ, ଶିକ୍ଷା ସ୍ବାସ୍ଥ୍ୟ , ସ୍ବାସ୍ଥ୍ୟ ଗୋ ସମ୍ପଦ ସୁରକ୍ଷା ସହ, ବନୀକରଣ,ପାରିପାର୍ଶ୍ୱିକ ବିକାଶ ଦିଗରେ ସରକାର ପଦକ୍ଷେପ ନେବାକୁ ଦାବି କରିଥିଲେ ଲୋକେ। ଆୟୋଜିତ ଗ୍ରାମସଭା ସ୍ଥାନୀୟ ସରପଞ୍ଚ ଶଶିଭୂଷଣ ନାଏକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ଅତିରିକ୍ତ ଜିଲାପାଳ ତଥା ସତନ୍ତ୍ର ଭୂଅର୍ଜନ ଅଧିକାରୀ ରବୀନ୍ଦ୍ର କୁମାର ପ୍ରଧାନ, ୱାର୍ଡ଼ ସଦସ୍ୟ, ପାଟଣା ତହସିଲଦାର ଅଶିନୀ କୁମାର ନାଏକ, ପାଟଣା ବିଡ଼ିଓ ମାନସ ରଞ୍ଜନ ଦଣ୍ଡପାଟ, ଇଡକୋ ଜମି ଅଧିଗ୍ରହଣ ଅଧିକାରୀ ଜୟ କିଶୋର ପାତ୍ର ପ୍ରମୁଖ ଯୋଗ ଦେଇଥିଲେ। ପ୍ରସ୍ତାବିତ ମୋଗା ଷ୍ଟିଲ ପ୍ଲାଣ୍ଟ ପାଇଁ ଯମୁନାପଶି ପଞ୍ଚାୟତରେ ହେବାକୁ ଥିବା ୪ଟି ଗ୍ରାମସଭା ମଧ୍ୟରୁ ଆଜି କୋଡ଼ଖମଣ ଗ୍ରାମରେ ଦ୍ୱିିତୀୟ ଗ୍ରାମସଭାକୁ ମିଶାଇ ମୋଟ ୯ଟି ଗ୍ରାମସଭା ଶେଷ ହୋଇଛି । ଜେଏସଡବ୍ଲୁ ଏବଂ ପୋସ୍କୋ କମ୍ପାନୀର ମିଳିତ ସହଯୋଗରେ ପାଟଣା ବ୍ଲକର ୧୨ଟି ଗ୍ରାମରେ ୪୦ ହଜାର କୋଟି ଟଙ୍କା ବ୍ୟୟରେ ବାର୍ଷିକ ୫ ନିୟୁତ ଟନ କ୍ଷମତା ବିଶିଷ୍ଟ ଏକ ମେଗା ଇସ୍ପାତ କାରଖାନା ପ୍ରତିଷ୍ଠା ପାଇଁ ଗ୍ରାମସଭା ଅନୁଷ୍ଠିତ ହେଉଛି । ଆଜିର ଗ୍ରାମସଭାରେ ଲୋକଙ୍କର ବିଭିନ୍ନ ମୌଳକ ସମସ୍ୟାର ଯଥାଶୀଘ୍ର ସମାଧାନ କରାଯିବା ସହ, ଅନ୍ୟ ୩୮ ଦଫା ଦାବି ସମ୍ପର୍କରେ ସରକାରଙ୍କୁ ଅବଗତ କରାଯିବ ବୋଲି କେନ୍ଦୁଝର ଅତିରିକ୍ତ ଜିଲାପାଳ ରବୀନ୍ଦ୍ର ପ୍ରଧାନ କହିଛନ୍ତି।
